চৰকাৰী চাকৰি কৰিব বিচাৰে? তেতিয়াহ’লে আবেদনকাৰীয়ে কোনোধৰণৰ ধূমপান নকৰা বুলি শপতনামা লিখি দিব লাগিব।
অকল ধূমপানেই নহয়, সকলোধৰণৰ তম্বাকু জাতীয় সেৱনৰ পৰা বিৰত থাকিলেহে চৰকাৰীৰ চাকৰি সুযোগ লাভ কৰিব।
ঝাৰখণ্ড চৰকাৰৰ স্বাস্থ্য, শিক্ষা আৰু পৰিয়াল কল্যাণ বিভাগৰ তৰফৰ পৰা জাৰি কৰা এক বিবৃতিটোত এই সিদ্ধান্তৰ কথা সদৰী কৰা হৈছে।
তদুপৰি, ৰাজ্যখনৰ সকলো চৰকাৰী কৰ্মচাৰীয়ে তেওঁলোকে তম্বাকু জাতীয় বস্তু সেৱনৰ পৰা আঁতৰত থকা বুলি শপতনামা দিব লাগিব।
ঝাৰখণ্ড চৰকাৰে সকলোধৰণৰ তম্বাকু জাতীয় সামগ্ৰী বন্ধ কৰিবলৈ দৃঢ় প্ৰতিজ্ঞ হৈছে। ৰাজ্যখনত অহা বছৰৰ ১ এপ্ৰিলৰ পৰা এই নিয়ম কাৰ্যকৰী কৰা হ’ব।
হেমন্ত চোৰেনৰ প্ৰশাসনে সিদ্ধান্ত গ্ৰহণ কৰিছে যে চৰকাৰী কাৰ্যালয়সমূহত কোনোৱে ধূমপান বা আন কোনো তম্বাকু জাতীয় সামগ্ৰী সেৱন কৰিব নোৱাৰিব।
চৰকাৰী কৰ্মচাৰীসকলে কেৱল কাৰ্যালয় বুলিয়েই নহয়, আন কোনো সময়তে নিচাজাতীয় সামগ্ৰীৰ সেৱন কৰিব নোৱাৰিব। এই সকলোবোৰ শপতনামা যোগে জনাব লাগিব।
চৰকাৰী সূত্ৰ অনুসৰি, নিষিদ্ধ এই সামগ্ৰীসমূহৰ ভিতৰত আছে চিগাৰেট, বিড়ি, চাধা, গুটখা, পান মচলা, জৰ্দা-চুপাৰি আদি। ইয়াৰ লগতে হোকা বা ই-চিগাৰেট তথা আন সকলোধৰণৰ নিচাজাতীয় সামগ্ৰীৰ ব্যৱহাৰ বন্ধ কৰা হৈছে।
বৃহস্পতিবাৰে ৰাজ্যখনৰ মাদক দ্ৰব্য নিয়ন্ত্ৰণ সমিতিয়ে জানিবলৈ দিয়ে যে আৰক্ষীৰ সদৰ কাৰ্যালয়ৰ পৰা আৰম্ভ কৰি জিলা তথা ব্লক পৰ্যায়ৰ সকলো কাৰ্যালয় ‘নিচামুক্ত’ কৰি তোলা হ’ব।
আনকি বেচৰকাৰী কাৰ্যালয়ৰ মুখ্য দ্বাৰত ‘টবেক’ ফ্ৰী জ’ন’ লিখাটো বাধ্যতামূলক হ’ব। ঝাৰখণ্ড চৰকাৰে এইবাৰ নিচাযুক্ত দ্ৰব্যৰ ব্যৱহাৰৰ ক্ষেত্ৰত যথেষ্ট কঠোৰ হোৱা দেখা গৈছে।
