প্ৰদূষিত বায়ু আৰু হাওঁফাওঁৰ ৰোগৰ মাজত কোনো পোনপটীয়া সম্পৰ্ক নাই বুলি এগৰাকী কেন্দ্ৰীয় মন্ত্ৰীয়ে কৰা এক মন্তব্যই এতিয়া তীব্ৰ বিতৰ্কৰ সৃষ্টি কৰিছে। যোৱা ১৮ ডিচেম্বৰত ৰাজ্যসভাত এক প্ৰশ্নৰ উত্তৰ দি পৰিৱেশ আৰু জলবায়ু পৰিৱৰ্তন বিভাগৰ ৰাজ্যিক মন্ত্ৰী কীৰ্তি বৰ্ধন সিঙে কয় যে বৰ্তমানলৈকে এনে কোনো নিশ্চিত তথ্য নাই যিয়ে বায়ুৰ গুণমান সূচকাংক অৰ্থাৎ এ.কিউ.আইৰ সৈতে হাওঁফাওঁৰ ৰোগৰ পোনপটীয়া সংযোগ প্ৰমাণ কৰে।
মন্ত্ৰীগৰাকীৰ মতে বায়ু প্ৰদূষণ কেৱল শ্বাস-প্ৰশ্বাসজনিত সমস্যাৰ এটা উদগনিমূলক কাৰকহে হ’ব পাৰে। দিল্লীৰ বায়ুৰ মান অতি শোচনীয় হৈ থকাৰ সময়তে মন্ত্ৰীগৰাকীৰ এই মন্তব্যই দেশৰ চিকিৎসক আৰু বিশেষজ্ঞসকলক আচৰিত কৰি তুলিছে।
বিজেপিৰ সাংসদ লক্ষ্মীকান্ত বাজপেয়ীয়ে সংসদত এক গুৰুত্বপূৰ্ণ প্ৰশ্ন উত্থাপন কৰিছিল। তেওঁ জানিব বিচাৰিছিল যে দিল্লী আৰু ইয়াৰ আশে-পাশে থকা অঞ্চলসমূহত দীৰ্ঘদিন ধৰি বিষাক্ত বতাহত থকাৰ ফলত মানুহৰ হাওঁফাওঁৰ ক্ষমতা কমি যোৱা বা হাওঁফাওঁৰ ইলাষ্টিচিটি অৰ্থাৎ স্থিতিস্থাপকতা ৫০ শতাংশলৈ হ্ৰাস পোৱাৰ দৰে গম্ভীৰ সমস্যাৰ বিষয়ে চৰকাৰ অৱগত নেকি। ইয়াৰ উত্তৰত মন্ত্ৰী সিঙে জনায় যে চৰকাৰে এই ক্ষেত্ৰত বিভিন্ন স্বাস্থ্য সজাগতা আঁচনি আৰু স্বচ্ছ ভাৰত মিছনৰ দৰে পদক্ষেপ হাতত লৈছে যদিও প্ৰদূষণ আৰু ৰোগৰ মাজত পোনপটীয়া সম্পৰ্কৰ কোনো তথ্য তেওঁলোকৰ হাতত নাই।
মন্ত্ৰীগৰাকীৰ এই যুক্তিক সম্পূৰ্ণৰূপে নাকচ কৰিছে বিশেষজ্ঞ চিকিৎসকসকলে। বিশিষ্ট থোৰাচিক চাৰ্জন ড০ অৰৱিন্দ কুমাৰে স্পষ্টকৈ কৈছে যে দশক দশক ধৰি চলি থকা বিশ্বজুৰি গৱেষণা আৰু চিকিৎসকসকলে প্ৰতিদিনে দেখি থকা ৰোগীৰ অৱস্থাক আওকাণ কৰাটো অতিশয় উদ্বেগজনক। তেওঁলোকৰ মতে বায়ু প্ৰদূষণৰ ফলত কেৱল এজমা বা চি.অ.পি.ডি নহয়, বৰঞ্চ ধূমপান নকৰা যুৱক-যুৱতী আৰু মহিলাসকলৰ মাজতো হাওঁফাওঁৰ কৰ্কট ৰোগৰ প্ৰাদুৰ্ভাৱ বৃদ্ধি পাইছে। বিশ্ব স্বাস্থ্য সংস্থাৰ দৰে আন্তঃৰাষ্ট্ৰীয় প্ৰতিষ্ঠানেও বায়ু প্ৰদূষণক কৰ্কট ৰোগৰ অন্যতম কাৰক হিচাপে চিহ্নিত কৰিছে।
চিকিৎসকসকলে উল্লেখ কৰিছে যে দিল্লীৰ দৰে চহৰৰ বতাহত থকা পি.এম ২.৫ কণাৰ বাবে মানুহে দিনে ২০ টাকৈ চিগাৰেট খোৱাৰ দৰে ক্ষতিৰ সন্মুখীন হয়। আনকি সৰু ল’ৰা-ছোৱালীৰ হাওঁফাওঁটো ক’লা দাগ পৰা দেখা গৈছে। এনে সময়ত চৰকাৰী পক্ষৰ পৰা প্ৰদূষণ আৰু ৰোগৰ পোনপটীয়া সংযোগ অস্বীকাৰ কৰা বিষয়টোৱে জনসাধাৰণৰ স্বাস্থ্য সুৰক্ষাৰ ক্ষেত্ৰত এক প্ৰত্যাহ্বানৰ সৃষ্টি কৰিছে। বিশেষজ্ঞসকলৰ মতে তথ্যৰ অভাৱ বুলি বিষয়টো এৰাই চলিলে ভৱিষ্যতে ভাৰতৰ স্বাস্থ্য ব্যৱস্থাত ইয়াৰ ভয়াৱহ প্ৰভাৱ পৰিব।
