ৰাজ্যত উদ্বেগজনকভাৱে বৃদ্ধি পোৱা কোভিড-১৯ৰ সংক্ৰমণৰ প্ৰতি লক্ষ্য ৰাখি বৃহস্পতিবাৰে সন্ধিয়া ৰাজ্য চৰকাৰে নতুন নীতি-নিৰ্দেশনা প্ৰকাশ কৰাৰ সম্ভৱনা আছে। আজি সন্ধিয়া ৭বজাত মুখ্যমন্ত্ৰীৰ পৰ্যালোচনা বৈঠকৰ পাছতে এই নতুন নীতি-নিৰ্দেশনা জাৰিৰ সম্ভাৱনা আছে।
ইপিনে, বুধবাৰৰ দিনটোত ৰাজ্যখনত ৫৯১জন লোক কৰ’নাত আক্ৰান্ত হৈছে আৰু ৪জনৰ মৃত্যু হৈছে। যোৱা কেইবামাহৰ ভিতৰত এয়া আছিল সৰ্বাধিক আক্ৰান্তৰ ঘটনা।
উক্ত দিনটোত কামৰূপ মহানগৰ জিলাত ২৭৯জন লোক আক্ৰান্ত হৈছে। তদুপৰি, ৰাজ্যৰ দুজনকৈ লোক অ’মিক্ৰনত আক্ৰান্ত হৈছে।
ইয়াৰ মাজতে মুখ্যমন্ত্ৰী হিমন্ত বিশ্ব শৰ্মাই বৰ্তমান কোভিড পৰিস্থিতিত লকডাউন নহয় বুলি স্পষ্ট কৰি দিছে। তেওঁ কিছু নতুন নীতি-নিৰ্দেশনা প্ৰকাশৰ সপক্ষে মত আগবঢ়ায়।
আনহাতে, ৰাজ্যৰ স্বাস্থ্যমন্ত্ৰী কেশৱ মহন্তই জানিবলৈ দিছে যে কোভিডৰ তৃতীয় ঢৌৰ বিৰুদ্ধে যুঁজ দিবলৈ ৰাজ্যত ৮ হাজাৰ ৫৩৯ খন বিচনা সাজু কৰা হৈছে৷ ইয়াৰ ভিতৰত আইছ’লেশ্যন বিচনা আছে ৪৯৯১খন৷
তদুপৰি, অক্সিজেনযুক্ত বিচনা ২৬১৩খন, ICU বিচনা ২৮৫ খন, ICUৰ সৈতে ভেণ্টিলেটৰ থকা ৬৫০ খন বিচনা সাজু আছে। জিএমচিএইচৰ অধীনত কোভিডৰ বাবে ৩৩৮ খন অক্সিজেনযুক্ত আৰু ৩৩৬খন ICU বিচনাকে ধৰি সাজু কৰা হৈছে সৰ্বমুঠ ১৫০৩খন বিচনা৷