অসমত চলি থকা ৰাষ্ট্ৰীয় নাগৰিকপঞ্জী চমুকৈ এন আৰ চি উন্নীতকৰণৰ প্ৰক্ৰিয়াই বিৰূপ প্ৰভাৱ পেলাইছে কৰ্ণাটকত। জনগাঁথনিৰ লগতে ৰাজ্যখনত অৰ্থনৈতিক ক্ষেত্ৰতো পৰিছে বিৰূপ প্ৰভাৱ। এই অভিযোগ উত্থাপন কৰিছে কৰ্ণাটকৰ বিজেপি সাংসদ তেজস্বী সূৰ্যই।
বুধবাৰে লোকসভাৰ শূণ্যকালত দক্ষিণ বেংগালুৰুৰ সাংসদজনে কয় যে এন আৰ চিৰ কাম চলি থকা বাবে অসমৰ অবৈধ বাংলাদেশী সকলে এতিয়া আশ্ৰয় লৈছে কৰ্ণাটকত। আনকি কৰ্ণাটকৰ উপৰি দেশৰ বিভিন্ন প্ৰান্তত বাংলাদেশী সকলে ভোটাৰ পৰিচয়পত্ৰৰ লগতে আধাৰ কাৰ্ডো সংগ্ৰহ কৰিছে। সেয়ে এই বিষয়টোত গভীৰ উদ্বেগ প্ৰকাশ কৰি সাংসদজনে গৃহ মন্ত্ৰী অমিত শ্বাহৰ হস্তক্ষেপ বিচাৰিছে।
ইয়াৰ উপৰি কৰ্ণাটকত এতিয়া ৪০ হাজাৰ অবৈধ বাংলাদেশীয়ে বাহৰ পাতিছে বুলি সাংসদজনে লোকসভাৰ মজিয়াত চাঞ্চল্যকৰ তথ্য দাঙি ধৰে। তদুপৰি কয় যে এই সকল লোকে এতিয়া দেশৰ আভ্যন্তৰীণ নিৰাপত্তালৈ ভাবুকি কঢ়িয়াই অনাৰ উপৰি কিছু কিছু অঞ্চলত জনগাঁথনি সলনি হোৱাৰ লগতে অৰ্থনীতিতো প্ৰভাৱ পেলোৱা আৰম্ভ কৰিছে।
সাংসদ গৰাকীয়ে প্ৰকাশ কৰা অনুসৰি বহু অবৈধ লোকক কৰ্ণাটক আৰক্ষীয়ে আটক কৰিছে। ইয়াৰে একাংশ বাংলাদেশী মৌলবাদী সংগঠনৰ সৈতে জড়িত বুলিও সদনৰ মজিয়াত চাঞ্চল্যকৰ তথ্য আগবঢ়ায়।
সেয়ে সাংসদ সূৰ্যই দেশৰ সুৰক্ষা তথা নিৰাপত্তাৰ স্বাৰ্থত কৰ্ণাটকৰ লগতে সমগ্ৰ দেশতে ৰাষ্ট্ৰীয় নাগৰিকপঞ্জী উন্নীতকৰণৰ কাম আৰম্ভ কৰিব লাগে বুলি গৃহ মন্ত্ৰী অমিত শ্বাহক আহ্বান জনাইছে।
