প্ৰেৰণাদায়ক অভিভাৱকঃ ছৰফৰাজৰ পিতৃলৈ ‘থাৰ’ উপহাৰ আনন্দ মহিন্দ্ৰাৰ
ইংলেণ্ডৰ বিপক্ষে চলিত ৰাজকোট টেষ্টত কালি ভাৰতীয় দলৰ হৈ অভিষেক ঘটিল যুৱ তাৰকা ছৰফৰাজ খানৰ। শেহতীয়া দুই-তিনিটা ছিজনত দুৰন্ত প্ৰদৰ্শনেৰে সুযোগৰ সন্ধানত থকা ছৰফৰাজে কালিৰ সুযোগ কাৰ্যকৰী কৰি ৬২ ৰাণৰ এক প্ৰশংসনীয় ইনিংছ খেলে।
উদীয়মান তাৰকাগৰাকীয়ে নিজৰ ইনিংছ দীঘলীয়া কৰাৰ সম্ভাৱনা গঢ়ি তুলিছিল যদিও ক্ৰীজত তেওঁৰ লগত বেটিং কৰি থকা ৰবীন্দ্ৰ জাদেজাৰ এটি ভুলৰ বাবে দুৰ্ভাগ্যৱশতঃ ৰাণ আউট হয় ছৰফৰাজ। অৱশ্যে ৬২ ৰাণৰ ইনিংছটোৰেই তেওঁ ক্ৰিকেট বিশ্বত প্ৰশংসা বুটলিছে।
ভাৰতীয় দলৰ হৈ অভিষেকৰ মুহূৰ্তত কালি ছৰফৰাজক প্ৰাক্তন ভাৰতীয় ক্ৰিকেটাৰ অনিল কুম্বলেই ভাৰতীয় দলৰ কেপ প্ৰদান কৰে। এই ক্ষণত আৱেগত উঠলি উঠে ষ্টেডিয়ামত উপস্থিত থকা ছৰফৰাজৰ পিতৃ নৌছাদ খান। পুত্ৰৰ সাফল্যত গৌৰৱান্বিত নৌছাদ খানৰ সেমেকি উঠে দুচকু।
উল্লেখ্য যে, ছৰফৰাজৰ এই ক্ৰিকেটীয় যাত্ৰাত পিতৃ নৌছাদ খানৰ আছে গুৰুত্বপূৰ্ণ ভূমিকা। পিতৃ নৌছাদৰ ভাৰতীয় দলৰ হৈ খেলাৰ স্বপ্ন আছিল যদিও সেয়া বাস্তৱায়িত কৰাত তেওঁ ব্যৰ্থ হৈছিল আৰু পুত্ৰৰ দ্বাৰাই এই আশাক সাকাৰ ৰূপ দিয়াৰ চেষ্টাত ব্ৰতী হৈছিল নৌছাদ খান।
সেই অনুসৰি তেওঁ দুই পুত্ৰ ছৰফৰাজ আৰু মুছিৰক গঢ়ি তুলিছিল আন্তঃৰাষ্ট্ৰীয় পৰ্যায়ত নিজকে প্ৰমাণ কৰিব পৰাকৈ যোগ্যৱান। কালি বৰপুত্ৰ ছৰফৰাজে ভাৰতীয় দলৰ হৈ অভিষেক ঘটোৱাৰ বিপৰীতে কনিষ্ঠ পুত্ৰ মুছিৰেও সদ্যসমাপ্ত ১৯ অনুৰ্ধ বিশ্বকাপত ভাৰতীয় দলক প্ৰতিনিধিত্ব কৰি সকলোৰে দৃষ্টি আকৰ্ষণ কৰে।
দুই পুত্ৰৰ সাফল্যত ছাঁৰ দৰে থকা পিতৃ নৌছাদ খানে সেয়ে স্বাভাৱিকতেই লাভ কৰিছে সকলোৰে সন্মান। তাৰ মাজতে আজি দেশৰ প্ৰখ্যাত উদ্যোগপতি আনন্দ মহিন্দ্ৰাই নৌছাদ খানৰ এনে প্ৰেৰণাদায়ক অভিভাৱকৰ ভূমিকাত মুগ্ধ হৈ এখন নতুন ‘থাৰ’ বাহন উপহাৰ দিয়াৰ ইচ্ছা প্ৰকাশ কৰে।
আজি এক টুইট যোগে মহিন্দ্ৰাই এই বিষয়ে সদৰী কৰি নৌছাদ খানে এই উপহাৰ গ্ৰহণ কৰিলে তেওঁৰ বাবে এয়া অত্যন্ত সৌভাগ্য আৰু সন্মানৰ কথা হ’ব বুলি উল্লেখ কৰে। কঠোৰ পৰিশ্ৰম, সাহস, ধৈৰ্যৰ গুণতকৈ এজন পিতৃয়ে সন্তানক প্ৰেৰণা যোগাব পৰা উত্তম গুণ কি হ’ব পাৰে বুলি প্ৰশংসা কৰে মহিন্দ্ৰাই।
“Himmat nahin chodna, bas!”
Hard work. Courage. Patience.
What better qualities than those for a father to inspire in a child?
For being an inspirational parent, it would be my privilege & honour if Naushad Khan would accept the gift of a Thar. pic.twitter.com/fnWkoJD6Dp
— anand mahindra (@anandmahindra) February 16, 2024