২৬/১১ৰ মুম্বাই সন্ত্ৰাসবাদী আক্ৰমণত দোষী সাব্যস্ত হোৱা ফাহিম আৰ্ছাদ মহম্মদ ইউছুফ আনছাৰী নিজৰ পৰিয়াল পোহপাল দিবলৈ, কাম কৰাৰ অধিকাৰ সুনিশ্চিত কৰিবৰ বাবে কাষ চাপিছে বম্বে উচ্চ ন্যায়ালয়ৰ।
অটো চলাই পৰিয়ালটো পোহপাল দিব বিচাৰে আনছাৰীয়ে কিন্তু উগ্ৰপন্থীৰ সৈতে সম্পৰ্কৰ থকাৰ সন্দেহত আৰক্ষীয়ে তেওঁক ব্যৱসায়িকভাৱে অটো চলাবলৈ আৰক্ষীৰ ক্লিয়াৰেন্স চাৰ্টিফিকেট প্ৰদান কৰা নাই বুলি অভিযোগ উত্থাপন কৰিছে। তেওঁ আৰক্ষীৰ যুক্তি ন্যায়সংগত নহয় বুলি দাবী কৰিছে।
আনছাৰী গোচৰটো উচ্চ ন্যায়ালয়ৰ ন্যায়াধীশ ৰেৱতী মোহিত ডেৰে আৰু ন্যায়াধীশ নীলা গোখলেৰ বিচাৰপীঠে শুনানি গ্ৰহণ কৰাৰ কথা আছিল যদিও সূত্ৰ অনুসৰি সংমণ্ডল বিচাৰপীঠে গোচৰৰ পৰা আঁতৰি গৈছে। এতিয়া ন্যায়াধীশ সাৰং কোতৱালৰ বিচাৰপীঠে ১৮ মাৰ্চত আনছাৰীৰ গোচৰৰ শুনানি গ্ৰহণ কৰিব।
উল্লেখ যোগ্য যে ২০০৮ চনৰ ডিচেম্বৰ মাহত ২৬/১১ মুম্বাই আক্ৰমণৰ গোচৰৰ সৈতে জড়িত আনছাৰীক গ্ৰেপ্তাৰ কৰা হৈছিল। অৱশ্যে আনছাৰীক উত্তৰ প্ৰদেশৰ লক্ষ্ণৌত সুকীয়া গোচৰত গ্ৰেপ্তাৰ কৰা হৈছিল। আদালতে মুম্বাইৰ মানচিত্ৰ যোগান ধৰি আক্ৰমণৰ মাষ্টাৰমাইণ্ডসকলক সহায় কৰাৰ অভিযোগৰ কোনো ভিত্তি নথকাত ২০১০ চনৰ মে’ মাহত মুম্বাই আক্ৰমণৰ গোচৰত তেওঁক আদালতে দোষমুক্ত কৰিছিল।
২০১২ চনত উচ্চ ন্যায়ালয়ৰ ৰায়ক প্ৰত্যাহ্বান জনাই যেতিয়া চৰকাৰে উচ্চতম ন্যায়ালয়ৰ কাষ চাপিছিল, তেতিয়া চৰকাৰৰ আবেদন শীৰ্ষ ন্যায়ালয়ে খাৰিজ কৰিছিল। অৱশ্যে উত্তৰ প্ৰদেশৰ গোচৰত দোষী সাব্যস্ত হয় আনছাৰী। ২০১৯ চনত ১০ বছৰৰ কাৰাদণ্ড ভুগি কাৰাগাৰৰ পৰা মুক্তি পোৱাৰ পিছত তেওঁ প্ৰথমে ছপাশালত কাম কৰিছিল। কম দৰমহাত পৰিয়াল পোহপাল দিবলৈ অসুবিধা হোৱাত পিছলৈ আনছাৰীয়ে অটো চলাবলৈ সিদ্ধান্ত লয়।
জানিব পৰা মতে বিগত বছৰৰ জানুৱাৰীত আনছাৰীয়ে তিনিচকীয়া বাহন চলোৱাৰ অনুজ্ঞাপত্ৰও লাভ কৰিছিল। অৱশ্যে ব্যৱসায়িকভাৱে অটো চলাবলৈ বাধ্যতামূলক আৰক্ষীৰ ক্লিয়াৰেন্স পোৱাত সমস্যাৰ সন্মুখীন হয়। বিগত বছৰৰ মে’ মাহত তেওঁ ক্লিয়াৰেন্সৰ বাবে আবেদন কৰিছিল। কিন্তু আবেদন নাকচ কৰা হয়। এতিয়া তথ্যৰ অধিকাৰ আইনৰ অধীনত কাৰণ জানিব বিচাৰিছিল আনছাৰীয়ে। আৰ টি আই তথ্য অনুসৰি লস্কৰ-ই-তৈবাৰ সদস্য হোৱাৰ অভিযোগত তেওঁৰ আবেদন নাকচ কৰা হৈছে বুলি জ্ঞাত হয়। আনছাৰীয়ে এই অভিযোগ ভিত্তিহীন বুলি দাবী কৰিছে। সেয়েহে আৰক্ষীৰ ক্লিয়াৰেন্স লাভ কৰাৰ উদ্দেশ্যে উচ্চ ন্যায়ালয়ৰ কাষ চাপিছিল আনছাৰী।
