পৃথিৱীত কেতিয়া ক’ত কেনে আশ্চৰ্যকৰ ঘটনা ঘটে তাৰ যেন কোনো লেখ-জোখ নোহোৱা হৈ পৰিছে।
কিছুদিন পূৰ্বে সাগৰীয় ধুমুহাৰ পিছত তামিলনাডুৰ সমুদ্ৰ তীৰত সোণ-ৰূপৰ টুকুৰা উদ্ধাৰ হোৱাৰ পিছত এইবাৰ সাগৰৰ ঢৌত উটি আহিছে ৰেডিমেড সোণ-ৰূপৰ গহণা।
কথাষাৰ বিশ্বাস কৰিবলৈ টান যেন লাগিছে যদিও ভেনিজুৱেলাৰ সাগৰৰ পাৰত অৱস্থিত গুৱাকাৰ নামৰ গাঁও খনৰ বহুলোকে সাগৰত উটি অহা সোণ-ৰূপৰ গহণা লাভ কৰিবলৈ সক্ষম হৈছে।
আচৰিত কথাটো হ’ল সাগৰত যিবোৰ গহণা উটি আহিছে তাত আকৌ খোদিত কৰা আছে যীশুখ্ৰীষ্ট অথবা মেৰীৰ ছবি।
বৰদিনৰ পূৰ্বে এনেদৰে সাগৰত যীশুখ্ৰীষ্ট অথবা মেৰীৰ ছবি খোদিত গহণা উটি অহাৰ কথাই বহুতকে কৌতূহলী কৰি তুলিছে।
ভেনিজুৱেলাৰ সাগৰৰ পাৰত অৱস্থিত গুৱাকাৰ নামৰ গাঁও খনৰ বাসিন্দা য়েলমেন লাৰেছা নামৰ লোক জনে প্ৰথমে সাগৰত উটি অহা গহণা পোৱাৰ পিছতে কথাটো বনজুইৰ দৰে বিয়পি পৰে।
লগে লগে সাগৰত উটি অহা গহণা পোৱাৰ আশাত গাঁও খনৰ লগতে কাষৰীয়া অঞ্চলৰ ২ হাজাৰৰো অধিক লোকে এতিয়া সাগৰৰ পাৰত ভিৰ কৰা পৰিলক্ষিত হৈছে।
তেওঁলোকৰ মাজৰে বহুতইে এনে গহণা লাভ কৰিবলৈ সক্ষম হোৱা বুলি জানিব পৰা গৈছে।
বহুতে সেই গহণা বজাৰত বিক্ৰী কৰি ধন ঘটাও দেখা গৈছে। কিন্তু কিদৰে সাগৰত সোণ-ৰূপৰ গহণা উটি আহিল তাৰ ৰহস্যহে ভেদ কৰিব পৰা নাই কোনেও।
