ৰাজনৈতিক ক্ষেত্ৰত খুজ পেলেইছে নেপালৰ ‘জেন-জি‘ (Gen Z)য়ে। শনিবাৰে নেপালৰ যুৱ সমাজে এটা নতুন ৰাজনৈতিক দল গঠন কৰাৰ ঘোষণা কৰিছে। যদিও নেপালত ‘জেন-জি‘য়ে ৰাজনৈতিক দল গঠন কৰিছে। ২০২৬ চনৰ মাৰ্চ মাহত অনুষ্ঠিত হ‘বলগীয়া নেপালৰ সাধাৰণ নিৰ্বাচনত দলটোৱে অংশগ্ৰহণ কৰিব নে নাই সেয়া এতিয়াও নিশ্চিত নহয়। যুৱসমাজৰ এই ঘোষণাই দেশখনৰ ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি কৰিছে।
উল্লেখ্য যে নেপালৰ ‘জেন-জি‘ আন্দোলন ইতিমধ্যে বিশ্বব্যাপী দৃষ্টি আকৰ্ষণ কৰিছে। যোৱা মাহত চৰকাৰী নিষেধাজ্ঞাৰ বিৰুদ্ধে বৃহৎ প্ৰতিবাদৰ জৰিয়তে নেপালৰ যুৱসমাজে নিজৰ শক্তি প্ৰদৰ্শন কৰিছিল। ফলত কে পি শৰ্মা অলি নেতৃত্বাধীন চৰকাৰ ভংগ হোৱাৰ পিছত নেপালৰ ৰাজনৈতিক দৃশ্যপট সলনি হৈ পৰিছিল। এতিয়া সেই আন্দোলনৰ নেতৃত্ব দিয়া গোটে ৰাজনৈতিক দল গঠনৰ দিশে আগবাঢ়িছে।
‘জেন-জি‘ আন্দোলনৰ অন্যতম নেতা মিৰাজ ধুংগনাৰ নেতৃত্বত অনুষ্ঠিত এক সংবাদমেলত এই ঘোষণা কৰে। যৱনেতাগৰাকীয়ে স্পষ্টভাৱে উল্লেখ কৰিছে যে নতুন দলটোৱে সাধাৰণ নিৰ্বাচনত অংশগ্ৰহণ কৰিব নে নাই সেয়া সম্পূৰ্ণৰূপে তৃণমূল পৰ্যায়ৰ দাবীসমূহ পূৰণ কৰাৰ ওপৰত নিৰ্ভৰ কৰিব। তেওঁ কয়, “যদি আমাৰ দাবীসমূহৰ সমাধান নহয়, তেন্তে আমি নিৰ্বাচনত প্ৰতিদ্বন্দ্বিতা কৰিম।” এই দল গঠনৰ মূল উদ্দেশ্য হৈছে নেপালৰ নৱ প্ৰজন্মৰ যুৱক-যুৱতীসকলক একত্ৰিত কৰা আৰু যুৱ কণ্ঠ ৰাজনৈতিক মঞ্চত প্ৰতিষ্ঠা কৰা।
নৱগঠিত দলটোৱে মূলত প্ৰত্যক্ষভাৱে নিৰ্বাচিত কাৰ্যবাহী ব্যৱস্থাৰ ওপৰত গুৰুত্ব প্ৰদান কৰিছে যাতে দেশৰ শাসন ব্যৱস্থাত স্বচ্ছতা আৰু জনগণৰ প্ৰতক্ষ্য অংশগ্ৰহণ নিশ্চিত কৰা। আৰু বিদেশত বাসকাৰী নেপালী নাগৰিকক ভোটাধিকাৰ প্ৰদান কৰা।
ইয়াৰোপৰি যুৱনেতাগৰাকীয়ে সংবাদমেলত, দুৰ্নীতি নিয়ন্ত্ৰণৰ বাবে নাগৰিক নেতৃত্বাধীন তদন্ত সমিতি গঠনৰ পোষকতা কৰে আৰু অৰ্থনৈতিক পৰিৱৰ্তনৰ ক্ষেত্ৰত স্পষ্ট নীতি গ্ৰহণৰ ওপৰত জোৰ দিয়ে। তেওঁ আৰু কয়, “আমি সুশাসন প্ৰসাৰ, স্বচ্ছতা আৰু দুৰ্নীতি নিৰীক্ষণৰ দৰে বিষয়সমূহৰ বাবে যুঁজি যাম। জাতি গঠনৰ কামত সকলো পক্ষৰ পৰা সামূহিক দায়বদ্ধতা আৰু সহযোগিতাৰ প্ৰয়োজন।”
তেওঁলোকে নেপালৰ অৰ্থনৈতিক পৰিস্থিতিৰ প্ৰতিও গভীৰ উদ্বেগ প্ৰকাশ কৰিছে। বিদেশলৈ কৰ্মসংস্থাপনৰ সন্ধানত যোৱা যুৱক-যুৱতীসকলৰ সংখ্যা ক্ৰমে বৃদ্ধি পোৱাৰ ফলত দেশৰ অৰ্থনৈতিক উন্নয়ন স্থবিৰ হৈ পৰা বুলি ধুংগনাই উল্লেখ কৰে। তেওঁ কয়, “বিগত চৰকাৰসমূহক এই জৰুৰী সমস্যাৰ বাবে দায়বদ্ধ কৰা উচিত। ঘৰুৱা উৎপাদন বৃদ্ধিৰ ওপৰত আমাৰ মনোযোগ কেন্দ্ৰীভূত কৰিব লাগিব। আৰু আমক দুখন অতি জনবহুল চুবুৰীয়া দেশে মাজত আৱৰি আছে, যাৰ মুঠ জনসংখ্যা ৩ বিলিয়ন এই বিশাল বজাৰক লক্ষ্য কৰি আমাৰ উৎপাদন বৃদ্ধি কৰাটো অতি জৰুৰী বুলি মত প্ৰকাশ কৰে।
লগতে, অনতিপলমে বন্ধ উদ্যোগসমূহ মুকলি কৰি নতুন নিযুক্তি সৃষ্টিৰ প্ৰক্ৰিয়া আৰম্ভ কৰিবলৈ অন্তৰ্বৰ্তীকালীন চৰকাৰক আহ্বান জনাইছে। পৰ্যটন খণ্ডৰ বিকাশ আৰু প্ৰসাৰতো তেওঁলোকে গুৰুত্ব দিছে, যিয়ে দেশৰ অৰ্থনীতিক বৃহৎ সুবিধা প্ৰদান কৰিব পাৰে।
অৱশ্যে এতিয়ালৈ নতুন দলটোৰ নাম নিৰ্ধাৰণ হোৱা নাই। এই সন্দৰ্ভত ধুংগনাই জনসাধাৰণৰ পৰামৰ্শ বিচাৰিছে আৰু শীঘ্ৰ এই বিষয়ে সিদ্ধান্ত ল’বলৈ আহ্বান জনাইছে। এই নতুন উদ্যোগে নেপালৰ যুৱ প্ৰজন্মৰ মাজত নতুন আশাৰ সঞ্চাৰ কৰিছে, যিয়ে দুৰ্নীতি, অৰ্থনৈতিক স্থবিৰতা আৰু গণতান্ত্ৰিক সংস্কাৰৰ বাবে সংগ্ৰাম কৰিব পাৰে।
