অৱশেষত ব্ৰিটেইনৰ আদালতত মুখ থেকেচা খালে পঞ্জাৱ নেছনেল বেংক কেলেংকাৰীৰ খলনায়ক তথা ভাৰতীয় হীৰা ব্যৱসায়ী নীৰৱ মোদীয়ে।
আজি নীৰৱ মোদীৰ ভাৰতলৈ প্ৰত্যৰ্পন সন্দৰ্ভত ৱেষ্টমিনষ্টাৰৰ জিলা ন্যয়াধীশ ছেমুৱেল গুজে কয় যে নীৰৱ মোদীক ভাৰতলৈ প্ৰত্যৰ্পন কৰাত কোনো আপত্তি নাই।
ভাৰত চৰকাৰে নীৰৱ মোদীক সুধিবলগীয়া বহু কথা আছে বুলি ন্যায়াধীশ গৰাকীয়ে কয়।ন্যয়াধীশগৰাকীয়ে লগতে কয় যে ভাৰতলৈ প্ৰত্যৰ্পন কৰিলে নীৰৱ মোদীয়ে ন্যায় পোৱাত অসুবিধা হ’ব বুলি যি কথা কোৱা হৈছে সেয়া শুদ্ধ নহয়।
উল্লেখযোগ্য যে ৪৯ বছৰীয়া মোদীয়ে ২০১৯ চনৰ ১৯ মাৰ্চৰ পৰা লণ্ডনৰ ৱাণ্ডছৱৰ্থ কাৰাগাৰত কাৰাবাস খাটি আছে।
ৱেষ্টমিনষ্টাৰ মেজিষ্ট্ৰেটছ ক’ৰ্টে প্ৰদান কৰা ৰায় অনুসৰি সোনকালেই মোদীক ভাৰতলৈ প্ৰত্যাৰ্পণ কৰা হ’ব ।
ভাৰতলৈ প্ৰত্যৰ্পণ কৰাৰ পাছতে মোদীয়ে কেইবাটাও প্ৰবঞ্চনা আৰু আৰ্থিক জালিয়াতিৰ গোচৰৰ মুখামুখি হ’ব।
আজি কাৰাগাৰৰ পৰাই মোদীয়ে এটা ভিডিঅ’লিংকৰ দ্বাৰা ন্যায়ালয়ত অংশগ্ৰহণ কৰে। ইতিমধ্যে কেইবাবাৰো এনেধৰণে শুনানি সম্পন্ন হৈ গৈছে।
ন্যায়ালয়ে উক্ত ৰায়টো পাছত ইংলেণ্ডৰ গৃহ সচিব প্ৰীতি পেটেললৈ অনুমোদনৰ বাবে প্ৰেৰণ কৰে।
ইতিমধ্যে মোদীয়ে কেইবাবাৰো জামিন আবেদন কৰিছিল যদিও ন্যায়ালয়ে মঞ্জুৰ কৰা নাছিল।
জানিব পৰা মতে ভাৰতত মোদীক মুম্বাইৰ আৰ্থাৰ ৰোড জেইলৰ ১২ নম্বৰ বেৰেকত ৰখা হ’ব। ইতিমধ্যে ভাৰত চৰকাৰে এটা ভিডিঅ’ ৰেকৰ্ডিঙৰ যোগেৰে উক্ত বেৰেকটো সাজু কৰি তুলিছে বুলি প্ৰকাশ কৰিছে।
উল্লেখযোগ্য যে নীৰৱ মোদীৰ উপৰিও কিংফিছাৰ এয়াৰলাইনছৰ প্ৰাক্তন মালিক বিজয় মালিয়া, মৰণাস্ত্ৰ ব্যৱসায়ী সঞ্জয় ভাণ্ডাৰীও ভাৰতৰ পৰা গৈ ইংলেণ্ডত পলাই আছে।
আনহাতে ২০২০ বৰ্ষৰ ফেব্ৰুৱাৰীত ক্ৰিকেট বুকী সঞ্জীৱ চাওলাক ইংলেণ্ডৰ পৰা ভাৰতলৈ প্ৰত্যৰ্পন কৰিছিল। ভাৰতৰ কাৰাগাৰৰ অৱস্থা সন্দৰ্ভতো আদালতে আজি সন্তুষ্টি ব্যক্ত কৰা পৰিলক্ষিত হয়।