পুনৰ মায়া নগৰী মুম্বাইত যেন তেজৰ নৈ বোৱাই দিয়াৰ পৰিকল্পনা কৰিছে পাক সন্ত্ৰাসবাদীয়ে। যিটো সময়ত ৰাষ্ট্ৰসংঘৰ সচিব প্ৰধানগৰাকী মুম্বাইত আছে সেই সময়তে সন্ত্ৰাসবাদিয়ে পুনৰ মুম্বাইত ২৬/১১ সদৃশ কূটাঘাত ঘটোৱাৰ ভাবুকি দিছে। ভাবুকি দিয়াৰ ধৰণো পূৰ্বৰ দৰে একেই।
২৬/১১ ৰ আক্ৰমণৰ পূৰ্বেও সন্ত্ৰাসবাদীয়ে আৰক্ষীক ফোন কৰি মুম্বাইৰ কেইবাঠাইতো আক্ৰমণ কৰিব বুলি কৈছিল। এতিয়া পুনৰ একে ধৰণৰ ভাবুকিয়েই আহিছে। মুম্বাই আৰক্ষীয়ে প্ৰকাশ কৰা মতে অজ্ঞাত লোকে আৰক্ষীৰ জৰুৰীকালীন সেৱাৰ নম্বৰত ফোন কৰি জনাইছে যে চহৰখনৰ তিনিটা গুৰুত্বপূৰ্ণ স্থানত বোমা বিস্ফোৰণ ঘটোৱা হ’ব। এই কথা কৈয়েই তেওঁ ফোনটো সংযোগ বিচ্ছিন্ন কৰে আৰক্ষীয়ে সেই ঠাইবোৰত বোমা উদ্ধাৰ কৰিবলৈ অভিযান চলাই আছে।
অৱশ্যে এতিয়ালৈকে একো বিপজ্জনক সামগ্ৰী পোৱা হোৱা নাই। উল্লেখ্য এজন অচিনাক্ত ব্যক্তিয়ে আৰক্ষীৰ ১১২ ‘হেল্পলাইন নম্বৰ’ত ফোন কৰিছিল আৰু কৈছিল যে চহৰখনৰ কেইবাঠাইতো বোমা বিস্ফোৰণ হ’ব। লোকজনৰ মতে, বোমাবোৰ ক্ৰমান্বয়ে আন্ধেৰীৰ ইনফিনিটি মল, জুহুৰ পিভিআৰ মল আৰু চাহাৰা হোটেলত ৰখা হৈছে। আৰক্ষীয়ে আন্ধেৰী আৰু জুহুত তালাচী আৰম্ভ কৰিছে।
উল্লেখ্য ২০০৮ চনৰ ২৬ নৱেম্বৰত পাকিস্তানী সন্ত্ৰাসবাদীৰ আক্ৰমণত মুম্বাই কঁপি উঠিছিল। ১০ জন লস্কৰ সন্ত্ৰাসবাদীয়ে কৰাচীৰ পৰা সাগৰীয় পথেৰে মুম্বাইত প্ৰৱেশ কৰিছিল।সন্ত্ৰাসবাদীয়ে তাজ হোটেলকে ধৰি কেইবা ঠাইতো আক্ৰমণ কৰিছিল। আক্ৰমণত ২৭৫ জন লোক নিহত হৈছিল আৰু ৭১৩ জন লোক আহত হৈছিল। নিহত সকলৰ ভিতৰত ৯ জন সন্ত্ৰাসবাদীও আছিল।