নগাওঁ সত্ৰ ন্যায়াধীশৰ আদালতে ধিং সমষ্টিৰ এ আই ইউ ডি এফ বিধায়ক আমিনুল ইছলামৰ জামিন আবেদন বৃহস্পতিবাৰে নাকচ কৰিছে।
ইছলামে এক অডিঅ’ বাৰ্তাত কৰ’নাভাইৰাছৰ বাবে স্থাপন কৰা আইছ’লেশ্যন কক্ষ আৰু চিকিৎসাক লৈ আপত্তিজনক মন্তব্য কৰিছিল।
আমিনুল ইছলামৰ হৈ বুধবাৰে অধিবক্তা আবুল হুছেইন খণ্ডকাৰে নগাওঁ সত্ৰ ন্যায়াধীশ আদালতত জামিন আবেদন দাখিল কৰিছিল।
জামিনৰ পৰিৱৰ্তে আদালতে ইছলামক ১৪ দিনৰ বাবে কাৰাগাৰৰ ভিতৰতে কুৱাৰেণ্টাইন কৰি ৰাখিবৰ বাবে নিৰ্দেশ দিছে।
জানিব পৰা মতে এই গোচৰৰ পৰৱৰ্তী শুনানি অনুষ্ঠিত হ’ব অহা ১৮ এপ্ৰিলত।
উল্লেখযোগ্য যে, যোৱা ৭ এপ্ৰিলৰ দিনা পুৱা আমিনুল ইছলামক নগাওঁ সদৰ আৰক্ষীয়ে গ্ৰেপ্তাৰ কৰিছিল।
উক্ত দিনাই নগাওঁ জিলা মুখ্য ন্যায়িক দণ্ডাধীশৰ আদালতে ১৪ দিনৰ বাবে তেওঁক ন্যায়িক জিম্মালৈ প্ৰেৰণ কৰিছিল।
আমিনুল ইছলামৰ বিৰুদ্ধে নগাওঁ আৰক্ষীয়ে ৮৭৭/ ২০২০ নম্বৰত ভাৰতীয় দণ্ডবিধিৰ ১২০ বি/১৫৩(এ)/১২৪(এ)/২৯৫(এ) গোচৰ ৰুজু কৰিছিল।
কুৱাৱাৰেণ্টাইন চেণ্টাৰক ডিটেনশ্যন চেণ্টাৰতকৈও ভয়াৱহ আৰু ৰোগীসকলক বেজী দি মৃত্যুৰ ষড়যন্ত্ৰ কৰিছে বুলি ইছলামে অ’ডিঅ’ বাৰ্তাটোত মন্তব্য কৰিছিল।
বিধায়ক গৰাকীৰ মন্তব্যই ৰাজ্যখনৰ ইছলামধৰ্মী লোকক বিপথে পৰিচালিত কৰাৰ অভিযোগ উঠিছিল।