জুবিন গাৰ্গৰ সৃষ্টিৰাজি আৰু আদৰ্শক আগুৱাই নিয়াৰ লক্ষ্যৰে জুবিন গাৰ্গ ন্যাস গঠনৰ কথা ঘোষণা কৰিছে তেওঁৰ পৰিয়াল আৰু ঘনিষ্ঠ বন্ধুসকলে।
শুকুৰবাৰে এখন সংবাদ মেল সম্বোধন কৰি জুবিন গাৰ্গৰ পত্নী গৰিমা শইকীয়া গাৰ্গে জনায় যে প্ৰায় চাৰে তিনি মাহ ধৰি চলা আলোচনাৰ অন্তত এই ন্যাস গঠনৰ সিদ্ধান্ত লোৱা হৈছে। এই যাত্ৰাত পৰিয়ালৰ লগতে জুবিন গাৰ্গৰ ঘনিষ্ঠ সহযোগী পাৰ্থ সাৰথি মহন্ত, ভাতৃ গৌতম শৰ্মা আৰু অন্যান্য শুভাকাংক্ষীসকলে সক্ৰিয়ভাৱে অংশগ্ৰহণ কৰিছে।
এই ন্যাসৰ মূল কাৰ্যালয়হ’ব জুবিন গাৰ্গৰ খাৰঘুলিস্থিত আৱাসগৃহ, যিটো এতিয়াৰ পৰা সামাজিক আৰু সাংস্কৃতিক কাৰ্যসূচীৰ বাবে উৎসৰ্গা কৰা হ’ব।
সংবাদ মেলত গৰিমা শইকীয়া গাৰ্গে জুবিন গাৰ্গৰ হত্যাকাণ্ডৰ তদন্তৰ অগ্ৰগতিৰ বাবে মুখ্যমন্ত্ৰী ড°হিমন্ত বিশ্ব শৰ্মা আৰু ৰাজ্য চৰকাৰক ধন্যবাদ জনোৱাৰ লগতে ন্যায় প্ৰক্ৰিয়া ক্ষিপ্ৰ কৰিবলৈও অনুৰোধ জনায়।
জুবিন গাৰ্গৰ সপোন আৰু তেওঁৰ শিল্পকৰ্মক জীয়াই ৰাখিবলৈ এই ন্যাসক তিনিটা বিশেষ ভাগত বিভক্ত কৰা হৈছে। ইয়াৰ প্ৰথমটো শাখা কলাগুৰু ফাউণ্ডেশ্যনে সামাজিক আৰু সাংস্কৃতিক উন্নয়নৰ কাম কৰিব। আনহাতে জুবিনে নিজৰ ভগ্নীৰ নামত গঠন কৰা ‘অভিনয়া পৰফৰ্মিং আৰ্টছ’ৰ জৰিয়তে উঠি অহা প্ৰজন্মৰ মাজত নাটক আৰু অভিনয় কলাৰ চৰ্চা চলোৱা হ’ব। ইয়াৰ উপৰিও এটা গৱেষণা শাখাৰ জৰিয়তে জুবিন গাৰ্গৰ জীৱন, তেওঁৰ গীত-মাত আৰু বৌদ্ধিক সম্পদসমূহ পদ্ধতিগতভাৱে সংৰক্ষণ আৰু অধ্যয়ন কৰা হ’ব।
কেৱল সংস্কৃতিয়েই নহয়, সমাজৰ হিতৰ বাবেও এই ন্যাসে গুৰুত্বপূৰ্ণ পদক্ষেপ গ্ৰহণ কৰিছে। জুবিনৰ ঘনিষ্ঠ বন্ধু ভাস্কৰে জনোৱা মতে, জনস্বাস্থ্যৰ দৰে গুৰুত্বপূৰ্ণ বিষয়ত ন্যাসে বিশেষভাৱে কাম কৰিব। ইতিমধ্যে অসমৰ দুৰ্গম অঞ্চলসমূহত জুবিন গাৰ্গৰ নামত স্বাস্থ্য শিবিৰ আয়োজন কৰি স্বাস্থ্যসেৱাৰ কাম আৰম্ভ কৰা হৈছে। জুবিন গাৰ্গৰ ছাত্ৰাৱস্থাৰ বন্ধুসকলৰ লগতে ৰাজ্যৰ বিভিন্ন ক্ষেত্ৰৰ বিশিষ্ট ব্যক্তি আৰু জুবিনৰ অনুৰাগী সকলে এই উদ্যোগত পূৰ্ণ সহযোগ কৰিছে।
জুবিনে সদায় ভাল পোৱা সমাজ, সংস্কৃতি আৰু প্ৰকৃতিৰ সুৰক্ষাৰ বাবে এই ন্যাসে আগন্তুক দিনত এক সৱল ভূমিকা পালন কৰিব বুলি পৰিয়ালে আশা প্ৰকাশ কৰিছে।
