মাছ-মাংস, কণী খালে ক’ৰ’না ভাইৰাছ সংক্ৰমণ হৈ বুলি অপপ্ৰচাৰ চলি থকাৰ সময়তে অল ইণ্ডিয়া ইনষ্টিটিউট অফ মেডিকেল ছায়েন্স (AIIMS) ৰ অধ্যক্ষ ৰনদীপ গুলেৰিয়াই এনেবোৰ খাদ্য গ্ৰহণ কৰিলে ক’ৰ’না ভাইৰাছৰ সংক্ৰমণ নহয় বুলি মন্তব্য কৰিছে।
‘সকলো ধৰণৰ মাংস আৰু কণী খাব পাৰে। কিন্তু হয়, সতৰ্কতা অৱলম্বনৰ বাবে মাংস বনোৱাৰ আগতে ভালদৰে ধুই ল’ব লাগে’। এইদৰে কয় গুলেৰিয়াই।
AIIMS-ৰ অধ্যক্ষগৰাকীয়ে লগতে উষ্ণতা বৃদ্ধি পালে ক’ৰ’না ভাইৰাছে ক্ষতি কৰিব নোৱাৰে বুলি ওলাই থকা কথাৰ কোনো সত্যসত্যতা নাই বুলি প্ৰকাশ কৰে।
এই প্ৰসংগত গুলেৰিয়াই কয়, ‘যিকোনো বতৰতে ক’ৰ’না ভাইৰাছৰ প্ৰভাৱ মাৰাত্মক, সেয়া গৰমেই হওক বা ঠাণ্ডাই হওক’।
মদ খালেও ক’ৰ’না ভাইৰাছৰ সংক্ৰমণ নহয় বুলি ছ’চিয়েল মিডিয়াত চলি থকা প্ৰচাৰকো মিছা বুলি গুলেৰিয়াই কয়।
‘ক’ৰ’না ভাইৰাছৰ পৰা বাচি থাকিবলৈ চাবোনেৰে সঘনাই হাত ধুৱক। চাবোনৰ সলনি চেনিটাইজাৰো ব্যৱহাৰ কৰিব পাৰে’, তেওঁ সকলোকে এই আহ্বান জনায়।
উল্লেখ্য যে এই পৰ্যন্ত ভাৰতত ক’ৰ’না ভাইৰাছ আক্ৰান্তৰ সংখ্যা ১০৮ লৈ বৃদ্ধি পাইছে। ইয়াৰ ভিতৰত মহাৰাষ্ট্ৰত ৩১ গৰাকী লোকৰ শৰীৰত নতুনকৈ এই ভাইৰাছ বিধ ধৰা পৰিছে।
ইফালে অসমত বিশ্বনাথ জিলাৰ এজন যুৱক আৰু নগাঁও জিলাৰ ৰহাৰ এজন লোকক আছুতীয়াকৈ ৰাখি নিৰীক্ষণত ৰখা হৈছে।
এই পৰ্যন্ত উত্তৰ-পূবত এজনো লোক ক’ৰ’না ভাইৰাছত আক্ৰান্ত হোৱা নাই।