অপ্ৰতিৰোধ্য কিম! এইবাৰ চাবমেৰিনৰ পৰাই দুটাকৈ ক্ৰুজ মিছাইল নিক্ষেপ কৰিলে উত্তৰ কোৰিয়াই

উত্তৰ কোৰিয়াই এখন চাবমেৰিনৰ পৰা দুটা কৌশলগত ক্ৰুজ মিছাইল পৰীক্ষা কৰিছে। পৰীক্ষাটো স্থানীয় সময় অনুসৰি দেওবাৰে নিক্ষেপ কৰা হৈছিল। উত্তৰ কোৰিয়াৰ ৰাষ্ট্ৰীয় সংবাদ সংস্থা কেচিএনএ-য়ে সোমবাৰে এই তথ্য প্ৰকাশ কৰিছে।

দক্ষিণ কোৰিয়া আৰু আমেৰিকা যুক্তৰাষ্ট্ৰৰ মাজত যৌথ সামৰিক অনুশীলন আৰম্ভ হোৱাৰ আগতে উত্তৰ কোৰিয়াই এক কৌশলগত ক্ৰুজ মিছাইল পৰীক্ষা কৰিলে। সাধাৰণতে, পাৰমাণৱিক অস্ত্ৰ কঢ়িয়াব পৰা মিছাইলৰ ক্ষেত্ৰত ‘কৌশলগত’ শব্দটো ব্যৱহাৰ কৰা হয়।

কেচিএনএ-ৰ প্ৰতিবেদন অনুসৰি, দেওবাৰে পুৱতি নিশা উত্তৰ কোৰিয়াৰ পূব উপকূলৰ ওচৰত ‘৮.২৪ য়ংগুং’ চাবমেৰিনৰ পৰা দুয়োটা মিছাইল নিক্ষেপ কৰা হয়। এই মিছাইলে প্ৰায় ১,৫০০ কিলোমিটাৰ দূৰত সাগৰত পূৰ্ব পৰিকল্পিত লক্ষ্যত আঘাত কৰে।

লগতে পঢ়ক: অস্কাৰত ভাৰতৰ জয়জয়কাৰ! মৌলিক গানৰ বাবে ‘;নাটু নাটু’; তথ্যচিত্ৰ ‘দ্য এলিফেণ্ট হুইছপাৰাৰ্ছ’লৈ অস্কাৰ

কেচিএনএ-ৰ প্ৰতিবেদনত লগতেকোৱা হৈছে যে এই পৰীক্ষাই মিছাইল উৎক্ষেপণ প্ৰণালীৰ নিৰ্ভৰযোগ্যতা নিশ্চিত কৰিছে। একে সময়তে ই চাবমেৰিন ইউনিটৰ আক্ৰমণ সক্ষমতাও পৰীক্ষা কৰিছে।

উত্তৰ কোৰিয়াৰ ক্ষেপণাস্ত্ৰ পৰীক্ষাৰ পৰিপ্ৰেক্ষিতত দক্ষিণ কোৰিয়াৰ সামৰিক বাহিনী সৰ্বাধিক সতৰ্ক হৈ আছে বুলি জানিবলৈ দিছে দেশখনৰ যুটীয়া চীফ অফ ষ্টাফে। তেওঁ কয় যে দক্ষিণ কোৰিয়াৰ চোৰাংচোৱাই এই ক্ষেত্ৰত আমেৰিকা যুক্তৰাষ্ট্ৰৰ সৈতে যোগাযোগ ৰক্ষা কৰি কাম কৰি আছে।

দক্ষিণ কোৰিয়া আৰু আমেৰিকা যুক্তৰাষ্ট্ৰৰ সামৰিক বাহিনীয়ে আজি ১১ দিনীয়া যুটীয়া সামৰিক অনুশীলন আৰম্ভ কৰিব। অনুশীলনটোৰ নাম ‘ফ্ৰীডম শ্বিল্ড ২৩’ ৰখা হৈছে। পিয়ংইয়ংয়ে এই অনুশীলনত আপত্তি জনাইছে। সেয়েহে অনুশীলন আৰম্ভ হোৱাৰ প্ৰাকমুহূৰ্তত পিয়ংইয়ঙে দুটাকৈ মিছাইল নিক্ষেপ কৰি শক্তি প্ৰদৰ্শন কৰে।

লগতে পঢ়ক: নৃশংস প্ৰেম! পুনৰ যুৱতীক হত্যা কৰি দেহ টুকুৰা টুকুৰ কৰা ঘটনা; অভিযুক্তৰ ফাঁচীৰ দাবী

বৃহস্পতিবাৰে, উত্তৰ কোৰিয়াই এটা কম দূৰত্বৰ বেলিষ্টিক মিছাইল উৎক্ষেপণ কৰিছিল। মিছাইল উৎক্ষেপণৰ কেইঘণ্টামান পিছত উত্তৰ কোৰিয়াৰ নেতা কিম জং-উনে দেশখনৰ সামৰিক বাহিনীৰ এটা গোটৰ সামৰিক প্ৰদৰ্শনী চাইছিল।

পাৰমাণৱিক শক্তিধৰ উত্তৰ কোৰিয়াই এটাৰ পিছত এটা মিছাইল পৰীক্ষা অব্যাহত ৰাখিছে। যোৱা বছৰ দেশখনৰ নেতা কিম জং-উনে ঘোষণা কৰিছিল যে তেওঁৰ দেশৰ অস্ত্ৰাগাৰ সমৃদ্ধ কৰা হ’ব। ইয়াৰ ভিতৰত আছে কৌশলগত পাৰমাণৱিক অস্ত্ৰ।

লগতে পঢ়ক: প্ৰশ্নকাকত ফাদিল! ছেবাই বাতিল কৰিলে হাইস্কুল শিক্ষান্ত পৰীক্ষাৰ সাধাৰণ বিজ্ঞানৰ পৰীক্ষা

উত্তৰ কোৰিয়াই দাবী কৰি আহিছে যে ইয়াৰ পাৰমাণৱিক অস্ত্ৰ আৰু ক্ষেপণাস্ত্ৰ কাৰ্যসূচী কেৱল আত্মৰক্ষাৰ বাবেহে।