দক্ষিণ এছিয়াৰ উদীয়মান ক্ৰিকেট শক্তি নেপালে ক্ৰিকেটৰ ইতিহাসত এক বিশেষ স্থান খোদিত কৰিছে। প্ৰথমবাৰৰ বাবে টেষ্ট খেলা দেশৰ বিৰুদ্ধে জয়লাভ কৰিছে। দুবাৰৰ টি-২০ বিশ্ব চেম্পিয়ন ৱেষ্ট ইণ্ডিজক ১৯ ৰানৰ ব্যৱধানত পৰাস্ত কৰি নেপালে এক অনন্য ইতিহাস গঢ়িলে।
শনিবাৰে (২৭ ছেপ্টেম্বৰ) শ্বাৰজাহত অনুষ্ঠিত খেলখনত নেপালে প্ৰথমে বেটিং কৰি নিৰ্ধাৰিত ২০ অভাৰত ৮ উইকেট হেৰুৱাই ১৪৮ ৰান সংগ্ৰহ কৰে। ইয়াৰ প্ৰত্যুত্তৰত ৱেষ্ট ইণ্ডিজে ২০ অভাৰত ৯টা উইকেট হেৰুৱাই মাত্ৰ ১২৯ ৰানহে কৰিবলৈ সক্ষম হয়।
আই চি চিৰ পূৰ্ণ সদস্য দেশৰ বিৰুদ্ধে নেপালৰ এয়া প্ৰথম জয়। ইয়াৰ পূৰ্বে ২০১৪ চনত আফগানিস্তানৰ বিৰুদ্ধে জয়লাভ কৰিছিল যদিও সেই সময়ত তেওঁলোকে টেষ্টৰ মৰ্যাদা লাভ কৰা নাছিল। এইখন নেপালৰ বাবে প্ৰথমখন দ্বিপাক্ষিক শৃংখলা য’ত তেওঁলোকে টেষ্ট খেলা দেশৰ বিৰুদ্ধে খেলপথাৰত নামিছিল আৰু প্ৰথমখন মেচতে জয় নিশ্চিত কৰিছে।
দলটোৰ উজ্জ্বল প্ৰদৰ্শন দাঙি ধৰা তাৰকাৰ ভিতৰত আছিল নেপালৰ অধিনায়ক ৰোহিত পৌডেল আৰু কুশল মাল্লা। পৌডেলে ৩৫টা বলত ৩৮ ৰান আৰু মাল্লাই ২১টা বলত ৩০ ৰান সংগ্ৰহ কৰে। গুলচন ঝানে ১৬টা বলত ২২ ৰান আৰু দীপেন্দ্ৰ সিং আইৰীয়ে ১৯টা বলত ১৭ ৰান সংগ্ৰহ কৰে।
ৱেষ্ট ইণ্ডিজৰ হৈ জেছন হোল্ডাৰে ৪ অভাৰত ২০ ৰানত ৪ টা উইকেট, নবীন বিদাইচিয়ে ২৯ ৰানত ৩ টা উইকেট আৰু আকিল হোছেইনে ১ টা উইকেট দখল কৰে।
বেটিং কৰিবলৈ নামি কেৰিবিয়ান দলে আৰম্ভণিৰে পৰাই উইকেট হেৰুৱাবলৈ আৰম্ভ কৰে। দলটোৱে মাত্ৰ ৯৪ ৰানতে ৭টা উইকেট হেৰুৱাইছিল। আমিৰ জাংগু ১৯, আকিম অগাষ্টে ১৫, কে চি কাৰ্টি ১৬ আৰু বিদাইচি ২২ ৰান সংগ্ৰহ কৰি আউট হয়। শেষত ফেবিয়ান এলেনে (১৪ বলত ১৯) আৰু আকিলে (৯ বলত ১৮) চেষ্টা কৰিছিল যদিও দলটোক জয়ৰ দিশত আগুৱাই নিব নোৱাৰিলে।
নেপালৰ হৈ কুশল ভূৰটেলে ৪ অভাৰত ১৭ ৰানত ২ উইকেট দখল কৰে। ইয়াৰ উপৰিও আইৰি, কৰণ কে চি, নন্দন যাদৱ, ললিত ৰাজবংশী আৰু পৌডেলে ১টাকৈ উইকেট দখল কৰে।
