লিয়নেল মেছি, জাভি হাৰ্নাণ্ডেজ, আন্দ্ৰেছ ইনিয়েষ্টা, চাৰ্জিঅ’ বুস্কেটছ, কাৰ্লোছ পুয়ল, পেপ গুৱাৰ্ডিঅ’লা… নামৰ তালিকাখন অতি দীঘলীয়া। আপুনি ইচ্ছা কৰিলে আৰু কিছুমান নাম যোগ কৰিব পাৰে – ভিক্টৰ ভালডেছ, চেস্ক ফেব্ৰেগাছ, জোৰ্ডি আলবা, থিয়াগো আলকান্টাৰা, গাভি, আনছু ফাটি, লেমিনে ইয়ামাল।
তেওঁলোকে সকলোৱে এটা সময়ত বাৰ্চিলোনাৰ জাৰ্চি পিন্ধিছে। কিন্তু তাৰ বাহিৰেও তেওঁলোকৰ মাজত আন এটা ডাঙৰ মিল আছে। তেওঁলোক আটাইকেইজন বার্চিলোনাৰ বিশ্ববিখ্যাত ফুটবল একাডেমী ‘লা মাছিয়া’ৰ পৰা আহিছিল! এই একাডেমী প্ৰতিভাৱান ফুটবলাৰ নিৰ্মাণৰ অদম্য কাৰখানাৰ দৰে, য’ত ইটোৰ পিছত সিটো নতুন প্ৰজন্ম ওলাই আহিছে। ১২ বছৰীয়া ডেষ্টিনি কোচিছ’ এজিফ’ৰ লা মাছিয়াৰ এনে এজন উজ্জ্বল প্ৰতিভা।
নামটো বেছি দীঘল যেন লাগিলে তেওঁক ডেষ্টিনি ক’চিছ’ বুলিও ক’ব পাৰি। এই মুহূৰ্তত তেওঁ বাৰ্চাৰ বয়সভিত্তিক গোটত খেলি আছে। ভৱিষ্যতে তেওঁ কিমান দূৰ আগবাঢ়িব সেয়া সময়েহে ক’ব। অৱশ্যে তেওঁৰ নাম এতিয়া কাইলিয়ান এমবাপে আৰু লা মাছিয়াৰ আন এক আশ্চৰ্য্য লেমিনে ইয়ামালৰ সৈতে জড়িত হৈ পৰিছে! অসমান বয়সৰ এই তিনিজনৰ মাজত তুলনা মাত্ৰ এটা কাৰণতে – গ’ল দিয়াৰ অবিশ্বাস্য ক্ষমতা।
আৰ্জেণ্টিনাৰ কাকত লা নেচনৰ মতে, ডেষ্টিনিয়ে যেতিয়া বাৰ্চাৰ ১২ বছৰ অনুৰ্ধ দলত প্ৰথম ছিজন কটায়, তেতিয়া তেওঁক বয়সতকৈ অলপ বয়সীয়াল দলত খেলা হৈছিল। ১১ জনীয়া দলত খেলি তেওঁ সেই প্ৰথম ছিজনত ৯খন মেচত ১৬টা গ’ল দিছিল।
কিন্তু যোৱা ছিজনত তেওঁৰ প্ৰদৰ্শন সঁচাকৈয়ে আচৰিত আছিল। সাতজনীয়া দলত খেলি তেওঁ ৫২খন খেলত ১৪৫টা গ’ল দিছিল! এই প্ৰদৰ্শনৰ পিছতেই তেওঁৰ নাম আলোচনাৰ মাজলৈ আহে। ইয়াৰ আন এটা কাৰণ আছে – ইমান কম বয়সতে তেওঁ ক্ৰীড়া সঁজুলি নিৰ্মাতা কোম্পানী নাইকৰ সৈতে বাণিজ্যিক চুক্তিত স্বাক্ষৰ কৰিছে। এই চুক্তিয়েও বিতৰ্কৰ সূচনা কৰিছে।
চুক্তিৰ কাহিনীত সোমোৱাৰ আগতে ডেষ্টিনিৰ বিষয়ে জনাটো গুৰুত্বপূৰ্ণ। ডেষ্টিনি ক’ছিছ’ নাইজেৰিয়ান বংশদ্ভুত স্পেনিছ। তেওঁৰ পিতৃ নাইজেৰিয়াৰ ফুটবলাৰ আজিক পাছচাল। এসময়ত আজিকে স্পেইনৰ তৃতীয় বিভাগৰ ফুটবল খেলিছিল। তেওঁৰ তিনিওজন পুত্ৰ বাৰ্চিলোনাৰ লা মাছিয়াত!
ছেপ্টেম্বৰ মাহত আজিকে ব্ৰিটিছ কাকত দ্য ছানক কৈছিল, “ভগৱানক ধন্যবাদ, মোৰ তিনিওজন পুত্ৰ বাৰ্চিলোনাত আছে। সকলোৰে অৱস্থা ভাল। কিন্তু ডেষ্টিনিয়ে, মই ভাবো, তেওঁৰ বয়সৰ হিচাপে অলপ বেছি ভাল কাম কৰি আছে।”
ডেষ্টিনিৰ ডাঙৰ ভাতৃ ১৭ বছৰীয়া ডেভিদ অবিনা আৰু মাজু ভাতৃ ১৬ বছৰীয়া ডিভাইন ইকেনাও লা মাছিয়াৰ পৰাই উঠি আহিছে। ২০১৭ চনত লা মাছিয়াত যোগদান কৰা ডেভিদে এতিয়া স্পেনিছ ফুটবলৰ পঞ্চম স্তৰৰ দল কৰ্নেলাৰ হৈ খেলি আছে। ডিভাইন লা মাছিয়াত বাৰ্চাৰ ১৫ বছৰ অনুৰ্ধ দলত গঢ়ি উঠিছে। তিনিওজন ভাতৃৰ ভিতৰত ডেষ্টিনিৰ বাবেই সংবাদ মাধ্যমে আটাইতকৈ বেছি আগ্ৰহী।
স্পেইনৰ বয়সভিত্তিক প্ৰতিযোগিতা জেমন কাপ আৰু কোপা ইস্কাত ডেষ্টিনি চিনাকি মুখ। ২০২৩–২৪ চনৰ কোপা ইস্কাত ২০টা গ’ল দি বাৰ্ছাক চেম্পিয়ন কৰি তুলিছিল। লা নেচনে প্ৰকাশ কৰা অনুসৰি তেওঁক খেলা দেখি থকাসকলে কৈছিল যে ডেষ্টিনি এজন বিস্ফোৰক ফুটবলাৰ। বয়সৰ তুলনা ভৰি দুখন মজবুত। দৌৰৰ প্ৰথম কেইমিটাৰমানত তেওঁ অতি বেগী। দুয়ো ভৰিৰে সমানে পাকৈত আৰু হেডেৰেও গ’ল দিব পাৰে। ২০২৩–২৪ ছিজনত বাৰ্চাৰ ১০ বছৰ অনুৰ্ধ দলৰ হৈ তেওঁ ২৭খন মেচত ১০০টা গ’ল দিছিল।
ব্ৰিটিছ সংবাদ মাধ্যম দ্য টাইমছে প্ৰকাশ কৰা অনুসৰি এই মাহত নাইকে ডেষ্টিনিৰ সৈতে বাণিজ্যিক চুক্তি স্বাক্ষৰ কৰিছে। ইয়াৰ পূৰ্বেও তেওঁলোকে ব্ৰাজিলৰ ৮ বছৰীয়া ফুটবলাৰ কোৱান বেচিলেৰ সৈতে একেধৰণৰ চুক্তি কৰিছিল। ডেষ্টিনিৰ সৈতে নাইকৰ এই চুক্তি বিখ্যাত এজেণ্ট পিনি জাহাভিৰ কোম্পানী গ’ল ইণ্টাৰনেশ্যনেল লিমিটেডৰ সৈতে জড়িত। এই ইজৰাইলী ফুটবল এজেণ্টে বাৰ্চাৰ প্ৰশিক্ষক হান্সি ফ্লিক আৰু ষ্ট্ৰাইকাৰ ৰবাৰ্ট লেৱাণ্ডোস্কিৰ কেৰিয়াৰো পৰিচালনা কৰে।
ফিফাৰ নিয়ম অনুসৰি এজেণ্টসকলে ১৬ বছৰ বয়সলৈকে আৰু প্ৰথম পেছাদাৰী চুক্তি স্বাক্ষৰ নকৰালৈকে খেলুৱৈৰ সৈতে প্ৰতিনিধিত্বমূলক চুক্তি স্বাক্ষৰ কৰাত নিষেধাজ্ঞা আৰোপ কৰা আছে।
কিন্তু দ্য টাইমছৰ বাতৰি অনুসৰি সেই বয়সৰ আগতে এজন যুৱ খেলুৱৈ আৰু তেওঁৰ পৰিয়ালক বাণিজ্যিক চুক্তিৰ ক্ষেত্ৰত এজেণ্টসকলে পৰামৰ্শ দিয়াত বাধা দিয়া কোনো নিয়ম নাই। জাহাভিৰ কোম্পানী আৰু ডেষ্টিনিৰ ক্ষেত্ৰত ঠিক এনেকুৱাই হৈছে। জাহাভিয়ে টাইমছক জনাইছে যে ভৱিষ্যতৰ সৈতে যোগাযোগৰ এইটোৱেই হৈছে পথ।
জাহাভিয়ে ডেষ্টিনিকো প্ৰশংসা কৰি কয়, ‘ল’ৰাজন অতি বিশেষ। বাৰ্চিলোনাৰ একাডেমীৰ সকলোৱে তেওঁক উচ্চমানৰ বুলি ভাবে।যদি ভুল কৰা নাই তেন্তে যোৱা ছিজনত তেওঁ ৫২খন খেলত ১৪৫টা গ’ল দিছিল। নাইকৰ সৈতে হোৱা চুক্তিখন বুজিব লাগিব। যিসকলৰ মাজত ডাঙৰ ফুটবলাৰ হোৱাৰ সম্ভাৱনা থাকে, তেওঁলোককে এনে চুক্তিৰ বাবে বিবেচনা কৰা হয়। ভৱিষ্যতৰ বাবে চুক্তি নিশ্চিত কৰাৰ বাবেই তেওঁলোকে যোগাযোগ কৰে। অৱশ্যে ডেষ্টিনি তেনেকুৱা কিবা এটা হ’ব পাৰে নে নোৱাৰে, সেয়া সময়েহে ক’ব।”
দৰাচলতে কথাটো ঠিক তেনেকুৱাই। ডেষ্টিনিৰ ‘ডেষ্টিনি’য়ে তেওঁক ক’লৈ লৈ যায় সেইটো চাবলৈ আমি অপেক্ষা কৰিবই লাগিব।
