শনিবাৰৰ পৰা ভাৰতত কৰ’না ভাইৰাছৰ টীকাকৰণ কাৰ্যসূচী আৰম্ভ হৈছে। ইয়াৰ মাজতে নৰৱেৰ পৰা আহিছে এক আতংকৰ খৱৰ।
নৰৱেত এতিয়ালৈকে ভেকচিন লোৱাৰ পাছত ২৩জন লোকৰ মৃত্যু হোৱাৰ কথা জানিব পৰা গৈছে। মৃত্যু হোৱা আটাইৰে বয়স আশীৰ উৰ্দ্ধৰ বুলি কোৱা হৈছে।
সেইদৰে ভেকচিন লোৱাৰ পাছত আৰু বহু লোক অসুস্থ হৈ পৰিছে। ইয়াৰ ফলত দেশখনত ভেকচিনৰ আতংক বিয়পি পৰিছে।
বাতৰি অনুসৰি, দেশখনত ফাইজাৰ ভেকচিনক কেন্দ্ৰ কৰি এই বিতৰ্কৰ সৃষ্টি হৈছে।
আনহাতে, ভাৰতত ছেৰাম ইনষ্টিটিউটৰ কোভিশ্বিল্ড আৰু ভাৰত বায়’টেকৰ কোভাক্সিন দিয়া হৈছে।
যোৱা ডিচেম্বৰৰ অন্তিম সপ্তাহত নৰৱেত ভেকচিন প্ৰদানৰ কাম আৰম্ভ কৰা হৈছিল। চিকিৎসকসকলে ভেকচিন দিয়াৰ পাছত মৃত্যু হোৱা লোককেইজনৰ বিষয়টো চালিজাৰি চাইছে।
দেশখনত অসুস্থ আৰু বয়সস্থসকলে ভেকচিন লোৱাটো সমস্যাজনক বুলি শংকা কৰা হৈছে। অৱশ্যে, এতিয়ালৈকে ফাইজাৰ ভেকচিনৰ বাবে উক্ত ২৩ জন লোকৰ মৃত্যু হোৱা বুলি আনুষ্ঠানিকভাৱে ঘোষণা কৰা হোৱা নাই।
কিন্তু তেওঁলোকৰ ১৩জনৰ ডায়েৰিয়া, জ্বৰ আৰু শ্বাসকষ্টৰ দৰে লক্ষণ আছিল যিটো এই ভেকচিনৰেই পাৰ্শ্বক্ৰিয়া বুলি অনুমান কৰা হৈছে।
নৰৱে চৰকাৰে বৃদ্ধসকলক ভেকচিন দিয়াৰ ক্ষেত্ৰত সতৰ্ক হোৱাৰ নিৰ্দেশ দিছে। অধিক বয়সৰ লোকসকলৰ ক্ষেত্ৰত ভেকচিন দিয়াটো লাভদায়ক নহ’বও পাৰে বুলি জানিবলৈ দিয়া হৈছে।
এতিয়ালৈকে দেশখনৰ ৩০ হাজাৰ লোকক ভেকচিনৰ প্ৰথম ড’জ দিয়া হৈছে। কিন্তু পৰিস্থিতি দেখি সতৰ্ক হৈ পৰিছে ফাইজাৰ আৰু ইউৰোপৰ বহু স্থানলৈ ভেকচিনৰ সৰবৰাহ নিয়ন্ত্ৰণ কৰিছে সংস্থাটোৱে।