যোৱা ১৯ নৱেম্বৰত এক আৱেগিক ভাষণেৰে প্ৰধান মন্ত্ৰী নৰেন্দ্ৰ মোদীয়ে কৃষি আইন বাতিল কৰা হ’ব বুলি ঘোষণা কৰাৰ পিছতেই বিৰোধীয়ে দাবী কৰিছিল যে কেন্দ্ৰীয় চৰকাৰৰ কৃষকৰ প্ৰতি কোনো সৎ অভিপ্ৰায় নাই। মাত্ৰ আগন্তুক নিৰ্বাচনৰ স্বাৰ্থতহে চৰকাৰে কৃষি আইন বাতিলৰ সিদ্ধান্ত লৈছে।
বিৰোধীৰ এই দাবীয়েই এতিয়া সত্যত পৰিণত হোৱাৰ উপক্ৰম হৈছে। ইতিমধ্যে সংসদত কৃষি আইন বাতিল বিধেয়ক গৃহীত হৈছে। কিন্তু প্ৰতিবাদী কৃষক সকলে MSP কে ধৰি আন দাবীৰ ওপৰত চৰ্চা কৰিবলৈ দাবী জনাই আহিছে। লগতে প্ৰতিবাদী শ্বহীদ কৃষকৰ ক্ষতিপূৰণৰো দাবী তুলিছে কৃষক নেতা সকলে।
কৃষক আন্দোলনৰ নেতৃত্বই দাবী কৰিছে যে তেওঁলোকৰ আন্দোলনৰ সময়ত ৭০০ ৰো অধিক কৃষকৰ মৃত্যু হৈছে। কিন্তু কেন্দ্ৰীয় চৰকাৰে মন্তব্য কৰিছে যে চৰকাৰৰ ওচৰত এই বিষয়ে কোনো তথ্য নাই। সেয়ে ক্ষতিপূৰণ দিয়াৰ কোনো অৱকাশ নাই।
বিৰোধীয়ে সংসদত এক লিখিত প্ৰশ্নৰ জৰিয়তে আন্দোলনৰ সময়ত মৃত্যু হোৱা কৃষকসকলৰ পৰিয়ালক ক্ষতিপূৰণ দিবলৈ কেন্দ্ৰই কি ব্যৱস্থা গ্ৰহণ কৰিছে সেই বিষয়ে প্ৰশ্ন উত্থাপন কৰে।
ইয়াৰ উত্তৰত কৃষি মন্ত্ৰী নৰেন্দ্ৰ সিং তোমাৰে কয়, “কিমান জন কৃষকৰ মৃত্যু হৈছে সেই সন্দৰ্ভত কৃষি মন্ত্ৰালয়ৰ ওচৰত কোনো তথ্য নাই, সেয়েহে ক্ষতিপূৰণৰ কোনো প্ৰশ্নই নাই।”
যোৱা বছৰনৱেম্বৰৰ পৰা তিনিখন কৃষি আইনৰ বিৰুদ্ধে সিংগু, টিক্ৰি আৰু গাজীপুৰ সীমান্তত কৃষকৰ আন্দোলনত ৭০০ ৰো অধিক কৃষকৰ মৃত্যু হৈছে বুলি কৃষক আন্দোলনৰ নেতাসকলে দাবী কৰিছে।
আন্দোলনৰ সময়ত মুখ্যতঃ বেয়া বতৰ, অসুস্থতা আৰু আত্মহত্যাৰ কাৰণত কৃষকসকলৰ মৃত্যু হৈছে। বিৰোধীয়ে কেন্দ্ৰীয় চৰকাৰক মৃত কৃষকসকলৰ পৰিয়ালক ক্ষতিপূৰণ দিয়াৰ দাবী জনাইছে।
কিন্তু কৃষি মন্ত্ৰীয়ে তেওঁৰ উত্তৰত ইংগিত দিছিল যে কেন্দ্ৰৰ এতিয়াৰ বাবে বিষয়টোত কোনো পৰিকল্পনা নাই।
এতিয়া নিশ্চিতভাৱে প্ৰশ্ন উত্থাপন হয়, কৃষকসকলৰ প্ৰতি নৰেন্দ্ৰ মোদীৰ কেন্দ্ৰীয় চৰকাৰৰ সঁচাকৈয়ে সদিচ্ছা আছে নে ? মোদী চৰকাৰৰ ভুল নীতিৰ প্ৰতিক্ৰিয়া স্বৰূপেই মৃত্যুৰ সন্মুখীন হোৱা কৃষকসকলৰ পৰিয়ালে ক্ষতিপূৰণ লাভ নকৰাৰ কিয় অৱকাশ নাথাকিব ?
