কিমান চান্দা দিলে? ট্ৰাম্প-মেলানিয়াৰ নৈশভোজ-শপতগ্ৰহণত উপস্থিত থাকিব নীতা-মুকেশ আম্বানী
ড’নাল্ড ট্ৰাম্পৰ কাৰ্যভাৰ গ্ৰহণ অনুষ্ঠানত অংশগ্ৰহণ কৰিবলৈ শনিবাৰে ৱাশ্বিংটনত উপস্থিত হৈছে বিশ্বৰ অন্যতম ধনী ব্যক্তি তথা এছিয়াৰ ধনী ব্যৱসায়ী আৰু ৰিলায়েন্সৰ চিইঅ’ মুকেশ আম্বানী আৰু তেওঁৰ পত্নী নীতা আম্বানী।
অহা ২০ জানুৱাৰীত ৪৭ সংখ্যক আমেৰিকাৰ ৰাষ্ট্ৰপতি হিচাপে শপত গ্ৰহণ কৰিব ট্ৰাম্পে। সেই মহাসমাৰোহৰ উদযাপন আজিৰে পৰা আৰম্ভ হৈছে। সূত্ৰ অনুসৰি অহা ১৮ জানুৱাৰীত আমেৰিকাৰ ৰাজধানী ৱাশ্বিংটনত অৱতৰণ কৰিব মুকেশ আৰু নীতাই। আৰু তেওঁলোকৰ আসন বিশিষ্ট অতিথিৰ মঞ্চত সংৰক্ষিত। ট্ৰাম্প কেবিনেটৰ সদস্য আৰু নিৰ্বাচিত ৰিপাব্লিকান প্ৰতিনিধি য’ত বহিব, তাতেই মুকেশ আৰু নীতাৰ আসন থাকিব।
শনিবাৰে ভাৰ্জিনিয়াৰ ট্ৰাম্প নেশ্যনেল গ’ল্ফ ক্লাবত আদৰণি অনুষ্ঠান আৰু আতচবাজীৰ জৰিয়তে এই উৎসৱ আৰম্ভ হ’ব। ইয়াৰ পিছত কেবিনেট অভ্যৰ্থনা আৰু প্ৰথা অনুসৰি উপ-ৰাষ্ট্ৰপতিৰ দ্বাৰা আয়োজিত নৈশ আহাৰ গ্ৰহণ কৰা হ’ব। দুয়োটা অনুষ্ঠানতে উপস্থিত থাকিব আম্বানী দম্পতী। উদ্বোধনীৰ আগ নিশা নীতা-মুকেশে নিৰ্বাচিত ৰাষ্ট্ৰপতি ট্ৰাম্পৰ সৈতে অনুষ্ঠিত হ’বলগীয়া কেণ্ডেল লাইট ডিনাৰত অংশগ্ৰহণ কৰিব। উপ-ৰাষ্ট্ৰপতি জে ডি আৰু উষা ভ্যান্সৰ সৈতে ব্যক্তিগত বাৰ্তালাপো হ’ব।
ট্ৰাম্পৰ কাৰ্যভাৰ গ্ৰহণ অনুষ্ঠানত অংশগ্ৰহণ কৰিবলৈ মুকেশ আম্বানীয়ে চান্দা দি নিৰ্বাচনী পুঁজি গঠনত সহায় কৰিছিল নেকি? এই প্ৰশ্নটোও বৰ্তমান বিভিন্ন মহলত চৰ্চিত হৈ আছে। ইয়াৰ বাবে কোটিপতি ৰিয়েল এষ্টেট টাইকুন ট্ৰাম্পৰ উদ্বোধনী সমিতিয়ে বিপুল পৰিমাণৰ ধন সংগ্ৰহ কৰে। কাৰণ, এই বিশাল ধনৰাশি দান কৰিলেই নিৰ্বাচিত ৰাষ্ট্ৰপতি ড’নাল্ড ট্ৰাম্প আৰু তেওঁৰ পত্নী ভাবী ফাৰ্ষ্ট লেডী মেলানিয়া ট্ৰাম্পৰ সৈতে কিছু ব্যক্তিগত সময় কটাব পাৰিব। আনকি ব্যক্তিগত নৈশভোজত অংশগ্ৰহণৰ প্ৰস্তাৱো দিয়া হৈছিল। আম্বানী দম্পতীয়ে এই বিশেষ অভ্যৰ্থনাৰ বাবে ধন দিছিল নে ট্ৰাম্পৰ পৰা আনুষ্ঠানিক নিমন্ত্ৰণ পাইছে সেয়া স্পষ্ট নহয়!
ট্ৰাম্প-ভেন্স উদ্বোধনী সমিতিৰ সুবিধা দাতাৰ পৰা ১০ লাখৰ পৰা ২০ লাখ ডলাৰৰ ভিতৰত ধন সংগ্ৰহ কৰিছে। সেইবাবেই বহু উদ্যোগপতি এতিয়া ১৯ জানুৱাৰীত ৰাতিৰ আহাৰ গ্ৰহণৰ সময়ত ট্ৰাম্প আৰু মেলানিয়াৰ সৈতে সময় কটাবলৈ আগ্ৰহী হৈ পৰিছে। নিউয়ৰ্ক টাইমছত প্ৰকাশিত এক প্ৰতিবেদন অনুসৰি এই অনুষ্ঠানত বিশ্বৰ ধনী উদ্যোগপতি আৰু ধনী লোকৰ মাজত থাকিব আম্বানীৰ দম্পতি।