কংগ্ৰেছ নেতা গৌৰৱ গগৈয়ে মঙলবাৰে লোকসভাত প্ৰধানমন্ত্ৰী নৰেন্দ্ৰ মোদীৰ চৰকাৰৰ বিৰুদ্ধে অনাস্থা প্ৰস্তাৱক লৈ বিতৰ্ক আৰম্ভ কৰে।
তেওঁ কয় যে বিৰোধী I.N.D.I.A. ই মণিপুৰৰ ক্ষেত্ৰত চৰকাৰৰ মৌনতাৰ বাবেই অনাস্থাৰ প্ৰস্তাৱ আনিছে।
“আমি অনাস্থাৰ প্ৰস্তাৱ আনিবলৈ বাধ্য। এইটো কেতিয়াও সংখ্যাৰ কথা নাছিল বৰঞ্চ ই মণিপুৰৰ বাবে ন্যায়ৰ কথা আছিল। মই এই প্ৰস্তাৱ আগবঢ়াইছো যাতে এই সদনে চৰকাৰৰ ওপৰত অনাস্থা প্ৰকাশ কৰে। INIDA ই মণিপুৰৰ বাবে এই প্ৰস্তাৱ আনিছে। মণিপুৰে ন্যায় বিচাৰে, ” গগৈয়ে সংসদত কয়।
গগৈয়ে লগতে উল্লেখ কৰে যে প্ৰধানমন্ত্ৰীয়ে সংসদত কথা নক’বলৈ ‘মৌন ব্ৰত’ লৈছে গতিকে বিৰোধীয়ে “তেওঁৰ মৌনতা ভংগ”ৰ প্ৰস্তাৱ উত্থাপন কৰিবলৈ বাধ্য হৈছে।
‘‘আজিলৈকে মণিপুৰলৈ কিয় নগ’ল প্ৰদানমন্ত্ৰী মোদী? অৱশেষত মণিপুৰত কথা ক’বলৈ প্ৰায় ৮০ দিন কিয় লাগিল আৰু যেতিয়া তেওঁ কথা ক’লে তেতিয়া মাত্ৰ ৩০ ছেকেণ্ডৰ বাবেহে ক’লে কিয়? কিয় এতিয়ালৈকে মণিপুৰৰ মুখ্যমন্ত্ৰীক বৰ্খাস্ত কৰা হোৱা নাই কিয়?,” গৌৰৱ গগৈয়ে বিতৰ্কত এই প্ৰশ্ন উত্থাপন কৰে।
খবৰ অনুসৰি অনাস্থাৰ প্ৰস্তাৱৰ আলোচনাৰ বাবে ১২ ঘণ্টাৰ সময় নিৰ্ধাৰণ কৰা হৈছে। আলোচনাত অংশ ল’বলৈ শাসকীয় বিজেপিয়ে প্ৰায় সাত ঘণ্টা সময় পাব যদিও কংগ্ৰেছ দলৰ বাবে প্ৰায় এঘণ্টা ১৫ মিনিট সময় ধাৰ্য দিয়া হৈছে। আনহাতে, ৱাইএছআৰচিপি, শিৱসেনা, জেডিইউ, বিজেডি, বিএছপি, বিআৰএছ আৰু এলজেপিক মুঠ ২ ঘণ্টাৰ সময় দিয়া হৈছে। অন্য দল আৰু নিৰ্দলীয় সাংসদসকলৰ বাবে ১ ঘণ্টা ১০ মিনিটৰ সময়সীমা ধৰি দিয়া হৈছে।
তদুপৰি প্ৰধানমন্ত্ৰী নৰেন্দ্ৰ মোদীয়ে ১০ আগষ্টত এই প্ৰস্তাৱৰ উত্তৰ দিয়াৰ সম্ভাৱনা আছে।
লগতে পঢ়কঃ যি ল’ৰাৰ গাত থাকে এইকেইটা গুণ, সেই ল’ৰাৰ প্ৰেমত পৰিব খোজে নাৰী
লগতে পঢ়কঃ গৰুক দিয়া হ’ব নেকি ৰাষ্ট্ৰীয় জন্তুৰ মৰ্যাদা? সংসদত স্পষ্ট কৰি দিলে সাংস্কৃতিক দপ্তৰৰ মন্ত্ৰীয়ে
লগতে পঢ়কঃ পৰিচাৰিকাক যৌন নিৰ্যাতনৰ শাস্তি! ছিংগাপুৰত ভাৰতীয় লোকক ১৮ বছৰৰ জেল; ১২টা সৌকাৰ কোব
