বিপদত পৰিছে ইলন মাস্ক। ব্ৰাজিলত নিষিদ্ধ কৰা হৈছে ইলন মাস্কৰ ষ্টাৰলিংক। আনকি ফ্ৰীজ কৰা হৈছে ব্ৰাজিলত থকা মাস্কৰ সকলো সম্পত্তি।
বৃহস্পতিবাৰে ব্ৰাজিলৰ ন্যায়াধীশ আলেকজেণ্ডাৰ ডি ম’ৰেছে ইলন মাস্কৰ চেটেলাইট ইণ্টাৰনেট অপাৰেটৰ ষ্টাৰলিংকৰ ওপৰত নিষেধাজ্ঞা জাৰি কৰে। ফলত ব্ৰাজিলত ষ্টাৰলিংকে কোনো ধৰণৰ বিত্তীয় লেনদেন কৰিব নোৱাৰিব।
মানহানিৰ গোচৰত আদালতৰ আদেশ অৱমাননা কৰাৰ বাবে ব্ৰাজিলত জনপ্ৰিয় মাইক্ৰ’ব্লগিং চাইট ‘এক্স’ও নিষিদ্ধ কৰা হৈছে। আদালতৰ সকলো নিৰ্দেশ মানি চলি জৰিমনা আদায় নিদিয়ালৈকে ব্ৰাজিলত নিষিদ্ধ হৈ থাকিব জনপ্ৰিয় ছচিয়েল মিডিয়া ‘এক্স’।
মূলতঃ ব্ৰাজিলৰ আদালতে এক্সক চেঞ্চৰশ্বিপ বিষয়টোৰ ওপৰত আইনী প্ৰতিনিধি পঠিয়াবলৈ ২৪ ঘণ্টাৰ সময় দিছিল কোম্পানীটোক। কিন্তু ইলন মাস্কৰ কোম্পানীয়ে সময়সীমাৰ পিছতো প্ৰতিনিধি প্ৰেৰণ কৰা নাছিল। ইয়াৰ বাবেই ‘এক্স’ৰ ওপৰত নিষেধাজ্ঞা আৰোপ কৰা হৈছে।
উল্লেখ্য যে যোৱা এপ্ৰিল মাহত দেশত বহুতো ভুৱা তথ্য বিয়পোৱাৰ অভিযোগত ‘এক্স’ৰ কেইবাটাও একাউণ্ট বন্ধ কৰি দিয়া হৈছিল। তেতিয়াৰ পৰাই বিতৰ্কত সোমাই পৰিছিল ইলন মাস্ক।
এতিয়া আদালতৰ এই সিদ্ধান্তত প্ৰতিক্ৰিয়া প্ৰকাশ কৰি ইলন মাস্কে কয় যে, “স্বাধীনতাই গণতন্ত্ৰৰ ভেটি। ব্ৰাজিলৰ এজন নিৰ্বাচিত নোহোৱা, ছদ্মৱেশ লোৱা ন্যায়াধীশে ৰাজনৈতিক উদ্দেশ্যত ইয়াক ধ্বংস কৰি আছে।”
ব্ৰাজিলৰ টেলিকমিউনিকেচন কোম্পানীটোৰ মুৰব্বীক এক্স প্লেটফৰ্ম স্থগিত ৰখাৰ দায়িত্ব দিয়া হৈছে। তেওঁ কয় যে এই সিদ্ধান্ত কাৰ্যকৰী কৰাৰ প্ৰক্ৰিয়া চলি আছে। আগন্তুক ২৪ ঘণ্টাৰ ভিতৰত দেশত ‘এক্স’ ব্যৱহাৰ বন্ধ হোৱাৰ সম্ভাৱনা আছে।
ন্যায়াধীশ ম’ৰেছে এপল আৰু গুগলক তেওঁলোকৰ এপ ষ্ট’ৰৰ পৰা এক্স আঁতৰাই আই অ’ এছ আৰু এণ্ড্ৰইড অপাৰেটিং চিষ্টেমত ইয়াৰ ব্যৱহাৰ বন্ধ কৰিবলৈ পাঁচ দিনৰ সময় দিয়ে। তেওঁ লগতে কয় যে প্লেটফৰ্মটোত প্ৰৱেশ কৰিবলৈ ভিপিএন (ভাৰ্চুৱেল প্ৰাইভেট নেটৱৰ্ক)ৰ দৰে পদ্ধতি ব্যৱহাৰ কৰা ব্যক্তি বা সংস্থাক ৫০ হাজাৰ ইউৰো পৰ্যন্ত জৰিমনা বিহা হ’ব পাৰে।
ব্ৰাজিলৰ আইন অনুসৰি সকলো ইণ্টাৰনেট কোম্পানীৰে নিজৰ দেশত এজন প্ৰতিনিধি থাকিব লাগিব, যিয়ে আইনী বিষয়সমূহ চম্ভালিব। প্ৰতিনিধিজনক আইনী বিষয়সমূহৰ বিষয়ে অৱগত কৰা হ’ব যাতে তেওঁ উপযুক্ত ব্যৱস্থা গ্ৰহণ কৰিব পাৰে।
কিন্তু এই মাহত এক্সে ব্ৰাজিলত থকা নিজৰ আইনী প্ৰতিনিধিক অপসাৰণ কৰে। আদালতে এক্সক ২৪ ঘণ্টাৰ ভিতৰত পুনৰ আইনী প্ৰতিনিধি নিযুক্তি দিবলৈ নিৰ্দেশ দিছিল যদিও কোম্পানীয়ে এই কথা মানি নল’লে।
এই সম্পৰ্কে এক্সে কয় যে উচ্চতম ন্যায়ালয়ৰ ন্যায়াধীশ ম’ৰেছে প্ৰতিনিধিজনক গ্ৰেপ্তাৰ কৰাৰ ভাবুকি দিছিল।
ইফালে, বৃহস্পতিবাৰে ব্ৰাজিলৰ ন্যায়াধীশ ম’ৰেছে মাস্কৰ চেটেলাইট ইণ্টাৰনেট অপাৰেটৰ ষ্টাৰলিংকৰ ওপৰতো নিষেধাজ্ঞা জাৰি কৰে। ফলত ব্ৰাজিলত ষ্টাৰলিংকে কোনো ধৰণৰ বিত্তীয় লেনদেন কৰিব নোৱাৰিব। আনকি কোম্পানীটোৰ সকলো সম্পত্তি ফ্ৰীজ কৰিবলৈও নিৰ্দেশ দিয়া হৈছে।
অৱশ্যে ষ্টাৰলিংকে কয় যে তেওঁলোকেও আইনী ব্যৱস্থা গ্ৰহণ কৰিব। মাস্কে কয়, “এক্স আৰু স্পেচএক্স দুটা বেলেগ বেলেগ কোম্পানী। ইহঁতৰ শ্বেয়াৰহোল্ডাৰো বেলেগ বেলেগ।”
ইয়াৰ পূৰ্বে মাস্কে ইউৰোপীয় সংঘৰ সৈতে এক্সৰ নিয়ন্ত্ৰণক লৈ বিবাদত লিপ্ত হৈছিল। যোৱা মাহত তেওঁ ব্ৰিটিছ প্ৰধানমন্ত্ৰী ছাৰ কেইৰ ষ্টাৰমাৰৰ সৈতেও কাজিয়াত লিপ্ত হৈছিল ইলন মাস্ক।
