লখিমপুৰ জিলাৰ অসম-অৰুণাচল প্ৰদেশ সীমান্তৱৰ্তী নাওবৈচাৰ গেলাবিলত শ শ গাঁৱবাসীয়ে ৰঙা সংৰক্ষিত বনাঞ্চলৰ সংৰক্ষণমুক্ত (ডি-ৰিজাৰ্ভ) এলেকাত ভূমি পট্টা প্ৰদানৰ দাবীৰে এক উত্তাল প্ৰতিবাদ সাব্যস্ত কৰে।
গেলাবিল হাইস্কুলৰ খেলপথাৰত আয়োজিত এই দুঘণ্টীয়া অৱস্থান ধৰ্মঘট কাৰ্যসূচী ৰঙা ডি-ৰিজাৰ্ভ উন্নয়ন সমিতি, টাকাম মিচিং পৰিন কেবাং (TMPK), সদৌ অসম গোৰ্খা ছাত্ৰ সন্থা (AAGSU) আৰু সদৌ অসম আদিবাসী ছাত্ৰ সন্থাৰ (AASAA) যুটীয়া উদ্যোগত ৰূপায়ণ কৰা হয়। কাৰ্যসূচীত অংশগ্ৰহণ কৰা প্ৰতিবাদকাৰীসকলে হাতত বিভিন্ন দাবী সম্বলিত প্লেকাৰ্ড লৈ চৰকাৰৰ বিৰুদ্ধে শ্লোগান দি সমগ্ৰ পৰিৱেশ উত্তাল কৰি তোলে।
সংবাদ মাধ্যমৰ আগত প্ৰতিবাদকাৰী গাঁৱবাসীৰ নেতা বাবুল তায়েঙে কয় যে ১৯৬০ চনৰ শেষৰ ফালৰ পৰাই লোকসকলে ৰঙা সংৰক্ষিত বনাঞ্চলৰ সমীপৰ অঞ্চলসমূহত বসবাস কৰিবলৈ আৰম্ভ কৰিছিল আৰু তেতিয়াৰ পৰাই মাটিৰ খাজনা দি আহিছিল। আনহাতে, আন এজন প্ৰতিবাদকাৰীয়ে উল্লেখ কৰে যে ১৯৭২ চনত ৰঙা সংৰক্ষিত বনাঞ্চলৰ একাংশ সংৰক্ষণমুক্ত কৰি চৰকাৰে তেওঁলোকক ৰাজহ গাঁৱত ভূমি পট্টা প্ৰদান কৰি সংস্থাপিত কৰিছিল। কিন্তু শেহতীয়াকৈ ৰাজ্যৰ ৰাজহ বিভাগে প্ৰৱৰ্তন কৰা অনলাইন ব্যৱস্থাৰ জৰিয়তে তেওঁলোকে ভূমিৰ খাজনা আদায় দিবলৈ গৈ চূড়ান্ত অসুবিধাৰ সন্মুখীন হৈছে।
জানিব পৰা মতে, সংৰক্ষণমুক্ত এই অঞ্চলটোত মলোৱাল, আচোৱাল, বৈষ্ণৱপুৰ, দহঘৰীয়া আৰু তিলেশ্বৰী আদি গাঁও অন্তৰ্ভুক্ত, য’ত প্ৰায় ৪৫০খন ঘৰত দুহেজাৰতকৈ অধিক লোকে বসবাস কৰে। স্থানীয় ৰাইজে তেওঁলোকৰ ভূমি পট্টা বাতিল কৰাক লৈ ক্ষোভ প্ৰকাশ কৰাৰ লগতে ৰাজহ বিভাগৰ অনলাইন পৰ্টেলত ভূমিৰ মালিকীস্বত্বৰ তথ্য শীঘ্ৰে ঘূৰাই অনাৰ দাবী জনায়।পৰিস্থিতিৰ বুজ ল’বলৈ ঘটনাস্থলীত বিহপুৰীয়া ৰাজহ চক্ৰৰ চক্ৰ বিষয়া জয়প্ৰকাশ মহন্ত উপস্থিত হয়। প্ৰতিবাদকাৰী গাঁৱবাসীয়ে চক্ৰ বিষয়াগৰাকীৰ জৰিয়তে ৰাজ্য চৰকাৰলৈ নিজৰ দাবীসমূহ সম্বলিত এখন স্মাৰকপত্ৰ প্ৰদান কৰে।
