“মোৰ মন্ত্ৰীসভাৰ সদস্যসকলে হিন্দী বুজি নাপায়। আনকি তেওঁলোকে ইংৰাজী ভাষাতো সমস্যাৰ সন্মুখীন হয়।’’— গৃহমন্ত্ৰী অমিত শ্বাহলৈ এইদৰে পত্ৰ প্ৰেৰণ কৰিছে এগৰাকী মুখ্যমন্ত্ৰীয়ে। তেওঁ হৈছে মিজোৰামৰ মুখ্যমন্ত্ৰী পু জোৰামথাংগা।
ভাৰতৰ চৰকাৰী ভাষা হিন্দী আৰু ইংৰাজী সন্দৰ্ভত প্ৰেৰণ কৰা পত্ৰখনে ব্যাপক চৰ্চা লাভ কৰিছে। কিন্তু কিয় মুখ্যমন্ত্ৰীগৰাকীয় এইদৰে পত্ৰ প্ৰেৰণ কৰিছে?
ইয়াৰ কাৰণ হৈছে মিজোৰামৰ মুখ্য সচিব লালুনমাৱিয়া চুৱাগই কিছুদিন পূৰ্বে অৱসৰ গ্ৰহণ কৰে। তাৰ পাছতে তেওঁৰ স্থানত যোৱা ২৮ অক্টোবৰত কেন্দ্ৰীয় চৰকাৰে ৰেনু শৰ্মা নামৰ এজন জ্যেষ্ঠ আইএএছ বিষয়াক নিযুক্তি দিছে। ইয়াৰ পূৰ্বে শৰ্মাই দিল্লীত যাতায়ত বিভাগৰ অতিৰিক্ত মুখ্য সচিব হিচাপে কৰ্মৰত আছিল। ৰেনু শৰ্মাৰ মিজো ভাষাৰ ওপৰত কোনো জ্ঞান নাই।
ৰেনু শৰ্মাক নিযুক্তি দিয়াৰ প্ৰতিবাদত জোৰাংথাংগাই ২৯ অক্টোবৰত গৃহ মন্ত্ৰালয়লৈ এখনি পত্ৰ প্ৰেৰণ কৰে। পত্ৰখনিত তেওঁ লিখে যে মিজোৰাম ৰাজ্য গঠন কৰাৰ পাছৰ পৰা ভাৰত চৰকাৰে আজিলৈকে এনেধৰণে মিজো ভাষাৰ ওপৰত কোনো জ্ঞান নথকা বিষয়াক মুখ্য সচিব হিচাপে নিযুক্তি দিয়া নাই।
তেনে পৰিস্থিতিত, ৰেনু শৰ্মাই ৰাজ্যখনৰ মুখ্য সচিবৰ দায়িত্ব ল’বলৈ যোগ্য আৰু কাৰ্যকৰী নহয় বুলি মুখ্যমন্ত্ৰীগৰাকীয়ে পত্ৰখনিত লিখে।
আমোদজনকভাৱে, মিজোৰাম চৰকাৰেও উক্তদিনাই আন এজন বিষয়াক মুখ্য সচিব হিচাপে দায়িত্ব ল’বলৈ নিৰ্দেশ দিয়ে। জে চি ৰামথাংগা নামৰ উক্ত বিষয়াজনে ৰাজ্যখনৰ অতিৰিক্ত মুখ্য সচিব হিচাপে কৰ্মৰত আছিল।
যোৱা ১ নৱেম্বৰৰ পৰা দুয়োজন বিষয়াই দায়িত্ব গ্ৰহণ কৰিছে। ফলস্বৰূপে বৰ্তমান ৰাজ্যখনত দুজনকৈ মুখ্য সচিবই দায়িত্বগ্ৰহণ কৰিছে।
উল্লেখযোগ্য যে জোৰামথাংগাৰ দল মিজো নেচনেল ফ্ৰণ্ট বৰ্তমান বিজেপিৰ নেতৃত্বত এনডিএৰ অংশীদাৰ হৈ আছে। পত্ৰখনিত জোৰামথাংগাই এই বিষয়েও উনুকিয়ায়।
তেওঁ কয় যে যিহেতু তেওঁ এনডিএৰ অংশীদাৰ, তেনে পৰিস্থিতিত কেন্দ্ৰীয় চৰকাৰৰ এই সিদ্ধান্তৰ ফলত ৰাজ্যখনৰ বিৰোধী দল কংগ্ৰেছে তেওঁক হাঁহিয়াতৰ পাত্ৰ কৰিব তুলিব।
