আপোনাৰ মৰমৰ শিশুটোকো চিপচ,কুৰকুৰী কিনি দিয়ে নেকি ? হয়তো সকলোৱে দিয়ে।কিন্তু সাৱধান,কিনাৰ আগতে এবাৰ ভাবি চাওক। বহুজাতিক কোম্পানীয়ে শিশুসকলৰ বাবে প্ৰস্তুত কৰা এক জনপ্ৰিয় চিপচৰ পেকেটত ওলাইছে গেলা দুৰ্গন্ধজাতীয় লুপথুপীয়া পদাৰ্থ। এই ঘটনা টীয়কৰ৷ টীয়কৰ এখন দোকানত দোকানী এজনে চিপচৰ পেকেটৰ পৰা দুৰ্গন্ধ ওলোৱা অনুমান কৰি পেকেটটো ফালি চাই অত্যাধিক দুৰ্গন্ধ পাবলৈ ধৰে ।
পেকেট টোৰ পৰা ওলাই আহে এক লুপথুপীয়া পদাৰ্থ।খোৱাটোতো দূৰৰে কথা চুবলৈও ঘীণ লগা। দুৰ্গন্ধ ইমানে বিয়পি পৰে যে দাঁতকাষৰীয়া দোকানী আহি উক্ত স্থানতনো কি হৈছে চাবলৈ গোট খায়।পেকেটটো দেখি সকলো হতবাক।সকলোৰে এটাই প্ৰশ্ন শিশু খাদ্যত এইবোৰ কি ? উল্লেখযোগ্য যে পেকেটোত যোৱা জুন মাহত প্ৰস্তুত কৰা বুলি লিখা আছে।
ইপিনে এমাহৰ ভিতৰতে এইদৰে খোৱাৰ অনুপযোগী হৈ পৰা ঘটনাই এতিয়া সকলো অভিভাৱকে শংকিত কৰি তুলিছে।সেয়ে এই ক্ষেত্ৰত অসমত ব্যৱসায় কৰি কোটি কোটি টকা সংগ্ৰহ কৰা বহুজাতিক কোম্পানীসমূহৰ বিষয়ববীয়া তথা ক্ৰেতা- বিক্ৰতাসকলক বিশেষকৈ শিশুসকলৰ জীৱনক লৈ হেতালি নেখেলিবলৈ অসম জাতীয়তাবাদী যুৱ ছাত্ৰ পৰিষদৰ টীয়ক আঞ্চলিকে সকিয়াই দিছে আৰু ইয়াৰ এক উচিত তদন্ত কৰিবলৈ অসম চৰকাৰৰ খাদ্য বিভাগক দাবী জনাইছে।
