নেপালত পুনৰ প্ৰলয়ংকাৰী বানৰ আশংকা দেখা দিছে। আতংকত কঁপিছে সমগ্ৰ দেশ। শুকুৰবাৰে পুৱা চীনৰ ছিচুয়ানৰ কাষৰীয়া অঞ্চলত ৫ প্ৰাবল্যৰ ভূমিকম্প অনুভুত হোৱাৰ পিছত নেপালত নতুনকৈ উদ্বেগ বৃদ্ধি পাইছে।
চীনৰ ভূমিকম্পৰ পিছতে তিব্বতৰ সমীপত এটা বান্ধ ভাঙি যোৱাৰ খবৰ পোহৰলৈ আহিছে। ইয়াৰ বাবেই অহা কেইঘণ্টামানৰ ভিতৰত উত্তৰ নেপালৰ এক বৃহৎ অঞ্চলত পুনৰ আকস্মিক বান বা প্ৰবল বানৰ সৃষ্টি হ’ব পাৰে বুলি আশংকা কৰা হৈছে।
পৰিস্থিতিৰ ভয়াৱহতাক বিবেচনা কৰি প্ৰশাসনে ৰসুৱা আৰু ধাডিং জিলাত হাই এলাৰ্ট জাৰি কৰিছে। স্থানীয় বাসিন্দাসকলৰ লগতে উদ্ধাৰ আৰু সাহায্য কৰ্মীসকলকো হাই এলাৰ্টত থাকিবলৈ নিৰ্দেশ দিয়া হৈছে।
নতুনকৈ বানপানীৰ আশংকাৰ বাবে কেইবাটাও অঞ্চলত আপাততঃ উদ্ধাৰ আৰু সাহায্যৰ কাম বন্ধ হৈ পৰিছে। নদী আৰু জলধাৰাৰ কাষত বসবাস কৰা বাসিন্দাসকলক প্ৰশাসনে শীঘ্ৰে সুৰক্ষিত আৰু ওখ অঞ্চললৈ যাবলৈ পৰামৰ্শ দিছে। একে সময়তে উদ্ধাৰকাৰী দলকো পৰিস্থিতিৰ ওপৰত তীক্ষ্ণ দৃষ্টি ৰাখিবলৈ কোৱা হৈছে।
আকস্মিক বান আৰু ভূমিস্খলনে নেপালৰ বিভিন্ন অঞ্চলত ব্যাপক ক্ষতিসাধন কৰিছে। জলস্তৰ নতুনকৈ বৃদ্ধিৰ আশংকা বৃদ্ধি পোৱাৰ লগে লগে উদ্বেগ আৰু বৃদ্ধি পাইছে। এই পৰিস্থিতিৰ সৈতে মোকাবিলা কৰিবলৈ স্থানীয় প্ৰশাসন আৰু উদ্ধাৰকাৰী সংস্থা সাজু হৈছে।
