কোকৰাঝাৰ জিলাৰ পাটগাঁও আৰক্ষী চকীৰ অন্তৰ্গত ভূৰগাজা অঞ্চলত মঙলবাৰে নিশা সেনা আৰু আৰক্ষীয়ে যুটীয়া অভিযান চলাই এন ডি এফ বি (সংবিজিত)ৰ মিলন বসুমতাৰী নামৰ এগৰাকী দুৰ্ধৰ্ষ সদস্যক গ্ৰেপ্তাৰ কৰিবলৈ সক্ষম হয়।
আৰক্ষীয়ে প্ৰকাশ কৰা অনুসৰি গ্ৰেপ্তাৰ হোৱা উগ্ৰপন্থী সদস্য গৰাকীৰ ঘৰ কোকৰাঝাৰ জিলাৰ পাটগাঁৱৰ ৩ নং ভূৰাগাজাত।
উল্লেখযোগ্য যে, বিশেষ সূত্ৰৰ পৰা লাভ কৰা খবৰৰ ভিত্তিত মঙলবাৰে নিশা ভাৰতীয় সেনাৰ ১২ নং শিখলাই ৰেজিমেণ্ট আৰু আৰক্ষীয়ে যুটীয়াভাৱে অভিযান চলাই আৰু উগ্ৰপন্থী দলটোৰ সদস্যগৰাকীক গ্ৰেপ্তাৰ কৰিবলৈ সক্ষম হয়।
গ্ৰেপ্তাৰ হোৱা সদস্যগৰাকীৰ পৰা পাঁচজাই সজীৱ গুলী, বিশেষ সা-সামগ্ৰী আৰু বহুতো আপত্তিজনক নথিপত্ৰ জব্দ কৰা হয়।
আনহাতে, স্বাধীনতা দিৱসৰ পূৰ্বে কোকৰাঝাৰৰ লগতে ৰাজ্যৰ অন্যান্য প্ৰান্তত এন ডি এফ বি সদস্যৰ কূটাঘাত ৰোধ কৰাৰ বাবে অসম আৰক্ষী সষ্টম হৈ উঠিছে।
বৰ্তমান আটকাধীন এন ডি এফ বি সদস্যগৰাকীক আৰক্ষীৰ জিম্মাত তদন্তৰ বাবে ৰখা হৈছে। আৰক্ষীৰ তদন্তত অঞ্চলটোত উগ্ৰপন্থী সংগঠনটোৰ তৎপৰতাৰ বিষয়ে বহু গুৰুত্বপূৰ্ণ তথ্য পোহৰলৈ আহিব বুলি আশা কৰা হৈছে।
