এগৰাকী মল্ল যুঁজাৰু হত্যাৰ অভিযোগত অলিম্পিকৰ দুটাকৈ পদক বিজয়ী মল্ল যুঁজাৰু সুশীল কুমাৰৰ বিৰুদ্ধে দিল্লী আৰক্ষীয়ে হত্যাৰ গোচৰ ৰুজু কৰিছে।
বুধবাৰে দিল্লী আৰক্ষীয়ে প্ৰকাশ কৰিছে যে ২৩ বছৰীয়া সাগৰ নামৰ এগৰাকী মল্ল যুঁজাৰুৰ হত্যাৰ সৈতে জড়িত থকাৰ অভিযোগত সুশীল কুমাৰৰ সৈতে অন্য পাঁচগৰাকীৰ বিৰুদ্ধে আৰক্ষীয়ে গোচৰ ৰুজু কৰিছে।
বাতিৰ লিখা পৰলৈকে এগৰাকী অভিযুক্তক আটক কৰাৰ বাহিৰে সুশীল কুমাৰসহ আন কোনো অভিযুক্তক আৰক্ষীয়ে গ্ৰেপ্তাৰ কৰা নাই।
আৰক্ষীয়ে প্ৰকাশ কৰা মতে নিহত ২৩ বছৰীয়া মল্ল যুঁজাৰুগৰাকীৰ আন দুগৰাকী সতীৰ্থও দলৱদ্ধ আক্ৰমণত আহত হৈছে।
মংগলবাৰে নিশা দিল্লী দক্ষিণাঞ্চলৰ ছাত্ৰশাল ষ্টেডিয়ামৰ ভিতৰত এই আক্ৰমণৰ ঘটনাটো সংঘটিত হয়।
মডেল টাউন আৰক্ষীয়ে নিশাই ঘটনাস্থলীৰ পৰা এখন স্ক্ৰপিঅ’সহ পাঁচখন বাহন ৰখাই থোৱা অৱস্থাত জব্দ কৰিছে। স্ক্ৰপিঅ’খনৰ পৰা আৰক্ষীয়ে ডাবুল বেৰেলৰ এটা বন্দুক, পাঁচ জাঁই সজীৱ গুলীসহ দুডাল কঠাৰ লাঠি উদ্ধাৰ কৰিছে।
আহতকেইজনক আৰক্ষীয়ে উদ্ধাৰ কৰি বিজেআৰএমএইছ হাস্পিতালত চিকিৎসাৰ বাবে ভৰ্তি কৰায়।
আৰক্ষীয়ে ২৪ বছৰীয়া প্ৰিন্স দালাল নামৰ এজন যুৱকক ঘটনাৰ সন্দৰ্ভত হাৰিয়ানাৰ ঝাজাৰৰ পৰা আটক কৰিছে। তেওঁৰ পৰাও এটা ডাবুল বেৰেল বন্দুক আৰু সাত জাঁই সজীৱ গুলী উদ্ধাৰ কৰিছে আৰক্ষীয়ে।
বিভিন্ন প্ৰমাণৰ ভিত্তিত আৰক্ষীয়ে হত্যাকাণ্ডটোত জড়িত থকাৰ সন্দেহত দুটাকৈ অলিম্পিক পদক বিজয়ী মল্ল যুঁজাৰু সুশীল কুমাৰসহ অন্য পাঁচগকাৰীৰ বিৰুদ্ধে ভাৰতীয় দণ্ডবিধি আইনৰ ৩০৩, ৩৬৫, ১২০বি ৰ ধাৰাত গোচৰ ৰুজু আৰক্ষীয়ে তদন্ত অব্যাহত ৰাখিছে।
