ম্যানমাৰত চৰকাৰী সেনাই আজি অসামৰিক লোকৰ ওপৰত এক ভয়ংকৰ আক্ৰমণ ঘটায়। সামৰিক প্ৰশাসনৰ হেলিকপ্টাৰে উত্তৰ-মধ্য ম্যানমাৰৰ এখন বিদ্যালয় আৰু গাঁৱত আক্ৰমণ চলায়। ফলত সাতটা শিশুসহ কমেও ১৩ জন লোক নিহত হৈছে। বিদ্যালয়ৰ সৈতে জৰিত এজন ব্যক্তিয়ে সংবাদ মাধ্যমৰ আগত এই আক্ৰমণৰ কথা প্ৰকাশ কৰিছে। উল্লেখ্য দেশ খনত গণতন্ত্ৰকামী বিদ্ৰোহী আৰু তেওঁলোকৰ মিত্ৰশক্তিৰ ওপৰত সামৰিক চৰকাৰৰ সেনাই আক্ৰমণ অব্যাহত ৰাখিছে।
এই আক্ৰমণত এতিয়ালৈকে বহু অসামৰিক লোকৰ মৃত্যু ঘটিছে। অৱশ্যে শেহতীয়াকৈ চাগাইং অঞ্চলৰ টাবায়িনত হোৱা বিমান আক্ৰমণত নিহত হোৱা শিশুৰ সংখ্যা যোৱা বছৰ ফেব্ৰুৱাৰীত সেনাই ক্ষমতা দখল কৰাৰ পিছত সৰ্বাধিক হোৱা দেখা গৈছিল। চলিত মাহত ইউনিচেফে প্ৰকাশ কৰা এক প্ৰতিবেদন অনুসৰি ম্যানমাৰত গাওঁ জ্বলোৱাৰ ঘটনা ইমনেই বৃদ্ধি পাইছে যে আধা নিযুতৰো অধিক লোক স্থানচ্যুত হৈ পৰিছে।
শুক্ৰবাৰে হোৱা আক্ৰমণটো দেশৰ দ্বিতীয় বৃহত্তম চহৰ মান্দালয়ৰ পৰা প্ৰায় ১১০ কিলোমিটাৰ (৭০ মাইল) উত্তৰ-পশ্চিমত থকা তাবায়িনৰ লেট ইয়েট কোনে গাঁৱত সংঘটিত হৈছে। সেই অঞ্চলক ডেপাইন বুলিও জনা যায়। বিদ্যালয়ৰ প্ৰশাসক মাৰ মাৰে কয় যে তেওঁ ছাত্ৰ-ছাত্ৰীসকলক তলৰ মহলাৰ শ্ৰেণীকোঠাত সুৰক্ষিত ভাৱে লুকুৱাই ৰাখিবলৈ চেষ্টা কৰিছিল।
গাওঁখনৰ উত্তৰে আকাশত চাৰিখন এমআই-৩৫ হেলিকপ্টাৰ উৰি আছিল। দুখনে গাওঁখনৰ বৌদ্ধ মঠৰ চৌহদত অৱস্থিত বিদ্যালয়খনত আক্ৰমণ চলাইছিল। হেলিকপ্টাৰৰ পৰা মেচিনগানেৰে ধাৰাসাৰ গুলীবৰ্ষণ কৰা হৈছিল।
যোৱা বছৰ সেনাই ম্যানমাৰৰ ক্ষমতা দখল কৰাৰ পিছত নিৰাপত্তা বাহিনীয়ে কমেও ২,২৯৮ জন নাগৰিকক হত্যা কৰিছে। ৰাষ্ট্ৰসংঘই অভ্যুত্থানৰ পিছত বিদ্যালয় আৰু শিক্ষা কৰ্মীৰ ওপৰত ২৬০ টা আক্ৰমণৰ ঘটনা ঘটা বুলি প্ৰকাশ কৰিছে।
