বিগত প্ৰায় এটা দশকতকৈও অধিক কাল ৰাজ্যৰ ৰাজনীতিত এক শক্তিশালী স্থিতি লৈ থকা মৌলানা বদৰুদ্দিন আজমল নেতৃত্বাধীন এ আই ইউ ডি এফ দল এতিয়া থমকিবলগীয়া হৈছে। পূৰ্বৰ পঞ্চায়তত দ্বিতীয় স্থানত থকা দলটো এইবাৰৰ পঞ্চায়ত নিৰ্বাচনত তৃতীয় স্থানলৈ অৱনমিত হ’ল। দলটোৱে লাভ কৰা ভোটৰ হাৰো বহুখিনি হ্ৰাস হ’ল। কিন্তু এ আই ইউ ডি এফৰ উত্থানত বাধা দিলে কোনে?
ইতিমধ্যে এ আই ইউ ডি এফৰ হাতৰ পৰা ভোট আজুৰি আনিবলৈ সক্ষম হোৱা বুলি কংগ্ৰেছে দাবী কৰিছে। কংগ্ৰেছৰ মতে ধৰ্মীয় সংখ্যালঘু লোকসকলে এতিয়া পুনৰ কংগ্ৰেছকে আঁকোৱালী লৈছে। আনহাতে বদৰুদ্দিন আজমলক ৰূধিবলৈ বিজেপিহে সমৰ্থ হোৱা বুলি গেৰুৱা দলটোৱে পূৰ্বৰে পৰাই দাবী কৰি আহিছে।
কিন্তু এই সকলো দাবীক নস্যাত কৰি অৱশেষত এ আই ইউ ডি এফৰ অশ্বমেধৰ ঘোৰা ৰোধ কৰা ‘বব্ৰুৱাহন’ৰ খিতাপ পালে আঞ্চলিক দল অসম গণ পৰিষদে। তাকো খোদ এ আই ইউ ডি এফেই এই খিতাপ দিলে অগপক।
শনিবাৰে দিচপুৰৰ বিধায়ক আৱাসত অনুষ্ঠিত এক সংবাদমেলত এ আই ইউ ডি এফৰ সাধাৰণ সম্পাদক আমিনুল ইছলামে এই মন্তব্য কৰে।
তেওঁৰ মতে এইবাৰ এ আই ইউ ডি এফৰ ভোট অগপলৈ গৈছে। সেয়ে দলটোৰ ভাল স্থিতি থকা মানকাচৰ সমষ্টিত অগপই ২ খন আৰু হাইলাকান্দিত ১ খন জিলা পৰিষদ দখল কৰিছে। তাৰ বিপৰীতে এই জিলা সমূহত কংগ্ৰেছ শূন্য হৈছে।
ইয়াৰ কাৰণো ক’লে আমিনুল ইছলামে- ‘ধৰ্মীয় সংখ্যালঘু ৰাইজে অগপক এটা বিশ্বাসত লৈছিল। তেওঁলোকে ভাবিছিল অগপই নাগৰিকত্ব সংশোধনী বিধেয়কৰ বিৰোধীতা কৰি বিজেপিৰে মিত্ৰতা ত্যাগ কৰি চৰকাৰৰ পৰা ওলাই আহিব। সেয়ে অগপৰ প্ৰতি এইসকল ৰাইজৰ আস্থা বাঢ়িছিল’।
অৱশ্যে অগপই যেতিয়া বিজেপিৰ লগত থকাটোৱে হৈছে গতিকে সেইসকল লোক পুনৰ এ আই ইউ ডি এফলৈ উভতি আহিবলৈ বাধ্য হ’ব বুলিও তেওঁ মন্তব্য কৰে।
এ আই ইউ ডি এফৰ সাধাৰণ সম্পাদকজনৰ মতে তেওঁলোকৰ দলৰ ভোট কংগ্ৰেছে পোৱা নাই। কেৱল অগপ আৰু এ আই ইউ ডি এফৰ ভোট বিভাজন হোৱা বাবেহে সংখ্যালঘু অঞ্চলত কংগ্ৰেছে আসন বেছি পালে। অৱশ্যে কংগ্ৰেছে এ আই ইউ ডি এফতকৈ বহুত বেছি ভোট পোৱা নাই বুলিও আমিনুল ইছলামে দাবী কৰে।
ইপিনে, এ আই ইউ ডি এফে হাইলাকান্দি আৰু দক্ষিণ শালমাৰা মানকাচৰ জিলাত এককভাৱে জিলা পৰিষদ গঠন কৰিব বুলি আজিৰ সংবাদমেলত ইছলামে জানিবলৈ দিয়ে। লগতে গোৱালপাৰা, নগাওঁ, দৰং, কৰিমগঞ্জ আৰু হোজাইত জিলা পৰিষদ গঠনত এ আই ইউ ডি এফৰ সমৰ্থনৰ প্ৰয়োজন হ’ব বুলিও তেওঁ প্ৰকাশ কৰে।
আনহাতে, দলটোৱে জিলা পৰিষদ গঠন কৰিবলৈ বিজেপিক কোনো কাৰণত সমৰ্থন নিদিয়ে আৰু বিজেপিৰ পৰা সমৰ্থন নলয় বুলিও তেওঁ মন্তব্য কৰে।
কিন্তু সেয়ে যদি হয় তেতিয়াহ’লে দৰং, হোজাই, কৰিমগঞ্জ আৰু নগাঁওত জিলা পৰিষদ গঠন হোৱাত যে আউল লাগিব সেয়া নিশ্চিত। কাৰণ এ আই ইউ ডি এফে বিজেপিক সমৰ্থন নিদিয়াৰ বিপৰীতে কংগ্ৰেছে আকৌ এ আই ইউ ডি এফৰ সৈতে মিত্ৰতা নকৰে বুলি পূৰ্বৰে পৰা কৈ আহিছে।
