প্ৰধানমন্ত্ৰী নৰেন্দ্ৰ মোডী আৰু অসমৰ মুখ্যমন্ত্ৰী হিমন্ত বিশ্ব শৰ্মালৈ মই ভয় কৰা নাই।- ভাৰত জোড়ো ন্যায় যাত্ৰাৰ সময়তে দলীয় নেতা-কৰ্মীৰ ওপৰত আক্ৰমণৰ মাজতে এই মন্তব্য কৰিছে কংগ্ৰেছৰ জ্যেষ্ঠ নেতা ৰাহুল গান্ধীয়ে। এক সমাৱেশ সম্বোধন কৰি কংৰেছ নেতাগৰাকীয়ে এই হুংকাৰ দিয়ে।
নিজ বক্তব্যত ৰাহুল গান্ধীয়ে কয়,“আজি মোৰ বাছৰ আশে-পাশে বিজেপিৰ একাংশ কৰ্মী গোট খালে। কিন্তু যেতিয়াই মই তেওঁলোকৰ সৈতে কথা পাতিবলৈ বাছৰ পৰা নামিলো, তেওঁলোকে পলায়ন কৰিলে। আপোনালোকে কিমান পোষ্টাৰ বা বেনাৰ ফালে, সেই বিষয়ে আমি চিন্তা নকৰো। এয়া মতাদৰ্শৰ যুঁজ।”
উল্লেখ্য যে আজি যাত্ৰাৰ মাজতে বিয়লি শোণিতপুৰ জিলাৰ জামুগুৰিহাটত দলৰ জ্যেষ্ঠ নেতা জয়ৰাম ৰমেশৰ বাহনত বিজেপিৰ একাংশ কৰ্মীয়ে আক্ৰমণ চলায়। ইয়াৰ কিছুসময় পিছতে অসম প্ৰদেশ কংগ্ৰেছৰ সভাপতি ভূপেন বৰাক শাৰীৰিক আক্ৰমণ কৰে বিজেপিৰে একাংশ দলীয় কৰ্মীয়ে।
এই আক্ৰমণত আহত হয় ভূপেন বৰা। কংগ্ৰেছ নেতাদ্বয়ৰ ওপৰত হোৱা এনে আক্ৰমণক লৈ দেশজুৰি প্ৰতিক্ৰিয়াৰ সৃষ্টি হৈছে। এনে আক্ৰমণক কঠোৰ ভাষাৰে নিন্দা কৰিছে বিৰোধীয়ে। বিৰোধী নেতা তথা ৰাইজৰ দলৰ সভাপতি অখিল গগৈয়ে এনে কাণ্ডই বিজেপি চৰকাৰৰ ফেচিবাদী মনোভাৱ উদঙাই দিছে বুলি মন্তব্য কৰে।
অখিল গগৈয়ে লগতে মুখ্যমন্ত্ৰী হিমন্ত বিশ্ব শৰ্মাক তীক্ষ্ণ আক্ৰমণ কৰে আৰু ভাৰত জোড়ো ন্যায় যাত্ৰা নিঃসন্দেহে গণতান্ত্ৰিক পদ্ধতিৰে সম্পন্ন হৈছে আৰু কোনো চৰকাৰে দেশত নিৰাপদে চলাচল কৰাৰ স্বাধীনতাক বাধা দিয়াৰ অধিকাৰ নাই বুলি গৰিহণা দিয়া।
চি পি আই (এম) ৰ অসম ৰাজ্যিক কমিটিয়েও এই ঘটনাক তীব্ৰ গৰিহণা দিছে। ৰাহুল গান্ধীৰ নেতৃত্বত চলি থকা ভাৰত জোড়ো ন্যায় যাত্ৰাক অসমত বাধা দিয়াৰ কাৰণে হিমন্ত বিশ্ব শৰ্মা নেতৃত্বাধীন চৰকাৰ আৰু বিজেপি দলে সকলো ধৰণৰ স্বৈৰতান্ত্ৰিক, বেআইনী আৰু অনৈতিক পদ্ধতি ব্যৱহাৰ কৰিছে বুলি অভিযোগ কৰে দলটোৱে।
তাৰ প্ৰতিফলন হিচাপে আজি জামুগুৰিহাটত তেওঁলোকে কংগ্ৰেছ দলৰ জ্যেষ্ঠ নেতা জয়ৰাম ৰমেশৰ ওপৰত আক্ৰমণ চলালে আৰু পৰৱৰ্তী সময়ত অসম প্ৰদেশ কংগ্ৰেছ কমিটিৰ সভাপতি ভূপেন বৰাৰ ওপৰত শাৰীৰিক আক্ৰমণ কৰি আহত কৰিছে বুলি চি পি আই (এম)- এ দাবী কৰে।
“অসমত ক্ৰমাৎ বেছি বেছিকৈ জনবিচ্ছিন্নতা আৰু অসন্তোষৰ মুখত পৰা বিজেপি দল আৰু মুখ্যমন্ত্ৰী হিমন্ত বিশ্ব শৰ্মাই হতাশ আৰু আতংকিত হৈ যে চৰম অসহিষ্ণু আৰু অগণতান্ত্ৰিক হৈ পৰিছে, এই আক্ৰমণবোৰ হৈছে তাৰেই প্ৰতিফলন। বিৰোধী দলৰ বক্তব্য যাতে জনসাধাৰণৰ মাজলৈ নিব নোৱাৰে তাৰ বাবেই তেওঁলোকে সম্পূৰ্ণ গুণ্ডামিৰ আশ্ৰয় লৈছে।”- এক বিবৃতি যোগে চি পি আই (এম)- এ কয়।
ইফালে কংগ্ৰেছে এক বিবৃতি যোগে ঘটনাৰ ন্যায়িক তদন্তৰ দাবী উত্থাপন কৰি দোষীক গ্ৰেপ্তাৰ কৰিবলৈ দাবী জনায়। ঘটনা সন্দৰ্ভত শোণিতপুৰ জিলা কংগ্ৰেছে ইতিমধ্যে জামুগুৰিহাটত এজাহাৰ দাখিল কৰিছে বুলি বিবৃতিটোত উল্লেখ কৰা হৈছে।
ভাৰত জোড়ো ন্যায় যাত্ৰাৰ সফলতাত শংকিত হৈ বিজেপি দল আৰু বিজেপি নেতৃত্বাধীন অসম চৰকাৰ এনে কাণ্ড ঘটায় বুলি দাবী কৰে কংগ্ৰেছে। এই ঘটনাত চতিয়া সমষ্টিৰ বিধায়ক পদ্ম হাজৰিকা জড়িত থকা বুলিও সন্দেহ প্রকাশ কৰিছে কংগ্ৰেছ দলে।
প্রদেশ কংগ্ৰেছে ২৪ ঘণ্টাৰ সময়সীমা বান্ধি দিয়াৰ লগতে যদিহে দোষীক গ্ৰেপ্তাৰ কৰিব নোৱাৰে তেন্তে পৰৱৰ্তী সময়ত প্রতিবাদী কাৰ্যসূচী ঘোষণা কৰা হ’ব বুলিও স্পষ্ট কৰি দিছে। বিজেপিয়ে এনে কাণ্ডৰে কাপুৰুষালি কৰা বুলি উল্লেখ কৰি কংগ্ৰেছে বিজেপিৰ ভেৰোনীয়া গুণ্ডা বাহিনীক ভয় নকৰে বুলিও সকীয়াই দিয়ে।
লক্ষণীয়ভাৱে এই ঘটনা সংঘটিত হোৱা শোণিতপুৰ জিলাত আৰক্ষী অধীক্ষক হিচাপে দায়িত্বত আছে মুখ্যমন্ত্ৰী হিমন্ত বিশ্ব শৰ্মাৰ ভাতৃ সুশান্ত বিশ্ব শৰ্মা। ঘটনাৰ পিছতে দেশজুৰি হোৱা ব্যাপক প্ৰতিক্ৰিয়াৰ পিছত মুখ্যমন্ত্ৰী হিমন্ত বিশ্ব শৰ্মাই এই সন্দৰ্ভত অসম আৰক্ষীক ব্যৱস্থা গ্ৰহণ কৰিবলৈ নিৰ্দেশ দিয়া বুলি জানিব পৰা গৈছে।
