সুস্থ যুৱপ্ৰজন্মৰ মাজত কিয় বৃদ্ধি পাইছে আকস্মিক মৃত্যুৰ ঘটনা : এইমছ আৰু আই চি এম আৰৰ গৱেষণাত পোহৰলৈ আহিছে গুৰুত্বপূৰ্ণ ছবি

যুৱ প্ৰজন্মৰ মাজত হঠাতে বৃদ্ধি পোৱা অস্বাভাৱিক মৃত্যুৰ প্ৰকৃত কাৰণ জানিবলৈ নতুন দিল্লীৰ অল ইণ্ডিয়া ইনষ্টিটিউট অৱ মেডিকেল চায়েন্সে চমুকৈ এইমছে শেহতীয়াকৈ এক গুৰুত্বপূৰ্ণ গৱেষণা চলাইছিল।

ভাৰতীয় চিকিৎসা গৱেষণা পৰিষদ বা আই চি এম আৰৰ সহযোগত চলোৱা এই অধ্যয়নৰ ফলাফলসমূহ অলপতে ইণ্ডিয়ান জাৰ্নেল অফ মেডিকেল ৰিচাৰ্চত প্ৰকাশ পাইছে। এই গৱেষণাত বিশেষকৈ ১৮ ৰ পৰা ৪৫ বছৰ বয়সৰ যুৱক-যুৱতীসকলৰ মাজত হোৱা হঠাৎ মৃত্যুক গুৰুত্ব দিয়া হৈছে হৈছে।

সমগ্ৰ ভাৰতবৰ্ষৰ লগতে অসমতো ক’ভিডৰ পিছৰ পৰ্যায়ত বহু সুস্থ যুৱক-যুৱতীৰ হঠাৎ মৃত্যু হোৱাক লৈ যি আতংকৰ সৃষ্টি হৈছিল, এই প্ৰতিবেদনে তাৰ বহু বিজ্ঞানসন্মত তথ্য দাঙি ধৰিছে।

গৱেষণাৰ ফলাফল অনুসৰি যুৱ প্ৰজন্মৰ মাজত হোৱা এই হঠাৎ মৃত্যুৰ অন্যতম মুখ্য কাৰণ হ’ল হৃদৰোগ। অধ্যয়নটোত দেখা গৈছে যে যুৱক-যুৱতীসকলৰ মৃত্যুৰ প্ৰায় ৪২.৬ শতাংশৰ বাবে হৃদযন্ত্ৰৰ বিভিন্ন সমস্যা দায়ী। ইয়াৰে বেছিভাগ মৃত্যু ধমনীৰ তেজ চলাচলত বাধা বা ক’ৰোনাৰী আৰ্টাৰী ডিজিজৰ বাবে হোৱা বুলি চিনাক্ত কৰা হৈছে। আচৰিত কথাটো হ’ল যে যিসকল লোক দেখাত সম্পূৰ্ণ সুস্থ আছিল, তেওঁলোকৰ ক্ষেত্ৰতো এনে সমস্যাৰ বাবে হঠাৎ মৃত্যু হোৱা দেখা গৈছে। হৃদৰোগৰ উপৰিও শ্বাস-প্ৰশ্বাসজনিত সমস্যা আৰু টিবি বা নিউমোনিয়াৰ দৰে ৰোগৰ বাবেও প্ৰায় ২১ শতাংশ যুৱকৰ মৃত্যু হোৱা বুলি অধ্যয়নটোত উল্লেখ কৰা হৈছে।

গৱেষকসকলে স্পষ্টকৈ কৈছে যে ক’ভিডৰ ছিটা বা ক’ভিড সংক্রমণৰ সৈতে এই হঠাৎ মৃত্যুৰ কোনো বৈজ্ঞানিক সম্পৰ্ক পোৱা হোৱা নাই। গৱেষণাত অন্তৰ্ভুক্ত কৰা প্ৰায় ৮৩ শতাংশ মৃত লোকেই ক’ভিডৰ ছিটা গ্ৰহণ কৰিছিল যদিও তেওঁলোকৰ মৃত্যুৰ বাবে ভেকচিনক দায়ী কৰিব পৰা কোনো প্রমাণ পোৱা নগ’ল। ইয়াৰ পৰিৱৰ্তে ধূমপান, অত্যধিক মদ্যপান আৰু আধুনিক জীৱনশৈলীৰ মানসিক চাপৰ দৰে কাৰকসমূহকহে এই বিপদৰ মুখ্য কাৰণ হিচাপে চিহ্নিত কৰা হৈছে। বিশেষকৈ ১৮ ৰ পৰা ৪৫ বছৰ বয়সৰ পুৰুষসকলৰ মাজত এই সমস্যা অধিক ভয়াৱহ ৰূপত দেখা গৈছে।

বিশেষজ্ঞসকলে এই ভয়াৱহ পৰিস্থিতিৰ পৰা বাচি থাকিবলৈ কিছু সাৱধানতা অৱলম্বন কৰিবলৈ পৰামৰ্শ দিছে। যুৱ প্ৰজন্মৰ বাবে সময়ে সময়ে হৃদযন্ত্ৰৰ পৰীক্ষা কৰোৱা, সঠিক খাদ্য গ্ৰহণ কৰা আৰু নিচাযুক্ত দ্ৰব্যৰ পৰা আঁতৰি থকাটো অতি প্ৰয়োজনীয় হৈ পৰিছে।

প্ৰতিবেদনখনত আৰু কোৱা হৈছে যে প্ৰায় ২১ শতাংশ মৃত্যুৰ কাৰণ এতিয়াও ৰহস্যময় হৈ আছে। এনে পৰিস্থিতিত পৰিয়ালৰ আন সদস্যসকলক সুৰক্ষিত ৰাখিবলৈ জিনীয় পৰীক্ষা বা জেনেটিক টেষ্টিঙৰ ওপৰতো গুৰুত্ব দিবলৈ পৰামৰ্শ দিয়া হৈছে। এক কথাত ক’বলৈ গ’লে, এই গৱেষণাই আমাৰ যুৱ সমাজক এক বিশেষ সতৰ্কবাণী দিছে যাতে তেওঁলোকে নিজৰ হৃদযন্ত্ৰ আৰু ফুসফুসৰ যত্ন লয় আৰু কোনো ধৰণৰ অস্বাভাৱিক লক্ষণ দেখিলে তৎক্ষণাত চিকিৎসকৰ কাষ চাপে।