হলদিৰামৰ খাদ্যৰ পেকেটত উৰ্দু বাক্য: মহিলা সাংবাদিকক তুলাধুনা নেটিজেনৰ, ভিডিঅ’ ভাইৰেল

দেশত এতিয়া একাংশ লোকে বিভিন্ন চেলু উলিয়াই সাম্প্ৰদায়িক বিষবাষ্প বিয়পোৱাৰ চেষ্টাত ব্ৰতী হৈছে। এই ক্ষেত্ৰত পিছপৰি ৰোৱা নাই একাংশ সাংবাদিকো।

শেহতীয়াকৈ দেশৰ অগ্ৰণী খাদ্য সামগ্ৰী প্ৰস্তুতকাৰী প্ৰতিষ্ঠান হলদিৰামৰ শুকান ফলৰ পেকেটত উৰ্দু বাক্য লিখাকলৈ এটা ব্যক্তিগত খণ্ডৰ টেলিভিছন চেনেলৰ এগৰাকী মহিলা সাংবাদিকে হলদিৰামৰ কৰ্মচাৰীৰ সৈতে যেনে ধৰণে বাক-বিতণ্ডাত লিপ্ত হ’ল তাকে দেখি দেশৰ সচেতন লোকসকল স্তম্ভিত হৈ পৰিছে।

हल्दीराम के आउटलेट में घुसकर सुदर्शन न्यूज़ की गुंडागर्दी.
यकीन मानिए ये सब पुलिस की मौजूदगी में हो रहा है. #Haldirams pic.twitter.com/SLv47XHVi4

— Puneet Kumar Singh (@puneetsinghlive) April 5, 2022

নেটিজেনসকলে খাদ্যৰ পেকেটত ‘উৰ্দু’ লিখি ৰখাৰ প্ৰসংগত হলদিৰামৰ কৰ্মচাৰীক সাংবাদিকগৰাকীয়ে কৰা ৰুক্ষ ব্যৱহাৰৰ পিছতো কৰ্মচাৰীগৰাকীয়ে যি আশ্চৰ্যজনক সংযমৰ পৰিচয় দিলে তাৰ বাবে প্ৰশংসা কৰাৰ লগতে সাংবাদিকগৰাকীক তুলাধুনা দিছে।

শেহতীয়াকৈ ভাইৰেল হৈ পৰা এটা ভিডিঅ’ত দেখা গৈছে যে হলদিৰামৰ এখন বিপনীৰ কৰ্মীৰ সৈতে বিবাদত লিপ্ত হৈছে এগৰাকী সাংবাদিক।

সাংবাদিকগৰাকীয়ে হলদিৰামৰ খাদ্য সামগ্ৰীৰ পেকেটত কিয় উৰ্দু ভাষা ব্যৱহাৰ কৰা হৈছে বুলি হলদিৰামৰ কৰ্মচাৰীক জবাবদিহি কৰে।

সাংবাদিক গৰাকীৰ প্ৰশ্নৰ উত্তৰ দি কৰ্মচাৰীগৰাকীয়ে কয় যে ভাৰতৰ তিনিটা সম্প্ৰদায়ৰ লোক উক্ত বিপনী খনলৈ আহে। সেই লোকসকলৰ বহুতেই তিনিটা ভাষা যেনে ইংৰাজী, হিন্দী, উৰ্দু জানিব পাৰে। সেয়ে তেনে লোকসকলৰ সুবিধাৰ বাবেই খাদ্য সামগ্ৰীৰ পেকেটত খাদ্যৰ গুণাগুণ সম্পৰ্কীয় কথা ইংৰাজী, হিন্দী আৰু উৰ্দু ভাষাত লিখা হৈছে বুলি কৰ্মচাৰীগৰাকীয়ে কয়।

Here is some Urdu text. Will this reporter go to the Railways and ask what it is about? #Haldirams pic.twitter.com/DGZ8KDUoXv

— Drama Prasad Mukherjee (@DPrasadMJ148) April 5, 2022

কিন্তু ইমানৰ পিছত সাংবাদিকগৰাকীয়ে নানান অযুক্তিকৰ কথাৰে বিষয়টোক সাম্প্ৰদায়িক ৰূপ দিবলৈ চেষ্টা কৰে। সাংবাদিকগৰাকীৰ এনে আচৰণক নেটিজেনসকলে গৰিহণা দিছে।

বিশেষকৈ টুইটাৰত উক্ত ভিডিঅ’টো ভাইৰেল হৈ পৰাৰ পিছতে বহুতে সাংবাদিকগৰাকীক কামৰ পৰা অপসাৰণ কৰাৰো দাবী জনাইছে।