জেশজুৰি চাঞ্চল্যৰ সৃষ্টি কৰা নিৰ্ভয়া কাণ্ডৰ চাৰিওজন মূল দোষীকে আজি ৰাতিপুৱা ৫.৩০ বজাত একেলগে ফাঁচিকাঠত ওলমোৱা হ’ল। চাৰিওজনকে ফাঁচি দিয়াৰ কাম সম্পাদন কৰে পৱন নামৰ এজন জল্লাদে।
ফাঁচি দিয়াৰ বাবে উদগ্ৰীৱ হৈ থকা জল্লাদ পৱনে আজি ৰাতিপুৱা ৩.৩০ বজাতে বিচনাৰ পৰা শুই উঠে। শুই উঠিয়েই পৱনে স্নান কৰি একাপ চাহ খাই আৰু শেষ মূহুৰ্তৰ প্ৰস্তুতিৰ বিষয়ে বুজ লয়।
লগতে পঢ়ক : অৱশেষত ন্যায়; নিৰ্ভয়া কাণ্ডৰ চাৰিওজন দোষীকে একেলগে ওলমালে ফাঁচিকাঠত
উল্লেখ্য যে জল্লাদ পৱনক চলিত সপ্তাহৰ আৰম্ভণিতে তিহাৰ জেইলৰ এটা দলে মিৰাটৰ পৰা লৈ আনে।
দোষী কেইজনৰ ফাঁচিৰ বাবে জেইল কৰ্তৃপক্ষই ৮ ডাল মণিলা ৰচিৰ যোগাৰ কৰিছিল। ইয়াৰে চাৰিডাল ৰচি আজি ব্যৱহাৰ কৰা হয় আৰু বাকী কেইডাল ষ্টেণ্ডবাইত ৰখা হয়।
উল্লেখ্য যে, তিহাৰ জেইল কৰ্তৃপক্ষই প্ৰতিটো ফাঁচিৰ বাবদ জল্লাদ পৱনক ২০ হাজাৰ টকাকৈ প্ৰদান কৰিব। ইয়াৰ অৰ্থ হ’ল, চাৰিওজন দোষীকে ফাঁচি দিয়াৰ বাবদ পৱনে লাভ কৰিব ৮০ হাজাৰ টকা।
নিৰ্ভয়া কাণ্ডৰ চাৰিওজন দোষীৰে ফাঁচি পিচুওৱাৰ বাবে তেওঁলোকৰ অধিবক্তাই বিভিন্ন কৌশল গ্ৰহণ কৰিছিল। ইতিমধ্যে দুবাৰ তেওঁলোকৰ ফাঁচি পিচুওৱাও হৈছিল।