গোলাঘাট জিলাৰ শালমৰা চাহ বাগিচাত বৃহস্পতিবাৰে নিশা বিষাক্ত চুলাই মদ পান কৰি ১৫ গৰাকী লোকে অকালতে মৃত্যুক সাৱটিব লগা হোৱা ঘটনাই সমগ্ৰ চাহ বাগিচাখনতে তীব্ৰ চাঞ্চল্যৰ সৃষ্টি কৰিছে।
প্ৰাপ্ত তথ্য অনুসৰি বৃহস্পতিবাৰে নিশা চুলাই মদ খোৱাৰ পিছতে মহিলাসহ লোককেইগৰাকী গুৰুতৰভাবে অসুস্থ হৈ পৰে। অসুস্থ লোক কেইগৰাকীক গোলাঘাটৰ চহিদ কুশল কোঁৱৰ অসামৰিক চিকিৎসালয়ত ভৰ্তি কৰোৱা হয়। প্ৰাথমিক চিকিৎসাৰ অন্তত চিকিৎসকে দুৰ্পদী ওৰাং(৫০), বেল ভূমিজ(৫০), অগ্নি গোৱালা (৫৫) আৰু বান্ধৈ বাউৰী (৪৮) নামৰ মহিলা চাৰিগৰাকীক মৃত ঘোষণা কৰে।
আনহাতে, নিশাৰ ভাগলৈ আন পাঁচগৰাকী লোক ক্ৰমে দুলাল ওৰাং, শুকলাল পুজৰ, এটোৱা পুজৰ, শান্তি পুজৰ আৰু বিনতি ভক্তাৰো চিকিৎসালয়ত মৃত্যু হয়। আজি পুৱাৰ ভাগত মৃত্যু হয় আনকেইজন লোকৰ চুলাই মদৰ বিষক্ৰিয়াৰ ফলতে লোককেইগৰাকীৰ মৃত্যু হোৱা বুলি চিকিৎসকে প্ৰকাশ কৰিছে।এতিয়াও বহুকেইজন লোক অসুস্থহৈ আছে চিকিৎসালয়ত।
সমগ্ৰ ঘটনাটোক কেন্দ্ৰ কৰি শালমৰা চাহ বাগিচাৰ শ্ৰমিক সকল শংকিত হৈ পৰাৰ লগতে আৰক্ষী প্ৰশাসনক ঘটনাৰ উচিত তদন্ত কৰি দোষীক শাস্তি বিহাৰ বাবে দাবী জনাইছে। আৰক্ষীয়ে ইতিমধ্য়ে চুলাই মদ বিক্ৰী কৰা সঞ্জু ওৰাং নামৰ ব্যক্তিজনক ঘটনা সংক্ৰান্তত আটক কৰিছে।