২০২০ চনৰ দিল্লীৰ ভয়াবহ সংঘৰ্ষৰ সৈতে জড়িত ‘বেআইনী কাৰ্যকলাপ প্ৰতিৰোধ আইন’ৰ গোচৰত কাৰাবন্দী হৈ থকা জেএনইউৰ প্ৰাক্তন গৱেষক ছাত্ৰ ওমৰ খালিদ আৰু ছাৰ্জিল ইমামৰ জামিন আৱেদনৰ শুনানি দিল্লী উচ্চ ন্যায়ালয়ে অহা ৩০ ছেপ্টেম্বৰলৈ স্থগিত ৰাখিছে। গোচৰটো পৰিচালনা কৰিবলগীয়া চৰকাৰী পক্ষৰ অধিবক্তা তথা অতিৰিক্ত ছলিচিটৰ জেনেৰেল এছ ভি ৰাজুৰ অসুস্থতাৰ পৰিপ্ৰেক্ষিতত ন্যায়াধীশ প্ৰতিভা এম সিং আৰু ন্যায়াধীশ দীনেশ ভাটৰ খণ্ড বিচাৰপীঠে এই সিদ্ধান্ত গ্ৰহণ কৰে। একেটা গোচৰৰে আন এগৰাকী অভিযুক্ত তথা আম আদমী পাৰ্টিৰ প্ৰাক্তন কাউন্সিলৰ তাহিৰ হুছেইনৰ জামিন আৱেদনৰ শুনানিৰ বাবে আদালতে অহা ৪ নৱেম্বৰৰ দিনটো নিৰ্ধাৰণ কৰিছে।
ৰাষ্ট্ৰীয় তদন্তকাৰী সংস্থা আইনৰ ২১ নং ধাৰাৰ অধীনত খালিদ আৰু ইমামে তেওঁলোকৰ জামিন আৱেদন নাকচ কৰা নিম্ন আদালতৰ যোৱা ৪ জুলাইৰ নিৰ্দেশক প্ৰত্যাহ্বান জনাই উচ্চ ন্যায়ালয়ৰ কাষ চাপিছিল। উল্লেখ্য যে, খালিদে এইবাৰ তৃতীয়টো জামিন আৱেদন নাকচ হোৱাৰ পাছত আদালতত আৱেদন দাখিল কৰিছে। নিম্ন আদালতে দুয়োগৰাকী অভিযুক্তৰ জামিন নাকচ কৰাৰ ক্ষেত্ৰত স্পষ্ট কৰি দিছিল যে উচ্চতম ন্যায়ালয়ৰ পূৰ্বৰ ৰায়দান অনুসৰণ কৰাৰ বাহিৰে তেওঁলোকৰ সন্মুখত আন কোনো বিকল্প নাই। উচ্চতম ন্যায়ালয়ে ইয়াৰ পূৰ্বে এক নিৰ্দেশত উল্লেখ কৰিছিল যে সুৰক্ষিত সাক্ষীসকলৰ জেৰা সম্পূৰ্ণ হোৱাৰ পাছত বা নিৰ্দেশ প্ৰদানৰ তাৰিখৰ পৰা এবছৰ উকলি যোৱাৰ পাছতহে ইমামে পুনৰ জামিনৰ বাবে আৱেদন কৰিব পাৰিব।
চলিত বৰ্ষৰ ৫ জানুৱাৰীত উচ্চতম ন্যায়ালয়ে এই গোচৰৰ সৈতে জড়িত গুলফিছা ফাটিমা, মীৰা হাইদৰ, ছিফা উৰ ৰহমান, মহম্মদ চেলিম খান আৰু ছাদাব আহমেদক জামিন প্ৰদান কৰিছিল যদিও ওমৰ খালিদ আৰু ছাৰ্জিল ইমামৰ জামিন আৱেদন নাকচ কৰিছিল। পৰৱৰ্তী সময়ত ন্যায়াধীশ বি ভি নাগৰত্নাৰ নেতৃত্বাধীন উচ্চতম ন্যায়ালয়ৰ আন এখন সমকক্ষ খণ্ড বিচাৰপীঠে ‘গুলফিছা ফাটিমা বনাম ৰাষ্ট্ৰ’ গোচৰৰ ৰায়দানক লৈ অসন্তুষ্টি প্ৰকাশ কৰিছিল। বিচাৰপীঠখনে উল্লেখ কৰিছিল যে ২০২১ চনৰ ‘ভাৰত চৰকাৰ বনাম কে এ নজীব’ গোচৰত উচ্চতম ন্যায়ালয়ৰ তিনিজনীয়া বিচাৰপীঠে প্ৰদান কৰা ৰায়দান ইয়াত সঠিকভাৱে অনুসৰণ কৰা হোৱা নাছিল, য’ত ইউএপিএ গোচৰৰ বিচাৰ প্ৰক্ৰিয়াত হোৱা দীঘলীয়া বিলম্বক জামিনৰ এক গুৰুত্বপূৰ্ণ ভিত্তি হিচাপে মান্যতা দিয়া হৈছিল। আনহাতে যোৱা মে’ মাহত খালিদ আৰু ছাৰ্জিলৰ জামিন আৱেদন নাকচ কৰা ন্যায়াধীশ অৰবিন্দ কুমাৰৰ নেতৃত্বাধীন বিচাৰপীঠখনে ‘কে এ নজীব’ৰ ৰায়দানক লৈ বিভিন্ন বিচাৰপীঠৰ মাজত থকা পাৰ্থক্যৰ প্ৰতি লক্ষ্য ৰাখি বিষয়টো এখন বৃহৎ বিচাৰপীঠলৈ প্ৰেৰণ কৰিছিল।
