ৰাজ্যখনৰ জনসাধাৰণৰ সুবিধাৰ বাবে ৰাষ্ট্ৰীয় নাগৰিকপঞ্জীৰ ৰাজ্যিক সমন্বয়ক প্ৰতীক হাজেলাই এন আৰ চিৰ খচৰাৰ ক’পি সকলো পঞ্চায়ত কাৰ্যালয়, গাঁও পঞ্চায়তৰ কাৰ্যালয়, খণ্ড উন্নয়ন বিষয়াৰ কাৰ্যালয়, ভিচিডিচি আদিত সুলভ কৰি ৰাখিবলৈ জিলা উপায়ুক্ত তথা এন আৰ চিৰ জিলা পঞ্জীয়কলৈ কঠোৰ নিৰ্দেশনা জাৰি কৰিছে।
হাজেলাই দিয়া নিৰ্দেশ অনুসৰি ৰাষ্ট্ৰীয় নাগৰিকপঞ্জীৰ এনএছকে সেৱা কেন্দ্ৰসমূহৰ উপৰি উক্ত কাৰ্যালয়সমূহত এনআৰচিৰ খচৰাৰ ক’পি উপলব্ধ হ’ব লাগিব।
হাজেলাই তেওঁৰ নিৰ্দেশ পত্ৰখনত স্পষ্টকৈ উল্লেখ কৰিছে যে উচ্চতম ন্যায়ালয়ৰ নিৰ্দেশ অনুসৰিয়েই ৰাজ্যিক সমন্বয়গৰাকীয়ে এই নিৰ্দেশ জাৰি কৰিছে। ৰাইজে এনআৰচিৰ খচৰাত যাতে নিজৰ নাম সহজতে চাব পাৰে আৰু দাবী-আপত্তি দাখিলৰ সন্দৰ্ভত প্ৰয়োজনীয় তথ্য সংগ্ৰহ কৰিব পাৰে তাৰ বাবে উচ্চতম ন্যায়ালয় এনআৰচিৰ খচৰাখন সহজতে উপলব্ধ কৰাৰ নিৰ্দেশ দিছিল।
তদুপৰি, ৰাজ্যিক সমন্বয়কগৰাকীয়ে এনএছকে সেৱা কেন্দ্ৰসমূহত এল আৰ চিসকলৰ লগতে কৰ্মচাৰীসকলৰ উপস্থিতি প্ৰতিদিনে বাধ্যতামূলক কৰাৰ নিৰ্দেশ দিছে।
অহা ১৫ ডিচেম্বৰলৈকে চলিবলগীয়া এন আৰ চিৰ দাবী-আপত্তি প্ৰক্ৰিয়াৰ সময়ত যাতে ৰাইজে অসুবিধাৰ সন্মুখীন হ’ব নালাগে তাৰ বাবে হাজেলাই এই নিৰ্দেশ দিছে। হাজেলাই লগতে কোনো ব্যক্তিয়ে বিচাৰিলে এনআৰচিৰ কাগজত উপলব্ধ ক’পিও যোগান ধৰিবলৈ উপায়ুক্তসকলক নিৰ্দেশ দিয়া হৈছে।