আজি সন্ধিয়া কাজিৰঙা ৰাষ্ট্ৰীয় উদ্যানত সংঘটিত হয় এক অবাঞ্চিত ঘটনা। এইবাৰ চোৰাং চিকাৰীৰ গুলীত নহয় বনকৰ্মীৰ গুলীতহে মৃত্যুক আকোৱালি ল’বলগীয়া হয় এজনী মাইকী গঁড়ে। কাজিৰঙাৰ অগৰাতলি বনাঞ্চলৰ তামুলীপথাৰ বন শিবিৰৰ উত্তৰে থকা কাপোৰ খচা বিলৰ পাৰত সংঘটিত হৈছে এই ঘটনা।
জানিব পৰা মতে উক্ত এলেকাত বনৰক্ষীয়ে পহৰা দি থকা অৱস্থাত উদ্যানখনৰ পৰা ওলাই অহা এজনী মাইকী গঁড়ে এজন বনকৰ্মীক আক্ৰমণৰ লক্ষ্যৰে খেদি আহিছিল। আৰু লগে লগে বনকৰ্মীজনে প্ৰাণ ৰক্ষাৰ বাবে গঁড়টোলৈ লক্ষ্য কৰি গুলী চলায়।
উল্লেখ্য যে গঁড়টোক খেদি পঠিয়াবলৈ চলোৱা গুলী গাত লাগি থিতাতে মৃত্যু হয় গঁড়জনীৰ। এই ঘটনা সংঘটিত হোৱাৰ পাছতে এতিয়া সমগ্ৰ অঞ্চলটোত এক তীব্ৰ চাঞ্চল্যই বিৰাজ কৰা পৰিলক্ষিত হৈছে।
ইতিমধ্যে ঘটনাস্থলীলৈ কাজিৰঙাৰ শীৰ্ষ পৰ্যায়ৰ বিষয়া ৰোহিনী বল্লভ শইকীয়া ৰাওনা হোৱা বুলি জানিব পৰা গৈছে। মৃত্যু হোৱা গঁড়জনীৰ খড়্গ উদ্ধাৰ কৰিছে বন কৰ্মীয়ে। তাৰোপৰি ঘটনা সন্দৰ্ভত এক বিভাগীয় তদন্তৰো ঘোষণা কৰিছে বন বিষয়াগৰাকীয়ে।