মহান স্পিনাৰ মুথেয়া মুৰুলীধৰণে ভাৰতীয় স্পিনাৰ আৰ আশ্বিন সন্দৰ্ভত এক গুৰুত্বপূৰ্ণ মন্তব্য কৰিছে।
বৰ্তমান সময়ৰ স্পিনাৰৰ ভিতৰত কেৱল আশ্বিনেহে টেষ্ট ক্ৰিকেটত ৭০০-৮০০ উইকেটৰ ওচৰ চাপিব পাৰিব বুলি তেওঁ মন্তব্য কৰে।
টেষ্ট ক্ৰিকেটত সৰ্বাধিক উইকেট দখলকাৰীৰ তালিকাৰ শীৰ্ষ স্থানত আছে শ্ৰীলংকাৰ মুৰুলীধৰণ। টেষ্টত তেওঁ ৮০০ উইকেট দখল কৰিছিল।
আনহাতে ৭০৮টা উইকেটেৰে অষ্ট্ৰেলিয়াৰ শ্বেন ৱাৰ্ণ দ্বিতীয় আৰু ৬১৯টা উইকেটেৰে ভাৰতৰ অনিল কুম্বলে তৃতীয় স্থানত আছে।
মুৰুলীধৰণে লণ্ডণৰ টেলিগ্ৰাফ বাতৰিকাকতৰ বাবে মাইকেল ভনৰ কলমত কয়, ‘আশ্বিনৰ হাতত সুযোগ আছে কিয়নো তেওঁ ভাল বলাৰ, তেওঁৰ বাহিৰে অন্য কোনো বলাৰে ৮০০ৰ ওচৰ চাপিব নোৱাৰে’।
ইফালে অষ্ট্ৰেলিয়াৰ নাথান লায়ন সন্দৰ্ভত মুৰুলীয়ে কয় যে তেওঁৰ সেই সামৰ্থ নাই। তেওঁ ৪০০ উইকেটৰ ওচৰ চাপিছে কিন্তু সেই মাইলষ্ট’নত উপনীত হ’বলৈ তেওঁ বহুত মেচ খেলিব লাগিব।
উল্লেখ্য যে আৰ আশ্বিনে এই পৰ্যন্ত ৭৪খন টেষ্টত ৩৭৭টা উইকেট আৰু লায়নে ৯৯খন মেচত ৩৯৬টা উইকেট দখল কৰিছে।