উত্তৰ প্ৰদেশৰ বিজেপি বিধায়ক সুৰেশ তিৱাৰীয়ে দেওৰীয়া জিলাৰ জনসাধাৰক মুছলমান ব্যৱসায়ীৰ পৰা শাক-পাচলি ক্ৰয় নকৰিবলৈ কোৱা মন্তব্যই ৰাজ্যখনত বিতৰ্কৰ সৃষ্টি কৰিছে।
বাৰহাজ সমষ্টিৰ বিধায়ক গৰাকীৰ এই বিতৰ্কিত মন্তব্যটো সম্প্ৰতি ছ’চিয়েল মিডিয়াত ভাইৰেল হৈ পৰা পৰিলক্ষিত হৈছে।
‘এটা কথা মনত ৰাখিব, মই সকলোকে মুকলিকৈ কৈছো, কোনেও মুছলমান ব্যৱসায়ীৰ পৰা শাক-পাচলি ক্ৰয় নকৰিব’, সাধাৰণ জনতা তথা একাংশ বিষয়াক উদ্দেশ্যি এই মন্তব্য কৰিছিল বিধায়ক তিৱাৰীয়ে।
এই প্ৰসংগত বিধায়কগৰাকীৰ মন্তব্য জানিব বিচৰাত তেওঁ কয় যে, যোৱা সপ্তাহত বাৰহাজ নগৰ পালিকাৰ কাৰ্যালয়লৈ যাওতে এই মন্তব্য কৰিছিলো, য’ত উপস্থিত আছিল একাংশ চৰকাৰী বিষয়া।
‘ক’ৰ’না ভাইৰাছ সংক্ৰমণৰ উদ্দেশ্যে একাংশ মুছলিম সম্প্ৰদায়ৰ ব্যৱসায়ীয়ে থু লগাই শাক-পাচলি বিক্ৰী কৰি থকা বুলি অভিযোগ লাভ কৰিছিলো, সেয়ে মই সেই ব্যৱসায়ী সকলৰ পৰা শাক-পাচলি ক্ৰয় নকৰিবলৈ পৰামৰ্শ প্ৰদান কৰিছিলো…’, এইদৰে কয় বিধায়কগৰাকীয়ে।
বিধায়য়ক গৰাকীয়ে কেৱল মাত্ৰ নিজৰ মত প্ৰকাশ কৰা বুলিহে মন্তব্য কৰি কয়, ‘সকলোৱে দেখিছে জামাতৰ সদস্যসকলে দেশত কি পৰিস্থিতিৰ সৃষ্টি কৰিছে’, তিৱাৰীয়ে তবলিগী জামাতৰ প্ৰসংগৰে এই কথা উল্লেখ কৰে।
ইফালে ৰাজ্যখনৰ বিজেপি মুখপাত্ৰ ৰাকেশ ত্ৰিপাঠীয়ে বিধায়কগৰাকীৰ এনে মন্তব্যৰ বিষয়ে অৱগত নহয় বুলি উল্লেখ কৰে।
