উৰিষ্যাৰ মুখ্যমন্ত্ৰী নবীন পাটনায়কক হত্যাৰ ষড়যন্ত্ৰ চলিছে। মুখ্যমন্ত্ৰীৰ বাসভৱনলৈ এগৰাকী অজ্ঞাত ব্যক্তিয়ে এই সন্দৰ্ভত সতৰ্ক কৰি দি ইংৰাজীত লিখা এখন পত্ৰ প্ৰেৰণ কৰিছে।
পত্ৰখনত দাবী কৰা হৈছে যে মহাৰাষ্ট্ৰৰ নাগপুৰত থকা এই ষড়যন্ত্ৰৰ মূল চক্ৰটোৱে নবীন পাটনায়কক হত্যা কৰাৰ বাবে ভেৰোণীয়া হত্যাকাৰী নিয়োগ কৰিছে।
সমগ্ৰ বিষয়টো সন্দৰ্ভত উৰিষ্যাৰ আৰক্ষীয়ে তদন্ত আৰম্ভ কৰিছে। বৃহস্পতিবাৰে ৰাজ্যখনৰ প্ৰশাসনৰ তৰফৰ পৰা এই বিষয়ে জানিবলৈ দিয়া হৈছে।
কোৱা হৈছে যে যোৱা ৫তাৰিখে উক্ত পত্ৰ পোৱাৰ পাছতেই ৰাজ্যখনৰ বিশেষ গৃহ সচিব ড০ সন্তোষ বালাক আৰক্ষী আৰু চোৰাংচোৱা বিভাগৰ ডিজি তথা ভুৱনেশ্বৰৰ আৰক্ষী আয়ুক্তক এই বিষয়ে তদন্তৰ নিৰ্দেশ দিছে।
ইপিনে, বিষয়টো পোহৰলৈ অহা পাছতেই উৰিষ্যাৰ প্ৰশাসনত তীব্ৰ চাঞ্চচল্যৰ সৃষ্টি হৈছে। মুখ্যমন্ত্ৰী গৰাকীৰ নিৰাপত্তা কটকটীয়া কৰি তোলা হৈছে আৰু সকলোপিনে কঠোৰ নিৰীক্ষণৰ ব্যৱস্থা কৰা হৈছে।
এই পত্ৰখন কোনে প্ৰেৰণ কৰিছে সেই বিষয়েও সন্ধান চলাই থকা হৈছে।
পত্ৰখনত উল্লেখ কৰা হৈছে নবীন পাটনায়কক হত্যা কৰাৰ বাবে নাগপুৰৰ এজন ব্যক্তিয়ে কেইবাজনো ভেৰোণীয়া হত্যাকাৰী নিয়োগ কৰিছে।
পেছাদাৰী হত্যাআৰীসকলৰ হাতত একে-৪৭ আৰু ছেমি অট’মেটিক পিষ্টলকে ধৰি অত্যাধুনিক মাৰনাস্ত্ৰ থকা বুলিও কোৱা হৈছে।
দেশৰ ভিতৰত এগৰাকী স্বচ্ছ ৰাজনীতিক তথা সুদক্ষ প্ৰশাসক হিচাপে সুনাম আছে উৰিষ্যাৰ মুখ্যমন্ত্ৰী নবীন পাটনায়কৰ। প্ৰচাৰৰ পৰা আঁতৰত থাকিয়েই নীৰৱে জনসাধাৰণৰ বাবে কাম কৰি যোৱা নেতা হিচাপেও পাটনায়ক সৰ্বজনবিদিত।
এনেকুৱা এগৰাকী ব্যক্তিক হত্যাৰ চেষ্টা কৰাৰ কথা শুনি আচৰিত হৈ পৰিছে নেতাগৰাকীৰ অনুৰাগীসকল।
