গাজাত চলি থকা যুদ্ধৰ অন্ত পেলাবলৈ বিশ্ব সম্প্ৰদায়ে নতুন পদক্ষেপ হাতত লৈছে। সেই লক্ষ্যৰে ইজিপ্তৰ শ্বাৰম এল শ্বেখ চহৰত আয়োজন কৰিবলৈ ওলাইছে ‘গাজা শান্তি সন্মিলন’। এই সন্মিলনৰ যুটীয়া সভাপতি হ’ব আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু ইজিপ্তৰ ৰাষ্ট্ৰপতি আব্দেল ফাত্তাহ এল-চিছি।
সূত্ৰ অনুসৰি ভাৰতৰ প্ৰধানমন্ত্ৰী নৰেন্দ্ৰ মোদীক আনুষ্ঠানিকভাৱে এই শীৰ্ষ সন্মিলনলৈ আমন্ত্ৰণ জনোৱা হৈছে। অৱশ্যে মোদী নিজে এই সন্মিলনত উপস্থিত থাকিব নোৱাৰিব। প্ৰধানমন্ত্ৰীৰ মোদীক প্ৰতিনিধিত্ব কৰিব গৃহ ৰাজ্য মন্ত্ৰী কীৰ্তি বৰ্ধন সিঙে। এই খবৰ ভাৰতৰ বৈদেশিক পৰিক্ৰমা মন্ত্ৰালয়ে নিশ্চিত কৰিছে।
এই সন্মিলনত ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছ, ব্ৰিটিছ প্ৰধানমন্ত্ৰী কেইৰ ষ্টাৰমাৰ, ইটালীৰ প্ৰধানমন্ত্ৰী জৰ্জিয়া মেল’নি, স্পেইনৰ প্ৰধানমন্ত্ৰী পেড্ৰ’ ছানচেজ আৰু ফ্ৰান্সৰ ৰাষ্ট্ৰপতি ইমানুৱেল মেক্ৰনকে ধৰি বিশ্বৰ ২০খনতকৈও অধিক দেশৰ ৰাষ্ট্ৰপতিসকলে অংশগ্ৰহণ কৰিব।
এই সন্মিলনৰ মূল লক্ষ্য হৈছে আৰব বিশ্বত স্থায়ী শান্তি প্ৰতিষ্ঠা কৰা। বিশ্লেষকসকলৰ মতে ইজৰাইল-হামাছৰ যুদ্ধবিৰতিৰ পাছত শান্তি প্ৰক্ৰিয়াৰ দিশত এয়া এক বৃহৎ পদক্ষেপ। ইতিমধ্যে ইজৰাইলে সৈন্য আংশিকভাৱে প্ৰত্যাহাৰ কৰিবলৈ আৰম্ভ কৰিছে, যাৰ ফলত বহু স্থানচ্যুত পেলেষ্টাইনী পৰিয়াল ধ্বংসস্তুপত পৰিণত হোৱা নিজৰ ঠাইলৈ উভতি যাবলৈ সক্ষম হৈছে।
অৱশ্যে শান্তি প্ৰতিষ্ঠাৰ প্ৰত্যাহ্বানবোৰ সৰু নহয়। শান্তি চুক্তিৰ আনুষ্ঠানিক চুক্তি স্বাক্ষৰ অনুষ্ঠানত অংশগ্ৰহণ নকৰাৰ কথা ঘোষণা কৰিছে হামাছে। বিশেষকৈ নিৰস্ত্ৰকৰণ সন্দৰ্ভত ট্ৰাম্পৰ পৰিকল্পনাৰ কেইবাটাও বিধানৰ ওপৰত হামাছৰ আপত্তি আছে। হামাছৰ এজন শীৰ্ষ নেতাই কয় যে গাজাবাসীক স্থানচ্যুত কৰা প্ৰস্তাৱ হাস্যকৰ আৰু অগ্ৰহণযোগ্য।
উল্লেখ্য যে, ২০২৩ চনৰ ৭ অক্টোবৰত হামাছৰ আকস্মিক আক্ৰমণৰ পাছত ইজৰাইলৰ প্ৰতি আক্ৰমণৰ জৰিয়তে আৰম্ভ হোৱা যুদ্ধৰ প্ৰায় দুবছৰৰ পাছত প্ৰথমবাৰৰ বাবে শান্তিৰ আভাস দিছে। শান্তি চুক্তিৰ প্ৰথম পৰ্যায়ত ইজৰাইলে ২৫০ জন বন্দীক মুকলি কৰি দিবলৈ সন্মত হয়, তাৰ বিনিময়ত হামাছে ৪৭ জন ইজৰাইলী পণবন্দীক মুকলি কৰি দিয়ে।
চুক্তিখন কাৰ্যকৰী কৰিবলৈ বহুজাতিক নিৰাপত্তাৰক্ষী বাহিনী গঠন কৰা হ’ব। আমেৰিকাৰ নেতৃত্বত এই গোটত ইজিপ্ত, কাটাৰ, তুৰস্ক আৰু সংযুক্ত আৰব আমিৰশ্বাহী অন্তৰ্ভুক্ত হ’ব।
কিন্তু বিশ্লেষকসকলৰ মতে গাজাত স্থায়ী শান্তি এতিয়াও অনিশ্চিত। বৰ্তমানেও নিৰস্ত্ৰকৰণ, ৰাজনৈতিক নিয়ন্ত্ৰণ আৰু প্ৰশাসনিক ব্যৱস্থাক লৈ মতানৈক্য অব্যাহত আছে। অৱশ্যে এই সন্মিলনে আৰব বিশ্বৰ ইতিহাসত শান্তিৰ এক নতুন অধ্যায় মুকলি কৰিব পাৰিব বুলি আন্তৰ্জাতিক সমাজে আশা ব্যক্ত কৰিছে।
