অসম চুক্তিৰ ৬ নং দফা সন্দৰ্ভত পৰামৰ্শ আগবঢ়োৱাৰ বাবে শেহতীয়াকৈ গঠিত ১৩ জনীয়া উচ্চস্তৰীয় সমিতিৰ এগৰাকী অন্যতম সদস্য শিক্ষাবিদ মৃণাল মিৰিয়ে সমিটিখনত থাকিব বুলি স্পষ্ট কৰি দিছে।
প্ৰয়াত ইন্দিৰা মিৰিৰ সন্তান মৃণাল মিৰিয়ে শিক্ষা আৰু সাহিত্য ক্ষেত্ৰলৈ আগবঢ়োৱা অৱদানৰ বাবে পদ্মশ্ৰী সন্মান লাভ কৰাৰ লগতে ২০১২ চনত ৰাজ্যসভাৰ সদস্য ৰূপে মনোনীত হৈছিল।
উল্লেখযোগ্য যে, বিগত ১৬ জুলাইত গঠন কৰা সমিতিখনত গুৱাহাটী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ বিপ্লৱ কুমাৰ শৰ্মাক অধ্যক্ষ হিচাপে দায়িত্ব অৰ্পন কৰা হৈছিল।
আগন্তুক ছয় মাহৰ ভিতৰত কেন্দ্ৰক অসম চুক্তিৰ ৬নং দফা ৰূপায়নৰ ক্ষেত্ৰত প্ৰতিবেদন দাখিল কৰিবলগীয়া সমতিখনে অসম চুক্তিৰ ৬নং দফাত উল্লেখিত সাংবিধানিক, বিধায়িনী আৰু প্ৰশাসনিক অধিকাৰ সন্দৰ্ভত কেন্দ্ৰক পৰামৰ্শ আগবঢ়াব বুলি জানিব পৰা গৈছে।
তদুপৰি, সমিতিখনে বিভিন্ন দল-সংগঠন, প্ৰখ্যাত ব্যক্তি, অৰ্থনীতিবিদ, আইন বিশেষজ্ঞ আদিৰ মতামতো এই ক্ষেত্ৰত গ্ৰহণ কৰিব।
কেন্দ্ৰ চৰকাৰে ইয়াৰ পূৰ্বে লোকসভা নিৰ্বাচনৰ প্ৰাকক্ষণত অসম চুক্তিৰ ৬ নং দফাৰ ৰূপায়নৰ ক্ষেত্ৰত এখন সমিতি গঠন কৰি দিছিল যদিও সমিতিখনৰ বেছিভাগ সদস্যই পদত্যাগ কৰাত নতুনকৈ সমিতিখন গঠন কৰিবলগীয়া হয়।
অসমৰ মহাধিবক্তা ৰমেশ বৰপাত্ৰগোহাঞি, অৰুণাচল প্ৰদেশৰ মহাধিবক্তা নিলয় দত্ত, অৱসৰপ্ৰাপ্ত আই এ এছ বিষয়া সুভাষ দাস, অসম আৰক্ষী (বিশেষ শাখা)ৰ প্ৰাক্তন সঞ্চালকপ্ৰধান পল্লৱ ভট্টাচাৰ্য্য, অৱসৰপ্ৰাপ্ত অধ্যাপক সৃষ্টিধৰ দত্ত, লেখক সুমন্ত চলিহা, অধ্যাপক জয়কান্ত শৰ্মা, জ্যেষ্ঠ সাংবাদিক ৱাছবিৰ হুছেইন আৰু সদৌ অসম ছাত্ৰ সন্থাৰ মুখ্য উপদেষ্টা, সভাপতি আৰু সম্পাদক ক্ৰমে ড০ সমুজ্জ্বল কুমাৰ ভট্টাচাৰ্য্য, দীপাংক কুমাৰ নাথ আৰু লুৰিণজ্যোতি গগৈয়ো সদস্য হিচাপে সমিতিখনত আছে।
গৃহ মন্ত্ৰালয়ৰ যুটীয়া সচিব (উত্তৰ-পূব)ক সমিতিখনত সদস্য সচিবৰূপে নিয়োগ কৰা হৈছে।
