কুখ্যাত যৌন অপৰাধী জেফ্ৰি এপষ্টেইনৰ নাম ইতিমধ্যে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ সৈতে জড়িত হৈ পৰিছিল। এসময়ত তেওঁলোক ঘনিষ্ঠ আছিল বুলিও দাবী কৰা হৈছে। পাছলৈ আৰু বহুতো নাম চৰ্চালৈ আহিছে।
এইবাৰ এপষ্টেইন এষ্টেটৰ পৰা হাউছ অভাৰচাইট কমিটিয়ে প্ৰকাশ কৰা কিছুমান নতুন ছবিত ডেম’ক্ৰেটসকলৰ লগতে ট্ৰাম্প, আমেৰিকাৰ প্ৰাক্তন ৰাষ্ট্ৰপতি বিল ক্লিণ্টন, মাইক্ৰ’ছফ্টৰ সহ-প্ৰতিষ্ঠাপক কোটিপতি বিল গেটছ আৰু ট্ৰাম্পে প্ৰথমবাৰৰ বাবে কাৰ্যভাৰ গ্ৰহণ কৰাৰ সময়ত হোৱাইট হাউছৰ মুখ্য কৌশলবিদ হিচাপে কাম কৰা ষ্টিভ বেননক আন বহুতৰ সৈতে দেখা গৈছে।
ইয়াৰে বহুতৰে সৈতে এপষ্টেইনৰ সম্পৰ্ক ইতিমধ্যে জানিব পৰা গৈছে। ধাৰণা কৰা হয় যে এই নতুন ১৯খন ছবিৰ পৰা আৰু বহু তথ্য জানিব পৰা যাব। কিন্তু যিটো জানিব পৰা গৈছে সেয়া হ’ল এই ছবিবোৰৰ পৰা এই লোকসকলে কোনো ধৰণৰ অবৈধ কাম কৰা দেখা যোৱা নাই। সকলো ছবি কোনোবা নহয় কোনোবা এটা অনুষ্ঠানৰ। বিশ্লেষকসকলৰ এটা অংশই দাবী কৰে যে কোনো অনুষ্ঠানলৈ যোৱাৰ অৰ্থ এইটো নহয় যে সেই লোকসকলে কোনো অবৈধ কাম কৰিছে।
এই ছবিবোৰৰ ভিতৰত এখন ক’লা-বগা (ব্লেক এণ্ড হোৱাইট) ছবিয়ে বিশেষভাৱে দৃষ্টি আকৰ্ষণ কৰিছে। তাত ট্ৰাম্প আছে। বহুকেইগৰাকী মহিলাৰ লগত থিয় হৈ আছে। যদিও মহিলাসকলৰ মুখকেইখন ক’লা ৰঙেৰে ঢাকি ৰখা হৈছে। আন এখন ছবিত তেওঁক এপষ্টেইনৰ কাষত এটা অনুষ্ঠানত থিয় হৈ কথা পাতি থকা দেখা গৈছে। এই ক্ষেত্ৰত মহিলাগৰাকীৰ মুখখন ঢাকি ৰখা হৈছে।
যোৱা ৯ ছেপ্টেম্বৰত আমেৰিকাৰ হাউছ অভাৰচাইট কমিটীৰ ডেম’ক্ৰেটসকলে জেফ্ৰি এপষ্টেইনলৈ লিখা এখন যৌন সম্পৰ্কীয় পত্ৰ প্ৰকাশ কৰিছিল, য’ত আমেৰিকাৰ ৰাষ্ট্ৰপতি ড’নাল্ড ট্ৰাম্পৰ স্বাক্ষৰ আছিল। অৱশ্যে ট্ৰাম্পে এই চিঠি লিখাৰ কথা অস্বীকাৰ কৰে। আনকি তেওঁ প্ৰথমে চিঠিখন প্ৰকাশ কৰা ‘দ্য ৱাল ষ্ট্ৰীট জাৰ্নেল’ৰ বিৰুদ্ধে ১০ বিলিয়ন ডলাৰৰ ক্ষতিপূৰণৰ বাবে গোচৰ তৰে।
ৱাল ষ্ট্ৰীটে প্ৰকাশ কৰা প্ৰতিবেদনত দাবী কৰা হৈছে যে ২০০৩ চনত এপষ্টেইনৰ ৫০ বছৰীয়া জন্মদিনত বহুতে অভিনন্দন বাৰ্তা প্ৰেৰণ কৰিছিল। তাৰ ভিতৰত ট্ৰাম্পও আছিল। তেওঁ পঠোৱা চিঠিখনত এগৰাকী নগ্ন নাৰীৰ ছবি আছিল।
এপষ্টেইন আছিল এজন বিতৰ্কিত ব্যক্তি। কমেও ৪০ গৰাকী মহিলাই তেওঁৰ বিৰুদ্ধে যৌন নিৰ্যাতনৰ অভিযোগ উত্থাপন কৰিছিল। ধৰ্ষণ আৰু নাবালিকা সৰবৰাহৰ অভিযোগত অভিযুক্ত এপষ্টেইনক দোষী সাব্যস্ত হ’লে ৪৫ বছৰৰ কাৰাদণ্ড হ’লেহেঁতেন। তাৰ আগতেই তেওঁ আত্মহত্যা কৰিছিল।
