কেন্দ্ৰীয় চৰকাৰে প্ৰায় ১৪ বছৰৰ পাছত প্ৰথমবাৰৰ বাবে পাছপোৰ্টৰ মাচুল বৃদ্ধি কৰাৰ সিদ্ধান্ত গ্ৰহণ কৰিছে। অহা ১ জুলাইৰ পৰা কাৰ্যকৰী হোৱাকৈ সাধাৰণ পাছপোৰ্টৰ বাবে এতিয়াৰে পৰা ২৫০০ টকা আৰু তৎকাল পাছপোৰ্টৰ বাবে ৫০০০ টকা আদায় দিব লাগিব। বৈদেশিক পৰিক্ৰমা মন্ত্ৰালয়ে পাছপোৰ্ট কেৱল ভ্ৰমণৰ এক নথি আৰু ই ভাৰতীয় নাগৰিকত্বৰ প্ৰমাণপত্ৰ নহয় বুলি স্পষ্ট কৰাৰ এদিন পাছতেই এই নতুন নিৰিখ ঘোষণা কৰা হৈছে।
নতুন নিৰিখ অনুসৰি ১৮ বছৰ বা তাতকৈ অধিক বয়সৰ আবেদনকাৰীৰ বাবে ৩৬ পৃষ্ঠীয়া নতুন পাছপোৰ্ট বা ইয়াৰ নৱীকৰণৰ বাবে সাধাৰণ শিতানত ২৫০০ টকা খৰচ হ’ব, যিটো বৰ্তমান ১৫০০ টকা আছিল। আনহাতে তৎকাল মাচুল ৩৫০০ টকাৰ পৰা ৫০০০ টকালৈ বৃদ্ধি কৰা হৈছে। একেদৰে ৬০ পৃষ্ঠীয়া পাছপোৰ্টৰ মাচুল সাধাৰণ শিতানত ২০০০ টকাৰ পৰা ৩৫০০ টকালৈ আৰু তৎকাল শিতানত ৪০০০ টকাৰ পৰা ৬০০০ টকালৈ বৃদ্ধি কৰা হৈছে। বৈদেশিক পৰিক্ৰমা মন্ত্ৰালয়ে প্ৰকাশ কৰা এই নতুন মাচুল গাঁথনি হৈছে ২০১২ চনৰ পিছত কৰা প্ৰথমটো বৃহৎ পৰিৱৰ্তন।
হেৰোৱা বা বেয়া হোৱা পাছপোৰ্টৰ সলনি নতুন পাছপোৰ্ট বিচাৰিলে আবেদনকাৰীয়ে এতিয়া অধিক ধন ভৰিব লাগিব। সাধাৰণ শিতানত ৩৬ পৃষ্ঠীয়া পাছপোৰ্টৰ সলনি নতুন পাছপোৰ্টৰ বাবে ৫০০০ টকা আৰু তৎকালত ৭৫০০ টকা দিব লাগিব। আনহাতে ৬০ পৃষ্ঠীয়া পাছপোৰ্টৰ বাবে ক্ৰমে ৬০০০ আৰু ৮৫০০ টকা খৰচ হ’ব। ইয়াৰ উপৰিও ১৮ বছৰৰ তলৰ আবেদনকাৰীৰ বাবে ৩৬ পৃষ্ঠীয়া নতুন বা নৱীকৰণ কৰা পাছপোৰ্টৰ বাবে সাধাৰণ শিতানত ১৭৫০ টকা আৰু তৎকালত ৪২৫০ টকা নিৰ্ধাৰণ কৰা হৈছে। নাবালকৰ হেৰোৱা বা বেয়া হোৱা পাছপোৰ্টৰ বাবে সাধাৰণতে ৪২৫০ টকা আৰু তৎকালত ৬৭৫০ টকা দিব লাগিব।
বৈদেশিক পৰিক্ৰমা মন্ত্ৰালয়ে জানিবলৈ দিয়া মতে, ১ জুলাই বা তাৰ পিছত দাখিল কৰা সকলো পাছপোৰ্টৰ আবেদনৰ ক্ষেত্ৰত এই নতুন মাচুল প্ৰযোজ্য হ’ব। ভাৰতৰ ভিতৰত জৰুৰীকালীন প্ৰমাণপত্ৰসমূহ বিনামূলীয়াকৈ প্ৰদান কৰা হ’ব যদিও বিদেশত থকা আবেদনকাৰীয়ে ইয়াৰ বাবে ১৫ মাৰ্কিন ডলাৰ দিব লাগিব। পৰিচয় পত্ৰৰ বাবে ভাৰতত ১০০০ টকা আৰু বিদেশত ৫০ ডলাৰ খৰচ হ’ব। পুলিচ ক্লিয়াৰেন্স চাৰ্টিফিকেট, চাৰেণ্ডাৰ চাৰ্টিফিকেট আৰু পাছপোৰ্ট সম্পৰ্কীয় অন্যান্য প্ৰমাণপত্ৰৰ মাচুল ভাৰতত ৭৫০ টকা আৰু বিদেশত ৪০ ডলাৰ নিৰ্ধাৰণ কৰা হৈছে। উল্লেখযোগ্য যে ইয়াৰ পূৰ্বে ২০১২ চনত পাছপোৰ্টৰ মাচুল অন্তিমবাৰৰ বাবে সংশোধন কৰি সাধাৰণ পাছপোৰ্টৰ মাচুল ১০০০ টকাৰ পৰা ১৫০০ টকালৈ বৃদ্ধি কৰা হৈছিল।
