গুৰুগ্ৰামত এনকাউণ্টাৰত নিহত হৈছে চাৰিজন দুস্কৃতিকাৰী। নিহত আটাইকেইজনেই এটা গেংষ্টাৰ গোটৰ সদস্য। গুৰুগ্ৰামৰ সুশান্ত লোক ফেজ-২ এলেকাত এই এনকাউণ্টাৰত ক্ৰাইম ব্ৰাঞ্চৰ তিনিজন আৰক্ষীও আহত হয়। গেংষ্টাৰ গোটৰ এজন সদস্য গুলীবিদ্ধ হৈছে বুলিও আৰক্ষীয়ে জানিবলৈ দিয়ে।
গুৰুগ্ৰাম আৰক্ষী আয়ুক্তগৰাকীয়ে কয় যে সকলো দুস্কৃতিকাৰী গেংষ্টাৰ দীপক নন্দলৰ সহযোগী শ্বুটাৰ। বৰ্তমান বিদেশৰ পৰা দীপকে তেওঁৰ অপৰাধমূলক কামকাজ চলাই আছে। চাৰিজনৰ মৃতদেহৰ উপৰিও পাঁচটা অটোমেটিক আগ্নেয়াস্ত্ৰও উদ্ধাৰ কৰা হৈছে বুলি তেওঁ জানিবলৈ দিয়ে।
গুৰুগ্ৰামৰ সহকাৰী আৰক্ষী আয়ুক্ত ধৰমবীৰ সিঙে জানিবলৈ দিয়া মতে, এখন বাহনত অস্ত্ৰধাৰী লোকৰ সন্দেহজনকভাৱে চলাচল কৰাৰ তথ্য আৰক্ষী নিয়ন্ত্ৰণ কক্ষৰ পৰা ক্ৰাইম ব্ৰাঞ্চে লাভ কৰে।
ক্ৰাইম ব্ৰাঞ্চৰ দলটোৱে সুশান্ত লোক অঞ্চল পোৱাৰ ঠিক আগতেই দুষ্কৃতিকাৰীসকলে অত্যাধুনিক আগ্নেয়াস্ত্ৰ ব্যৱহাৰ কৰি এজন ব্যৱসায়ীৰ ঘৰত গুলীচালনা আৰম্ভ কৰে। ইয়াৰ পিছত আৰক্ষীৰ ওপৰতো তেওঁলোকে গুলীচালনা আৰম্ভ কৰে। সেই সংঘৰ্ষত চাৰিটা দুষ্কৃতিকাৰী নিহত হয়।
আৰক্ষীয়ে জনোৱা মতে, তালৈ যোৱাৰ পিছত ক্ৰাইম ব্ৰাঞ্চৰ বিষয়াসকলে দুষ্কৃতিকাৰীক সকীয়াই দিয়ে। তেওঁলোকক আত্মসমৰ্পণ কৰিবলৈও কোৱা হৈছিল। কিন্তু তেওঁলোকে আৰক্ষীৰ ওপৰত গুলীচালনা কৰি পলাবলৈ চেষ্টা কৰে।
ইয়াৰ পিছত ক্ৰাইম ব্ৰাঞ্চৰ বিষয়াসকলে আত্মৰক্ষাৰ বাবে আৰু তেওঁলোকক কৰায়ত্ত কৰিবলৈ গুলীচালনা কৰে। ইয়াত দুষ্কৃতিকাৰী গোটৰ পাঁচজন গুলীয়াই গুলীবিদ্ধ হয়। চিকিৎসালয়লৈ অনাৰ পিছত চিকিৎসকে চাৰিজনক মৃত ঘোষণা কৰে। গোটটোৰ আন এজন সদস্য এতিয়াও চিকিৎসাধীন হৈ আছে।
এই ঘটনাত তিনিজন আৰক্ষী জোৱানো গুলীবিদ্ধ হয়। তেওঁলোকো বৰ্তমান চিকিৎসাধীন হৈ আছে বুলি বিষয়াসকলে জানিবলৈ দিয়ে।
জানিব পৰা মতে, সুশান্ত লোক অঞ্চলৰ বাসিন্দা ব্যৱসায়ীজনক কেইবাবাৰো বিদেশত থকা গেংষ্টাৰৰ পৰা ভাবুকিমূলক ফোন আহিছিল। তেওঁক বিপুল পৰিমাণৰ ধন দাবী কৰি ফোন কৰা হৈছিল। সূত্ৰসমূহে জনোৱা মতে, ব্যৱসায়ীজনক দাবী কৰা ধন নিদিলে ভয়াৱহ পৰিণতিৰ সন্মুখীন হ’ব বুলি ভাবুকিও দিয়া হৈছিল।
