এইবাৰৰ বাবে আই চি চি বিশ্বকাপৰ যাত্ৰা অন্ত পৰিছে আফগানিস্তানৰ। ইয়াৰ পূৰ্বে দলটোৰ যুৱ পেচাৰগৰাকীয়ে বিশ্বকাপ শেষ হোৱাৰ পিছত এদিনীয়া আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ কথা পূৰ্বেই জনাইছিল। এইবাৰ তেওঁ সেইটোৱেই কৰিলে। আফগানিস্তানৰ পেচাৰ নবীন উল হকে গ্ৰুপ পৰ্যায়ৰ অন্তিমখন মেচত দক্ষিণ আফ্ৰিকাৰ হাতত পৰাস্ত হোৱাৰ পিছত এদিনীয়াৰ পৰা অৱসৰ লোৱাৰ কথা ঘোষণা কৰিছে। ছ’চিয়েল মিডিয়া চাইটত আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ কথা ঘোষণা কৰে নবীনে।
সোঁহতীয়া পেচাৰগৰাকীয়ে ঘোষণা কৰিছিল যে তেওঁ বিশ্বকাপৰ পিছত এদিনীয়া খেলৰ পৰা অৱসৰ গ্ৰহণ কৰি নিজৰ কেৰিয়াৰ দীঘলীয়া কৰিব।
তেওঁ কৈছিল, ‘মোৰ দেশক প্ৰতিনিধিত্ব কৰাটো এক বিশেষ সন্মান আৰু মই এই বিশ্বকাপৰ শেষত এদিনীয়া ফৰ্মেটৰ পৰা অৱসৰ লোৱাৰ কথা ঘোষণা কৰিব বিচাৰিছো আৰু মোৰ দেশৰ হৈ টী-২০ ক্ৰিকেটত এই নীলা জাৰ্চি পিন্ধি থাকিম। এইটো সিদ্ধান্ত লোৱাটো সহজ হোৱা নাই যদিও মোৰ খেলৰ কেৰিয়াৰ দীঘলীয়া কৰিবলৈ মই এই কঠিন সিদ্ধান্ত ল’বলগীয়া হৈছে। আফগানিস্তান ক্ৰিকেট ব’ৰ্ড আৰু মোৰ সকলো অনুৰাগীক তেওঁলোকৰ সমৰ্থন আৰু অদম্য মৰমৰ বাবে ধন্যবাদ জনাইছো।’
ইয়াৰ উপৰি নবীনে আফগানিস্তানক প্ৰতিনিধিত্ব কৰি ২৭ খন টী-২০ মেচত ৩৪ টা উইকেট দখল কৰিছে। আই পি এল, এল পি এল, বি বি এল আৰু পি এছ এলত অংশগ্ৰহণ কৰি বিশ্বৰ কেইবাখনো ফ্ৰেঞ্চাইজি লীগতো নিয়মীয়াকৈ খেলিছে।
অন্তিমখন এদিনীয়া মেচত নবীনে ৬.৩ অভাৰত ৫২ ৰান দি কোনো উইকেট ল’ব নোৱাৰিলে। দক্ষিণ আফ্ৰিকাই ৫ উইকেট আৰু ১৫টা বল বাকী থকা অৱস্থাত আফগানিস্তানৰ ২৪৫ ৰানৰ লক্ষ্য অতিক্ৰম কৰে।
দক্ষিণ আফ্ৰিকাৰ বিৰুদ্ধে পৰাস্ত হোৱাৰ পিছতো আফগানিস্তানে নিশ্চিতভাৱে কিছুমান ডাঙৰ শক্তিৰ বিৰুদ্ধে নিজৰ প্ৰদৰ্শনৰ বাবে বহু গৌৰৱেৰে ঘৰলৈ ৰাওনা হ’ব। আফগানিস্তানে এইখন মনত ৰাখিবলগীয়া বিশ্বকাপ আছিল, প্ৰতিযোগিতাখনত তিনিটাকৈ পূৰ্বৰ বিশ্ব চেম্পিয়নৰ বিৰুদ্ধে জয়লাভকে ধৰি চাৰিটা জয় সাৱ্যস্ত কৰিছিল।
আফগানিস্তানে ইংলেণ্ড, পাকিস্তান, শ্ৰীলংকা আৰু নেদাৰলেণ্ডক পৰাস্ত কৰি বিশ্বকাপ ২০২৩ৰ পইণ্ট তালিকাত ষষ্ঠ স্থান দখল কৰাৰ লগতে ২০২৫ চনৰ চেম্পিয়নছ ট্ৰফীতো নিজৰ স্থান সুদৃঢ় কৰে।
