ৰাষ্ট্ৰীয় সেউজ ন্যায়াধিকৰণৰ নিৰ্দেশ পালন কৰি নাগালেণ্ড চৰকাৰে দিপাৱলীৰ সময়ত ৰাজ্যখনত ফটকাৰ ব্যৱহাৰ আৰু বিক্ৰী বন্ধ কৰিছে।
নাগালেণ্ড চৰকাৰে এক নিৰ্দেশনা যোগে ২০২১ বৰ্ষৰ ৩১ জানুৱাৰি পৰ্যন্ত ৰাজ্যখনত ফটকাৰ ব্যৱহাৰ আৰু বিক্ৰী নিষিদ্ধ কৰিছে।
‘‘কোভিডৰ সংক্ৰমণৰ সময়ত ফটকা ফুটোৱাৰ ফলত হ’ব পৰা ক্ষতিৰ প্ৰতি লক্ষ্য ৰাখি ৰাজ্য চৰকাৰে নাগালেণ্ডৰ সকলো প্ৰান্ততে ১০ নৱেম্বৰ ২০২০ৰ পৰা ৩১ জানুৱাৰি ২০২১ পৰ্যন্ত ফটকাৰ বিক্ৰী আৰু ব্যৱহাৰ নিষিদ্ধ কৰিছে,’’ নিৰ্দেশনাত ৰাজ্যখনৰ মুখ্য সচিৱ জে আলমে এইদৰে উল্লেখ কৰে।
২০০৫ চনৰ দুৰ্যোগ প্ৰশমন আইনৰ ২২(২) ধাৰাৰ অধীনত নাগালেণ্ডত ফটকাৰ বিক্ৰী আৰু ব্যৱহাৰ নিষিদ্ধ কৰা হৈছে।
উল্লেখযোগ্য যে, দেশত ক’ৰ’নাৰ আক্ৰান্ত ৰোগী সকলৰ স্বাস্থ্যৰ প্ৰতি লক্ষ্য ৰাখি ৰাষ্ট্ৰীয় সেউজ ন্যায়াধিকৰণে বিভিন্ন ৰাজ্যক দিপাৱলীৰ সময়ত ফটকাৰ ব্যৱহাৰ নকৰিবলৈ নিৰ্দেশ দিছিল।
দিল্লী, ৰাজস্থান, ওড়িশা, মহাৰাষ্ট্ৰৰ লগতে ভালেকেইখন ৰাজ্যই সেউজ ন্যায়াধিকৰণৰ নিৰ্দেশ পালন কৰি নিজ নিজ ৰাজ্যত ফটকাৰ ব্যৱহাৰ আৰু বিক্ৰী নিষিদ্ধ কৰিছিল।
