ক্ষমতা গ’লেও যেন ভিআইপি সংস্কৃতি এৰিব পৰা নাই সাংসদ ৰকিবুল হুছেইনৰ পুত্ৰ তাঞ্জিল হুছেইনে। বিগত কংগ্ৰেছ চৰকাৰৰ কাৰ্যকালত ১৫ বছৰ ধৰি পিতৃ ৰকিবুল হুছেইন অসমৰ এগৰাকী ক্ষমতাশালী মন্ত্ৰী হিচাপে থকাৰ সুবাদত মন্ত্ৰী পুত্ৰ হিচাপে দীঘলীয়া সময়ছোৱাত এছকৰ্ট কনভয়ৰ মাজত ৰঙা লাইট লগাই যোৱাটো তাঞ্জিলৰ বাবে এক অভ্যাসত পৰিণত হৈছিল। শেহতীয়াভাৱে চামগুৰি সমষ্টিৰ ৰূপহীহাটত ৰকিবুল হুছেইনক দুস্কৃতিকাৰীয়ে প্ৰহাৰ কৰাৰ পিছত তেওঁৰ নিৰাপত্তা বৃদ্ধি কৰা হৈছিল। ইয়াৰ উপৰিও, চামগুৰি বিধানসভা নিৰ্বাচনত শোচনীয়ভাৱে পৰাজিত হোৱাৰ পিছতো নিৰ্বাচনী হিংসাৰ বাবে কংগ্ৰেছৰ প্ৰাৰ্থী হিচাপে তাঞ্জিলে যথেষ্ট নিৰাপত্তাৰক্ষী পাইছিল। এইসমূহ কাৰকেই তাঞ্জিল হুছেইনৰ বাবে VIP সংস্কৃতি আৰু ৰঙা লাইট লগাই ৰাজপথত যাত্ৰা কৰাটো অভ্যাসত পৰিণত কৰিছিল বুলি ধাৰণা কৰা হৈছে।
কিন্তু এই অভ্যাসৰ বাবেই বুধবাৰে সন্ধ্যা শ্বিলং ফুৰিবলৈ গৈ বিপদত পৰিল তাঞ্জিল হুছেইন। সাংসদ পিতৃৰ বাহনত ৰঙা লাইট ব্যৱহাৰ কৰি মেঘালয়ৰ ৰাজপথত চফৰ কৰা তাঞ্জিলৰ এই কাণ্ডত ক্ষোভিত হ’ল মেঘালয় আৰক্ষীৰ বিষয়া। ফলস্বৰূপে, মেঘালয়ৰ উমলিং নংপুৰ সমীপত আৰক্ষীয়ে জব্দ কৰিলে তাঞ্জিল হুছেইনে ব্যৱহাৰ কৰা ইন’ভা বাহনখন।
ৰাজপথত কৰ্তব্যৰত মেঘালয় আৰক্ষীৰ বিষয়াই সাংসদ পিতৃৰ বাহনত ব্যৱহাৰ কৰা ৰঙা লাইট খুলি দিয়ে। ভৱিষ্যতে এনে অনিয়ম নকৰিবলৈকো ৰকিবুল পুত্ৰক কঠোৰভাৱে সকীয়াই দিয়ে মেঘালয় আৰক্ষীয়ে। পৰৱৰ্তী সময়ত নগদ ৩৫ হাজাৰ টকাৰ জৰিমণা আদায় কৰাৰ পিছতহে তাঞ্জিল হুছেইনৰ বাহনখন মুকলি কৰি দিয়া হয়।
এই ঘটনাই সামাজিক মাধ্যমত ব্যাপক প্ৰতিক্ৰিয়াৰ সৃষ্টি কৰিছে। কংগ্ৰেছৰ একাংশ নেতাই ভিআইপি সংস্কৃতি পৰিহাৰ কৰিব নোৱাৰাৰ বিষয়ে সততে উঠা অভিযোগক এই ঘটনাই অধিক প্ৰাসংগিক কৰি তুলিছে। মন কৰিবলগীয়া যে, ২০২৬ চনৰ বিধানসভা নিৰ্বাচনত পুনৰ চামগুৰিৰ প্ৰাৰ্থিত্ব বিচাৰি সমষ্টিটোত কুচকাৱাজ অব্যাহত ৰখা তাঞ্জিল হুছেইনৰ এই ঘটনাই প্ৰাক্তন বনমন্ত্ৰী তথা ধুবুৰীৰ সাংসদ ৰকিবুল হুছেইনক যথেষ্ট অস্বস্তিত পেলাইছে বুলি জনা গৈছে।
