লোকসভা নিৰ্বাচন শেষ হোৱাৰ চাৰে চাৰি মাহৰ পাছত কেন্দ্ৰীয় পথ পৰিবহণ মন্ত্ৰী নীতিন গাডকাৰীয়ে এক চাঞ্চল্যকৰ দাবী উত্থাপন কৰিছে। তেওঁ কয় যে লোকসভা নিৰ্বাচনৰ পূৰ্বে তেওঁক বিৰোধী শিবিৰৰ পৰাই প্ৰধানমন্ত্ৰী পদৰ প্ৰস্তাৱ দিয়া হৈছিল।
গাডকাৰীয়ে কয় যে বিৰোধী শিবিৰৰ এজন শীৰ্ষ নেতাই তেওঁক সাক্ষাৎ কৰি বিষয়টো আলোচনা কৰিছিল। তেওঁ সেই প্ৰস্তাৱ নাকচ কৰে।
অৱশ্যে নেতাজনৰ নাম প্ৰকাশ নকৰিলে গাডকাৰীয়ে। কিন্তু কেন্দ্ৰীয় মন্ত্ৰীগৰাকীৰ মন্তব্যৰ পিছতে শাৰদ পাৱাৰ আৰু তেওঁৰ মাজত হোৱা বৈঠক সন্দৰ্ভত পুনৰ জল্পনা-কল্পনাৰ সৃষ্টি হৈছে।
লগতে পঢ়কঃ বিৰল মহাজাগতিক পৰিঘটনা! পৃথিৱীয়ে পাব নতুন ‘চন্দ্ৰ’, কিমান দিন ৱৰ্তি থাকিব অস্তিত্ব?
চলিত বৰ্ষৰ মাৰ্চ মাহৰ আৰম্ভণিতে মুম্বাইত পাৱাৰ আৰু গাডকাৰীৰ গোপন আলোচনা হোৱা বুলি সংবাদ মাধ্যমত বাতৰি ওলাইছিল। গডকাৰীক প্ৰধানমন্ত্ৰী হিচাপে বিৰোধী শিবিৰৰ প্ৰস্তাৱ দিয়া বুলিও জল্পনা-কল্পনাৰ সৃষ্টি হৈছিল। সেই বিতৰ্কৰ মাজত গাডকাৰীয়ে জনাইছিল যে তেওঁৰ প্ৰধানমন্ত্ৰী হোৱাৰ কোনো ইচ্ছা নাই। কিন্তু পাৱাৰৰ সৈতে হোৱা ব্যক্তিগত সাক্ষাৎকাৰক লৈ তেতিয়া তেওঁ মুখ খোলা নাছিল।
শনিবাৰে নিশা নাগপুৰত অনুষ্ঠিত এক অনুষ্ঠানত গাডকাৰীয়ে কয় যে এজন নেতাই মোক প্ৰধানমন্ত্ৰী কৰাৰ বাবে বিৰোধী শিবিৰৰ প্ৰস্তাৱ লৈ মোক সাক্ষাৎ কৰিছিল। মই প্ৰস্তাৱটো ঘূৰাই দি কৈছিলোঁ, মোৰ তেনে কোনো ইচ্ছা নাই। মই ৰাষ্ট্ৰীয় স্বয়ং সেৱক সংঘত থাকি ডাঙৰ হৈছো। এনে ব্যক্তিগত কামনাক সংঘই অনুমোদন নিদিয়ে। তদুপৰি ৰাজনীতিত ব্যক্তিগত উচ্চাকাংক্ষা গণতন্ত্ৰৰ বিপৰীত।
গাডকাৰীৰ এই দাবীক লৈ অৱশ্যে বিৰোধী শিবিৰৰ কোনো নেতাই মুখ খোলা নাই। কিন্তু দীৰ্ঘদিন ধৰি বিজেপিৰ এই নৰমপন্থী নেতাকলৈ চৰ্চা চলি আহিছে। নাগপুৰৰ সাংসদ গাডকাৰী সংঘৰ অতি ঘনিষ্ঠ। একে সময়তে দল আৰু বিৰোধী শিবিৰতো জনপ্ৰিয়। দলৰ সভাপতি হিচাপে থকা কাৰ্যকালত বিৰোধীৰ সৈতেও সু-সম্পৰ্ক বজাই ৰাখিছিল।
লগতে পঢ়কঃ চাকৰিৰ প্ৰলোভন দি যুৱতীক মাতি আনি হোটেলত ধৰ্ষণ! জিমৰ মালিকৰ বিৰুদ্ধে ৰুজু গোচৰ
এইবাৰ নিৰ্বাচনৰ পূৰ্বে বিৰোধী শিবিৰৰ এটা অংশই বিচাৰিছিল, যদিহে বিজেপি ক্ষমতালৈ ঘূৰি অহাত বাধা দিব নোৱাৰি, তেন্তে অন্তত নৰেন্দ্ৰ মোডী যাতে পুনৰ প্ৰধানমন্ত্ৰী হ’ব নোৱাৰে সেইটো চেষ্টা চলোৱা হওক। যদিহে বিজেপিয়ে সংখ্যাগৰিষ্ঠতা নাপায় তেন্তে গাডকাৰীক সন্মুখত ৰাখিয়েই প্ৰধানমন্ত্ৰী সলনি কৰাৰ বাবে হেঁচা প্ৰয়োগ কৰা হ’ব। কিন্তু গাডকাৰীয়ে নিজেই দাবী কৰিছে যে তেওঁ সেই প্ৰচেষ্টা বিফল কৰিছিল।
