‘‘ৰাজ্যিক কৰ্মচাৰী সকল বিভিন্ন সমস্যাৰে জৰ্জৰিত। এই সমস্যা সমূহ সমাধান কৰিবলৈ যাওঁতে যাতে ৰাজ্যিক কৰ্মচাৰী সকলৰ নিজৰ দায়িত্ব আৰু কৰ্তব্য পালনৰ ক্ষেত্ৰত বাধাৰ সৃষ্টি নহয় তাৰ ওপৰত লক্ষ্য ৰাখিব সদৌ অসম কৰ্মচাৰী পৰিষদে,’’ এই গুৰুত্বপূৰ্ণ মন্তব্য সদৌ অসম কৰ্মচাৰী পৰিষদৰ নৱ নিৰ্বাচিত সম্পাদক প্ৰধান মৃণাল দাসৰ।
দাসে ৰাজ্যিক কৰ্মচাৰী সকলৰ সমস্যা সমূহ সমাধানৰ ক্ষেত্ৰত আন্দোলন বৰ্জিত পৰিবেশৰ সৃষ্টি কৰি ৰাজ্য চৰকাৰৰ লগত যোগাত্মক দৃষ্টি ভংগীৰে আলাপ-আলোচনা কৰি সংঘাত বিহীনভাবে ৰাজ্যিক কৰ্মচাৰী সকলৰ সমস্যা সমধানত গুৰুত্ব আৰোপ কৰিব লাগিব বুলিও কয়।
তামুলপুৰ জিলা কৰ্মচাৰী পৰিষদৰ উদ্যোগত তামুলপুৰ সামূহিক ভৱনত অনুষ্ঠিত এখন সভাত সদৌ অসম কৰ্মচাৰী পৰিষদৰ নৱ নিৰ্বাচিত সম্পাদক তথা তামুলপুৰৰ সুসন্তান মৃণাল দাস আৰু নৱ নিৰ্বাচিত সভাপতি প্ৰদীপ দত্তক সম্বৰ্ধনা জ্ঞাপন কৰা হয়।
তামুলপুৰ জিলা কৰ্মচাৰী পৰিষদৰ ভাৰপ্ৰাপ্ত সভাপতি চিনাকান্ত বসুমতাৰীৰ পৌৰাহিত্যত আজি দিনৰ ১-৩০ বজাত অনুষ্ঠিত আৰু সম্পাদক কন্দৰ্প তালুকদাৰে উদ্দেশ্য বাখ্যা কৰা সভাত নৱ নিৰ্বাচিত সম্পাদক প্ৰধান গৰাকীয়ে অসম আন্দোলনৰ পটভূমিত জন্ম লাভ কৰা সদৌ অসম কৰ্মচাৰী পৰিষদে অসম তথা অসমীয়াৰ জাতীয় সমস্যাৰ প্ৰতি দায়বদ্ধ আৰু এনে সমস্যাৰ ক্ষেত্ৰত কেতিয়াও কৰ্মচাৰী পৰিষদে আপোচ কৰা নাই আৰু ভৱিষ্যতেও আপোচ নকৰে বুলি তাৎপৰ্য্যপূৰ্ণ মন্তব্য কৰে।
আনহাতে, অগ্ৰাধিকাৰ ভিত্তিত কৰ্মচাৰী সকলৰ সমস্যাক গুৰুত্ত দি সমস্যা সমাধানৰ পোষকতা কৰি সাম্প্ৰতিক সময়ত দৰমহা আয়োগৰ বিনামূলীয়া স্বাস্থ্য সেৱাৰ যি অনুমোদন আছিল সেয়া সমাধানৰ ক্ষেত্ৰত গুৰুত্ব দি চৰকাৰৰ লগত আলোচনা কৰা হব বুলিও সম্পাদক প্ৰধান গৰাকীয়ে সভাত মন্তব্য কৰে।
চৰকাৰী শিক্ষানুষ্ঠান সমূহত ছাত্র-ছাত্ৰী অনুপাতে স্থায়ী শিক্ষক নিযুক্তিৰ ক্ষেত্ৰতো ইতিমধ্যে চৰকাৰৰ ওচৰত দাবী উত্থাপন কৰা হৈছে বুলি উল্লেখ কৰি সম্পাদক প্ৰধান গৰাকীয়ে কয় যে অনাগত দিনত চৰকাৰৰ সৈতে অনুষ্ঠিত হব লগীয়া আলোচনাত এই সমস্যা সমূহকো গুৰুত্ত দিয়া হব।
আজিৰ এই সম্বৰ্ধনা সভাত উপস্থিত থাকি সদৌ অসম কৰ্মচাৰী পৰিষদৰ নৱ নিৰ্বাচিত সভাপতি প্ৰদীপ দত্তই কয় যে চৰকাৰৰ মূল চালিকা শক্তি হৈছে ৰাজ্যৰ কৰ্মচাৰী সকল। চৰকাৰে যি জনকল্যান আঁচনি তৈয়াৰ কৰে, সেয়া সুচাৰুৰূপে ৰূপায়ন কৰে ৰাজ্যৰ কৰ্মচাৰী সকলে। ৰাজ্যৰ কৰ্মচাৰী সকলে নিজৰ দায়িত্ব আৰু কৰ্তব্য নিষ্ঠাৰে পালন কৰি নিজৰ প্ৰাপ্য আদায়ৰ ক্ষেত্ৰত একত্ৰিত হৈ থাকিব লাগিব ।
লগতে দত্তই অসমৰ ভাষা-কৃষ্টি-সংস্কৃতিৰ প্ৰতি ভাকুকি সৃষ্টি কৰি অসমীয়াৰ অনিষ্ট সাধন কৰিব বিচৰা কোনো শক্তিৰ লগতে কৰ্মচাৰী পৰিষদে কেতিয়াও আপোচ নকৰে বুলিও মন্তব্য কৰে।
সভাত উপস্থিত থাকি সদৌ অসম কৰ্মচাৰী পৰিষদৰ সভাপতি বাসৱ চন্দ্ৰ কলিতাই নৱ নিৰ্বাচিত সম্পাদক প্ৰধান আৰু সভাপতিৰ লগতে ফেব্ৰুৱাৰি মাহত দায়িত্বভাৰ ল’বলগীয়া সমিতিখনক নতুন সমিতি খনৰ দায়িত্ব অসীম হ’ব বুলি উল্লেখ কৰি অসমৰ কৰ্মচাৰী সকলৰ সমস্যা সমাধানৰ ক্ষেত্ৰত সততা আৰু নিষ্ঠাৰে কাম কৰি যাবলৈ নতুন সমিতিৰ বিষয়-ববীয়া সকলক আহ্বান জনায়।
আজিৰ সভাত অসম কৰ্মচাৰী পৰিষদৰ নৱনিৰ্বাচিত নেতৃবৃন্দক তামুলপুৰ জিলা কৰ্মচাৰী পৰিষদ, কুমাৰীকাটা অঞ্চলিক কৰ্মচাৰী পৰিষদ, তামুলপুৰ জিলা মধ্য ইংৰাজী শিক্ষক সন্থা, বাক্সা জিলা ছাত্র সন্থা, তামুলপুৰ মহকুমা ছাত্র সন্থা, তামুলপুৰ আঞ্চলিক ছাত্র সন্থা, তামুলপুৰ ছোৱালী উচ্চ মাধ্যমিক বিদ্যালয়, তামুলপুৰ গড়কপ্টানি মাষ্টাৰৰোল শ্ৰমিক ইউনিয়ন, তামুলপুৰ প্ৰাথমিক শিক্ষক গোট আৰু বাক্সা জিলা মাধ্যমিক বিদ্যালয় সমূহৰ কাৰ্য্যালয় সহায়ক সন্থাই বিপুল ভাবে সম্বৰ্ধনা জ্ঞাপন কৰে।
